អតីតពិធីករដែលពោរពេញដោយពាក្យសម្តីវោហារស័ព្ទ គឺ DJ Lion ដែលកន្លងមក បានឆ្លងកាត់ព្យុះភ្លៀងក្នុងឆាកជីវិតដែលគ្រប់គ្នានឹកស្មានមិនដល់ រហូតលោកត្រូវជាប់ឃុំឃាំងនៅពន្ធនាគារមួយរយៈពេលធំ។ ពេលនេះដំណើរជីវិតរបស់លោក ហាក់ប្រែប្រួល
រាជធានីភ្នំពេញ ៖ អតីតពិធីករដែលពោរពេញដោយពាក្យសម្តីវោហារស័ព្ទ គឺ DJ Lion ដែលកន្លងមក បានឆ្លងកាត់ព្យុះភ្លៀងក្នុងឆាកជីវិតដែលគ្រប់គ្នានឹកស្មានមិនដល់ រហូតលោកត្រូវជាប់ឃុំឃាំងនៅពន្ធនាគារមួយរយៈពេលធំ។ ពេលនេះដំណើរជីវិតរបស់លោក ហាក់ប្រែប្រួលនិងស្រស់បំព្រងឡើងវិញ ក្រោយបានចាកចេញពីពន្ធនាគារ។
ប្រាកដណាស់ បងប្អូនមហាជនបានស្គាល់ DJ Lion ច្បាស់ណាស់ ព្រោះលោកជាតារាមួយរូបដែលធ្លាប់មានកេរ្តិ៍ឈ្មោះ បោះសម្លេងខ្លាំង តែជីវិតរបស់លោកហាក់ដូចជាមានខ្សែជីវិតក្នុងរឿងភាពយន្ត ម្តងឡើង ម្តងចុះ ដូចពាក្យចាស់បានពោលថា «ខ្សែជីវិតរបស់មនុស្សយើងម្នាក់ៗពុំដូចគ្នានោះទេ» ខ្លះក៏ពើបប្រទះរឿងល្អៗសឹងតែពេញមួយជីវិត ខ្លះទៀតក៏ជួបតែរឿងទុក្ខព្រួយ សោកសង្រេងជាដើម។ ដូច្នេះ ចូរសាងអំពើល្អឱ្យបានច្រើន ទើបនាំអោយជីវិតមានភាពស្រស់បំព្រង និងភ្លឺថ្លា។
កន្លងមក ខណៈកំពុងសាងឈ្មោះល្បីល្បាញហើយនោះ ស្រាប់តែផ្ទុះដំណឹងថា ពិធីកររូបនេះបានបែកបាក់គ្រួសារ ហើយក្រោយមកទៀត លោកក៏ត្រូវបានចាប់ខ្លួន និងជាប់ពន្ធធនាគារ ក្រោយជាប់ពាក់ព័ន្ធនឹងករណីគ្រឿងញៀ.ន នៅក្លិបកម្សាន្តមួយកន្លែងកាលពីរយៈពេល៤ឆ្នាំកន្លងផុតមកនេះ។ យ៉ាងណាមិញ អតីតពិធីកររូបល្បីឈ្មោះរូបនេះ បានមានសេរីភាពវិញហើយ ក្រោយផុតទោស កាលពីចុងខែមិថុនា ឆ្នាំ២០២២ កន្លងទៅនេះ ។
ងាកមក DJ Lion ដែលបានចេញពីចេញពីពន្ធនាគារ តារារូបនេះមានជីវភាពនៅតែជួបការលំបាកជាច្រើន ដូចជាកាលពីមួយរយៈមុន លេចលឺថា តារារូបនេះ បានដើរលាងចានឱ្យគេ ជាដើម។ ប៉ុន្តែនាពេលនេះ ពិធីករដ៏ស្រស់សង្ហារូបនេះ ហាក់ដូចជាមានពន្លឺជាថ្មីឡើងវិញ ដោយមានការជួយជ្រោមជ្រែងពីលោកឧកញ៉ាម្នាក់ ហើយលោកក៏អរគុណជាខ្លាំងសម្រាប់ការជួយ និងក្តីសណ្តោសប្រណីតាមរយៈការផ្តល់ការងារដល់រូបលោក ដែលបានធ្វើឱ្យអតីតពិធីកររូបនេះ សប្បាយចិត្តខ្លាំងណាស់ទៅហើយ។
