ទើបតែមកដល់ប្រទេសកម្ពុជាវិញ មិនទាន់បានក្តៅដីផង កញ្ញាឯក Miss Grand Cambodia2022 ពេជ្រ វត្តីសារ៉ាវឌ្ឍី បានចាប់ផ្តើមធ្វើសកម្មភាពមនុស្សធម៌ជួយដល់សង្គមភ្លាម ដោយនាងនឹង
រាជធានីភ្នំពេញ ៖ ទើបតែមកដល់ប្រទេសកម្ពុជាវិញ មិនទាន់បានក្តៅដីផង កញ្ញាឯក Miss Grand Cambodia2022 ពេជ្រ វត្តីសារ៉ាវឌ្ឍី បានចាប់ផ្តើមធ្វើសកម្មភាពមនុស្សធម៌ជួយដល់សង្គមភ្លាម ដោយនាងនឹងចុះចែកសម្ភារៈសិក្សា និងញ៉ាំអាហារជាមួយនឹងកុមារនៅទីតាំងសាលារៀនមួយកន្លែង។
ចាត់ទុកថា នេះជាសកម្មភាពលើកដំបូងដែលនាងធ្វើសម្រាប់ការមកដល់មាតុភូមិកំណើតវិញ កាលពីថ្ងៃទី២ ខែមករា ឆ្នាំ២០២៣ បន្ទាប់ពីនាងជាប់បំពេញបេសកកម្មភាពការងារនៅក្នុងប្រទេសថៃ ក្រោយពីបានទទួលភាពជោគជ័យជាបេក្ខនារីជាប់លំដាប់រងទី៥ ក្នុងកម្មវិធី Miss Grand International ដែលបានធ្វើឡើងនៅប្រទេសឥណ្ឌូណេស៊ី។
ស្រីស្អាត ពេជ្រ វត្តីសារ៉ាវឌ្ឍី បានបង្ហោះសារនៅលើគណនីហ្វេសប៊ុករបស់ខ្លួនថា នាងខ្ញុំ ពេជ្រ វត្តីសារ៉ាវឌ្ឍី ពេលនេះនាងខ្ញុំមានឱកាស និងពេលវេលាបន្តិចបន្តួច ក្នុងការបង្កើតគម្រោងធ្វើសប្បុរសធម៌មួយ នៅថ្ងៃទី០៧ ខែមករា ឆ្នាំ២០២៣ គឺពួកយើងរួមគ្នាជាចំណែកមួយជួយទៅដល់សង្គម តាមរយៈការចែករំលែកក្តីស្រឡាញ់ ភាពរីករាយជាមួយក្មេងៗ ដោយពួកយើងនឹងនាំយកសម្ភារៈសិក្សាមួយចំនួនចែកជូនដល់ក្មេងៗ ព្រមទាំងបង្កើតភាពស្និទ្ធស្នាលញ៉ាំអាហារជាមួយគ្នាមួយពេល។
នាងក៏បានអំពាវនាវឲ្យមានការចូលរួមចែករំលែកក្តីស្រលាញ់ទាំងអស់គ្នាណា ដោយសារមានកុមារជាច្រើនដែលកំពុងរង់ចាំអ្នកជួយសង្គ្រោះ ទោះតិច ឬច្រើន មិនមែនជាបញ្ហា នេះគឺជាការចែករំលែកជួយសង្គមកម្ពុជា។
ជាការកត់សម្គាល់ ក្រោយពីគ្រងមកុដ កញ្ញាឯក Miss Grand Cambodia 2022 ពេជ្រ វត្តីសារ៉ាវឌ្ឍី បានធ្វើឲ្យអ្នកគាំទ្រនៅកម្ពុជាពេញចិត្ត ព្រោះតែនាងជាបេក្ខភាពលេចធ្លោរប្រកបដោយរូបសម្រស់ ភាពឆ្លាតវៃ បត់បែន និងទេពកោលសល្យខ្ពស់។ ក្រោយបញ្ចប់ការប្រកួតនៅដើមខែវិច្ឆិកា ឆ្នាំ២០២២ នាងក៏បានបន្តធ្វើដំណើរទៅកាន់ប្រទេសថៃ ដើម្បីធ្វើការងារនៅទីនោះដែលត្រូវបានគ្រប់គ្រងរៀបចំដោយស្ថាប័ន Miss Grand នៅប្រទេសថៃ ហើយទទួលបានការពេញចិត្ត និងគាំទ្រច្រើន និងលេចធ្លោខ្លាំងក្នុងចំណោមកញ្ញាឯកម្ចាស់មកុដទាំង១០រូប។
ពេជ្រ វត្តីសារ៉ាវឌ្ឍី បានវិលមកដល់ប្រទេសកម្ពុជាវិញកាលពីថ្ងៃទី០២ ខែមករា ឆ្នាំ២០២៣ ដោយមានទស្សនិកជន និងអ្នកគាំទ្រជាច្រើនរូបបានទៅទទួលនាងដោយផ្ទាល់នៅឯព្រលានយន្តហោះអន្តរជាតិភ្នំពេញ។
ពេជ្រ វត្តីសារ៉ាវឌ្ឍី បានបង្ហាញអរម្មណ៍រំភើបយ៉ាងខ្លាំង ដោយនៅក្នុងនោះនាងក៏បានបង្ហោះសារតាមគណនីហ្វេសប៊ុកថា «នាងសូមអរគុណចេញពីចិត្តចំពោះការស្វាគមន៍ដ៏កក់ក្តៅបំផុតរបស់ប្រជាជនកម្ពុជា ចំពោះការវិលត្រឡប់របស់នាងមកកាន់ប្រទេសកម្ពុជាវិញ ។ នាងពិតជាមានមោទនភាពយ៉ាងធំបំផុតដែលទទួលបានការគាំទ្រ និងស្រលាញ់ពីសំណាក់មហាជនកម្ពុជាទាំងមូល។ សមិទ្ធផលដ៏ធំមួយនេះ គឺជារបស់ពួកយើងទាំងអស់គ្នា។ នាងស្រលាញ់អ្នកទាំងអស់គ្នាខ្លាំងបំផុត»៕
ចែករំលែកព័តមាននេះ