រាជធានីភ្នំពេញ ៖ បើទោះបីជាពេលនេះរឿងក្តីលែងលះរវាងលោកសុវណ្ណ មករា និងនាងឈិន សុធារី កំពុងរង់ចាំការសម្រេចពីផ្លូវច្បាប់ក៏ដោយ ប៉ុន្តែសង្គ្រាមពាក្យសម្តីរវាងអ្នកទាំងពីរនៅតែបន្តឥតឈប់តាមហ្វេសប៊ុក ។
កាលពីពេល ថ្មីៗកន្លងមកអ្នកនាងឈិន សុធារី បានបញ្ចេញសារមួយសំដៅទៅលោកសុវណ្ណ មករា ។ សំណេររបស់អ្នកនាងឈិន សុធារី រៀបរាប់ថា«អ្នកឯងកុហកមនុស្សទូទាំងពិភពលោកបាន ប៉ុន្តែអ្នកឯងកុហកខ្លួនឯង និងកុហកទេវតាមិនបានទេ ។ ធ្វើល្អបានល្អ បើធ្វើអាក្រក់គឺនឹងបានផលអាក្រក់ និងជួបបរាជ័យក្នុងជីវិតរហូត ។ ដូចពេលនេះកុហកបោកប្រាស់គេច្រើនពេក ចាញ់អាត្មាខ្លួនហើយ សូមកុំខឹងមេឃ កុំខឹងដី គួរបន្ទោសខ្លួនឯងទើបត្រូវជាង ។
មនុស្សខ្ញុំស្មោះត្រង់ ខ្លួនរបស់ ខ្ញុំៗច្បាស់ណាស់ទោះជាមានខ្យល់ព្យុះភ្លៀងខ្លាំងយ៉ាងណាក៏ខ្ញុំដើរលើផ្លូវស្មោះត្រង់របស់ខ្ញុំដដែល ។ ខ្ញុំមិនរេទៅតាមខ្យល់ព្យុះ ភ្លៀង ហើយក៏គ្មានអ្នកណាឡប់ទៅដេញតាមចាប់ខ្យល់ទេ ។ ធ្លាប់ឆ្កួតចាប់ខ្យល់ហើយ តែចាប់មិនបាន ឥឡូវឈប់ឡប់ហើយចិត្តស្ងប់រយៈពេល៤ឆ្នាំហើយ មិនមែនធ្វើមិនបាន ឬមិនធ្លាប់ធ្វើឯណា ? ធ្វើអស់ហើយតែ អ្វីៗមិនអាចកែប្រែបាន មានតែភាពបោកប្រាស់កុហក…ហើយក៏មិនល្ងង់ និងចាញ់ពាក្យបំប៉ោងរបស់អ្នកតទៅទៀតដែរ ! រូបភាពកុហកក្លែងក្លាយច្រើនពេកហើយ រីឯការអត់ធ្មត់របស់មនុស្សក៏មានកំណត់ ។ មុននឹងគិតអ្វី និយាយអ្វីមួយ សួរថាអ្នកមានខ្មាសខ្លួនឯងដែរឬទេ ? ពិចារណាឡើងវិញ លោកគួរតែទៅរកពេទ្យទៅប្រហែលអាចជួយអ្នកខ្លះពីជំងឺប្រកាច់គ្រប់មុខ ឬកើតបូសមុខមួយរយ» ។
បន្ទាប់ពីសំណេររបស់អ្នកនាងឈិន សុធារី បង្ហោះរួចមក លោកសុវណ្ណ មករា ចូលទៅCommand ថា«ធ្វើជាមនុស្សកុំលោភលន់ពេក» ។
ពាក្យមួយឃ្លានេះត្រូវអ្នកនាង ឈិន សុធារី ឆ្លើយតបវិញ ថា«លោភលន់រឿងអីដែរលោក ចង់សួរលោកបន្តិច ? ឬលោកចង់ឱ្យមហាជនដឹងពីក្រយៅអាក្រក់ និងភាពពិសពុលរបស់លោក ? អ្នកណាជាអ្នកលោភលន់ពិតប្រាកដ ? ទ្រព្យជារបស់ខ្ញុំ លុយក៏ជាញើសឈាមរបស់ខ្ញុំ លោកចង់បាន លោភលន់ចង់យកញើសឈាមរបស់គេហើយ មកចោទម្ចាស់ទ្រព្យគេទៀត ។ សូមសរសើរលោកពិតជាសាហាវហួសការគិតមែន ។ កុំចង់ស ទៅជាខ្មៅឱ្យសោះ ប្រយ័ត្នខ្ញុំមិនទុកមុខឱ្យ» ។
ការវាយបករបស់ឈិន សុធារី នេះមិនត្រូវលោកសុវណ្ណ មករា ឆ្លើយតបវិញទេ ប៉ុន្តែនៅលើហ្វេសប៊ុករបស់លោកបានបង្ហោះសារបែបបញ្ឆិតបញ្ឆៀងថា«ធ្វើល្អបានល្អ ធ្វើអាក្រក់ បានលុយ ហើយអ្នកនឹងឈ្នះរហូត ដោយសារហេតុអី គឺអ្នកវ៉ៃតែម្នាក់ឯង ហើយឈ្នះតែខ្លួនឯង ត្រូវធ្វើចិត្តឱ្យស្ងប់ ហើយត្រូវរង់ចាំមើលថា ខ្យល់បក់នៅពេលណា ហើយរេទៅកន្លែងណា ហើយចាប់ខ្យល់នោះឱ្យជាប់ តែខ្ញុំគិតថាអ្នកមិនអាចចាប់វាបានទេ ដោយសារអី ? ទី១ គឺអ្នកស្គាល់ខ្លួនឯងមិនច្បាស់ ហើយរឹតតែស្គាល់សត្រូវមិនច្បាស់ទៀត ហើយអ្នកនឹងត្រូវបរាជ័យដោយសារខ្លួនឯង» ៕
ចែករំលែកព័តមាននេះ