តាមរយៈបទសម្ភាសន៍ជាមួយសារព័ត៌មានកោះសន្តិភាព ដោយ DJ Lion បានឱ្យដឹងថា ក្រោយពីលោកបានចាកចេញពីពន្ធនាគារ លោកពិតជាសប្បាយចិត្តខ្លាំង ព្រោះលោកបានទទួលសេរីភាពឡើងវិញ ហើយលោកក៏សូមសន្យានឹងខ្លួនឯងថា «នឹងកែប្រែខ្លួនឱ្យឡើងល្អវិញ ដើម្បីជាប្រយោជន៍ដល់សង្គម»។
គួររម្លឹកផងដែរថា អតីតពិធីករលោក ឡាយ អិន បានជាប់ពន្ធនាគារកាលពីថ្ងៃ២៣ ខែធ្នូ ឆ្នាំ២០១៨ ដោយកាលណោះលោកជាប់រយៈពេល៤ឆ្នាំ។ លោក ឡាយអិន បានបន្ថែមថា កាលពីអំឡុងលោកជាប់ក្នុងពន្ធនាគារនោះ ជីវិតរបស់លោកពិតជាពិបាកជាខ្លាំង ដូច្នេះត្រង់ចំណុចនេះ លោកពោលទាំងក្តុលក្តួលថា លោកត្រូវតែធ្វើអ្វីដែលល្អសម្រាប់ខ្លួនឯង ទើបជាការប្រសើរ ហើយត្រូវមានគោលជំហរដើរទៅមុខ ទោះបីមានរឿងអ្វីក៏ដោយ ក៏ត្រូវតែក្រោកឈរជានិច្ច ទើបជីវិតរបស់យើងនឹងប្រសើរឡើង។
អតីតពិធីករលោក ឡាយអិន បានបន្តថា ដោយនាពេលបច្ចុប្បន្ននេះ លោកទទួលបានការងារពីឧកញ៉ា ដួង ឆាយ ក្នុងតួនាទីជាបុគ្គលិកផ្នែកលក់ ហើយលោកពិតជាសប្បាយចិត្តខ្លាំងណាស់ លោកមិនអាចភ្លេចគុណលោកឧកញ៉ាបានឡើយ ព្រោះលោកឧកញ៉ាតែងតែជួយជ្រោមជ្រែងលោក លើកទឹកចិត្តលោក ជាពិសេសតែងតែផ្តល់ដំបូន្មានល្អៗសម្រាប់ខ្លួនលោក។
បើទាក់ទងជាមួយជីវិតគ្រួសារវិញ តារារូបនេះក៏ពុំបាននិយាយអ្វីច្រើននោះឡើយ ដោយលោកត្រឹមពោលថា លោកមានការនឹករលឹកកូនជាខ្លាំង ដោយលោកចង់ជួបកូន ចង់អោបកូន ដើម្បីអោយអារម្មណ៍របស់លោកមានភាពធូរស្រាលជាងនេះ។
ជាចុងក្រោយ ពិធិករលោក ឡាយអិន ក៏មានសារផ្តាំផ្ញើសម្រាប់បងប្អូនមហាជនទាក់ទងជាមួយរឿងកន្លងមក ដែលខ្លួនលោកផ្ទាល់ធ្លាប់បានធ្វើខុស ដោយខ្លួនលោកមានវិប្បដិសារីជាច្រើន ប៉ុន្តែលោកតែងតែប្រាប់ខ្លួនឯងថា ដើរដួលកន្លែងណា ត្រូវក្រោកកន្លែងនោះ គ្មាននរណាម្នាក់មិនចេះខុសឡើយ សំខាន់ខុសហើយ ត្រូវចេះទទួលស្គាល់កំហុស និងកែប្រែនូវកំហុសរបស់ខ្លួនឯង៕
ចែករំលែកព័តមាននេះ