រាជធានីភ្នំពេញ ៖ លោក ជា សំណាង ជាតារាភាពយន្តមួយរូបធ្លាប់មានកេរ្តិ៍ឈ្មោះល្បីនាអំឡុងឆ្នាំ២០០២ ។ លោកតែងតែ ចូលរួមសម្តែងក្នុងខ្សែភាពយន្តបែបសម័យនិងបុរាណជាច្រើនដូចជារឿង «តេជោតំឌិន» ជាតួអង្គស្តេច និងរឿង រាជបុរីជាដើម។
លោកជា សំណាង ក្នុងវ័យ៤០ឆ្នាំ ឱ្យដឹងថា លោកចូលរួមសម្តែងប្រមាណជិត៣០រឿង ព្រមទាំងសម្តែងកាយវិការខារ៉ាអូខេឱ្យផលិតកម្មជាច្រើនទាំងក្នុងនិងក្រៅប្រទេស។ កន្លងមកលោកធ្លាប់ចេញទៅសម្តែងនៅក្រៅប្រទេស ជាពិសេសទៅសម្តែងនៅប្រទេសបារាំងជាច្រើនលើក ព្រោះលោកធ្វើការក្នុងសមាគមនាំសិល្បករទៅសម្តែងនៅទីនោះ ។
លោកជា សំណាង ក្រៅពីទទួលជោគជ័យក្នុងអាជីពសិល្បៈលោកក៏ជោគជ័យក្នុងការងារជាវេជ្ជបណ្ឌិតបម្រើការងារនៅក្នុងអង្គការ UNFPA មួយរយៈកន្លងមក ។ ទោះជាយ៉ាងណាក្តី លោកបាត់មុខពីវិស័យសិល្បៈអស់រយៈពេលជិត៣ឆ្នាំ គឺចាប់តាំងពីឆ្នាំ២០០៩មក ។ ការបាត់មុខនោះលោកឱ្យដឹងថា ដោយសារលោកជាប់រវល់ដឹកនាំសិល្បករ-សិល្បការិនី ទៅសម្តែងនៅប្រទេសបារាំងញឹកញាប់ពេក និងជាប់រវល់ការងាររាជការ ប៉ុន្តែមានពេលខ្លះលោកសម្តែងថតស្ប៉តអប់រំមួយចំនួនដែលបានចាក់ផ្សាយតាមកញ្ចក់ទូរទស្សន៍ ។
នៅក្នុងឆ្នាំ២០១១នេះលោកសំណាងបានចូលរួមសម្តែងរឿងភាគ «សម្រស់ជីវិត» ឱ្យផលិតកម្មខ្មែរមេគង្គដែលកំពុងតែត្រៀមចាក់ផ្សាយតាមកញ្ចក់ទូរទស្សន៍ CTN ។ ក្រៅពីនេះ លោកមានគម្រោងបើកក្រុមហ៊ុនមួយទទួលថតស្ប៉តពាណិជ្ជកម្មផ្សេងៗ ។
លោកជា សំណាង និយាយថា ការបាត់មុខលោកកន្លងមក លោកមានការសោកស្តាយយ៉ាងខ្លាំង ប៉ុន្តែដោយសារតែលោកជាប់រវល់ការងារច្រើន ។ ការវិលត្រឡប់ចូលសិល្បៈសម្តែងវិញពេលនេះលោកនឹងមិនធ្វើឱ្យប្រិយមិត្តទស្សនិកជនអស់សង្ឃឹមទេ ៕
ចែករំលែកព័តមាននេះ