រាជធានីភ្នំពេញ៖ នៅមុននេះបន្តិច គឺវេលាម៉ោងប្រមាណ ១០៖០០ នាទីយប់ថ្ងៃទី ២ ឧសភា ពោលគឺបន្ទាប់ពីការប្រកួតចប់នៃវីញ្ញាកីឡាបាល់ទាត់ជម្រើសជាតិ U22 ខ្មែរ និង U22 ហ្វីលីពីន ក្នុងលទ្ធផល ១-១ នៅពហុកីឡដ្ឋានអូឡាំពិក លោក Keisuke Honda អ្នកចាត់ការទូទៅក្រុមបាល់ទាត់ជម្រើសជាតិកម្ពុជា បានបង្ហាញចំណាប់អារម្មណ៍ លោកមានមោទនភាពចំពោះកូនក្រុមរបស់លោកណាស់។

លោក Keisuke Honda បានបង្ហោះសារដែលមានខ្លឹមសារថា «វាងាយស្រួលណាស់ក្នុងការនិយាយថាយើងអាចឈ្នះការប្រកួតនេះ។ ខ្ញុំ​មាន​មោទនភាព​ចំពោះ​កូន​របស់​ខ្ញុំ​ដែលទទួល​បាន​១​ពិន្ទុ​យប់​នេះ។ យើងនឹងផ្លាស់ប្តូរចិត្តគំនិតរបស់យើងឆាប់ៗនេះ ហើយយើងនឹងរៀបចំសម្រាប់ការប្រកួតបន្ទាប់! សូមអរគុណ»។

សូមបញ្ជាក់ថា ក្រុមបាល់ទាត់ជម្រើសជាតិយុវជនអាយុក្រោម ២២ ឆ្នាំកម្ពុជា (U22) ក្នុងការប្រកួតយប់ថ្ងៃទី ២ ឧសភា បានត្រឹមស្មើជាមួយក្រុម U22 ហ្វីលីពីន ១-១ ក្នុងព្រឹត្តិការណ៍កីឡា SEA Games លើកទី៣២ ដែលកម្ពុជាធ្វើជាម្ចាស់ផ្ទះ។ ការប្រកួតក្នុងរាត្រីថ្ងៃទី ២ ឧសភានេះ គឺជាប្រកួតទី២ សម្រាប់ពូល A។ ដោយសារតែលទ្ធផល ១ ស្មើនិងក្រុមហ្វីលីពីន ដូច្នេះតាមរយៈលទ្ធផលនេះក្រុមកម្ពុជា រកបានត្រឹម ៤ពិន្ទុ បន្តឈរកំពូលតារាង ​A បណ្តោះអាសន្ន។

ស្ថិតក្នុងការប្រកួត ៤៥ នាទីដំបូង (វគ្គទី១) ក្រុម U22កម្ពុជា រកបាន ១គ្រាប់ ដោយកីឡាករ គី រីណា នៅនាទី២៦ និងតែដល់វគ្គទី២ ក្រុមហ្វីលីពីនក៏រកបានមួយគ្រាប់វិញ ដោយកីឡាករ Carino នៅនាទី៩០+២។ តាមរយៈលទ្ធផលនេះឃើញថាក្រុម U22កម្ពុជា នៅតែបន្តឈរកំពូលតារាង ក្រោយរកបាន ៤ពិន្ទុជាបណ្តោះអាសន្ន ក្រោយយកឈ្នះទីម័រខាងកើត និងស្មើជាមួយហ្វីលីពីន។

យ៉ាងណាមិញ ទស្សនិកជនអ្នកគាំទ្របានបង្ហាញការសរសើរដល់ការតស៊ូយ៉ាងស្វិតស្វាញរបស់កីឡាករខ្មែរយើង ក្នុងនោះគេក៏កត់សម្គាល់ឃើញថា ការប្រកួតជាមួយ U22 របស់ហ្វីលីពីន កីឡាករកម្ពុជាមានរបួសច្រើននាក់ដែរលើសង្វានវាលស្មៅ។

អ្នកប្រើប្រាស់បណ្តាញសង្គមជាច្រើនបានចូលទៅបញ្ចេញទស្សនៈលើកទឹកចិត្តលោក ហុង ដា និងកីឡាករខ្មែរ ដោយបានពោលថា លោក ហុង ដា និងកីឡាករកម្ពុជា​ទាំង​អស់​ធ្វើ​បាន​យ៉ាង​អស្ចារ្យ​ក្នុង​អំឡុង​ពេល​ការ​ប្រកួតនេះ​។ ពួកគាត់ពិត​ជា​មាន​មោទនភាព​ចំពោះ​កីឡាករកម្ពុជាដែលបានប្រឹងប្រែងនិងបញ្ចេញសមត្ថភាពយ៉ាងខ្លាំងក្លាក្នុងទីលានប្រកួត៕