ប្រឡូកក្នុងវិស័យសិល្បៈអស់រយៈពេលប៉ុន្មានឆ្នាំចុងក្រោយនេះ តារាសម្តែងថ្មីវ័យក្មេង លីកា ហាក់មិនទាន់មានឱកាសសម្តែងក្នុងខ្សែភាពយន្តភាគ ឬខ្នាតធំណាមួយនៅឡើយទេ ក្នុងពេលដែលតារារូបនេះក៏កំពុងក្លាយជា
រាជធានីភ្នំពេញ ៖ ប្រឡូកក្នុងវិស័យសិល្បៈអស់រយៈពេលប៉ុន្មានឆ្នាំចុងក្រោយនេះ តារាសម្តែងថ្មីវ័យក្មេង លីកា ហាក់មិនទាន់មានឱកាសសម្តែងក្នុងខ្សែភាពយន្តភាគ ឬខ្នាតធំណាមួយនៅឡើយទេ ក្នុងពេលដែលតារារូបនេះក៏កំពុងក្លាយជាទីចំណាប់អារម្មណ៍មួយផងដែរសម្រាប់ផលិតករនានា។
យ៉ាងណាតារាវ័យ១៨ឆ្នាំរូបនេះ ក៏មានមហិច្ឆតាខ្ពស់មួយផងដែរនាពេលអនាគតសម្រាប់អាជីពសិល្បៈរបស់ខ្លួន ក្រោយពេលដែលនាងនឹងបញ្ចប់ការសិក្សានាពេលខាងមុខនេះ។
តារាសម្តែងដែលមានដើមកំណើតនៅរាជធានីភ្នំពេញស្រីស្រស់ លីកា បានអះអាងប្រាប់កោះសន្តិភាពតាមសារអេឡិចត្រូនិចថា បច្ចុប្បន្ននាងកំពុងតែជាប់ការសិក្សាផង និងឆ្លៀតពេលប្រឡូកក្នុងអាជីពសិល្បៈផង។
នាងបញ្ជាក់ថា សម្រាប់ការសិក្សា ពេលនេះនាងកំពុងតែរៀនថ្នាក់ទី១២ ហើយនាងចូលប្រឡូកក្នុងអាជីពសិល្បៈនេះតាំងពីនាងរៀនថ្នាក់ទី៨មកម្ល៉េះ។ សម្រាប់អាជីពសិល្បៈនាងត្រូវបានគេផ្តល់ឱកាសអោយចូលសម្តែង បន្ទាប់ពីនាងត្រូវបានគេមើលឃើញតាមរយៈរូបថតនៃការថតសម្អាងការមួយ។
នាងបន្ថែមថា ចាប់ពីពេលនោះមក នាងក៏ផ្តើមអាជីពសិល្បៈដោយមានការហៅដើរម៉ូត ថតរឿងខ្លី និងស្ពតពាណិជកម្មនានាជាបន្តបន្ទាប់។ យ៉ាងណាបើតាមតារាសម្តែង លីកា បើទោះបីជានាងបានប្រឡូកក្នុងអាជីពសិល្បះអស់ប៉ុន្មានឆ្នាំនេះក៏ដោយ ប៉ុន្តែនាងនៅមិនទាន់មានឱកាសចូលរួមសម្តែងនៅក្នុងខ្សែភាពយន្តភាគ ឬរឿងខ្នាតធំនៅឡើយទេ។
នាងបញ្ជាក់ថា កន្លងមកក៏មានបណ្តាប៉ុស្តិ៍ទូរទស្សន៍មួយចំនួនបានហៅនាងទៅសាកល្បងដែរ ប៉ុន្តែដោយសារជាប់ការសិក្សាទើបនាងមិនអាចទទួលថតបាន ព្រោះការថតភាពយន្តភាគគឺត្រូវការប្រើពេលវេលាយូរ។ ហេតុនេះបច្ចុប្បន្ន នាងទទួលយកតែការថតស្ពត និងរឿងខ្លីតែប៉ុណ្ណោះ ដោយសារនាងចង់ទុកពេលរៀនដើម្បីបញ្ចប់ថ្នាក់ទី១២ជាមុនសិន។
យ៉ាងណា លីកា លើកឡើងបញ្ជាក់ថា ក្រោយបញ្ចប់ការសិក្សាថ្នាក់ទី១២ហើយនោះ នាងនឹងចាប់យកអាជីពសិល្បៈនេះអោយបានពេញដៃតែម្តង ដោយសារអាជីពមួយនេះរូបនាងមានការស្រឡាញ់ និងចូលចិត្តតាំងពីក្មេង។ ដើម្បីឈានឆ្ពស់ទៅដល់ចំណុចនេះ នាងក៏បានខិតខំអភិវឌ្ឍន៍ខ្លួនបន្ថែមទៀត ដើម្បីធ្វើយ៉ាងណាអោយស្របទៅនឹងការចង់បានពីផលិតករនានា ទាំងការសម្តែង ការគោរពពេលវេលា និងតម្លៃការសម្តែងមួយសមរម្យ៕
ចែករំលែកព័តមាននេះ