គ្រប់គ្នាដែលនិយមតាមដានទស្សនានៅខ្សែភាពយន្តរឿងភាគថៃជាច្រើនមិនថាតារាសម្ដែងប្រុស មិនថាតារាសម្ដែងស្រីនោះទេ ប្រាកដជាស្គាល់ជាក់ជាមិនខាននោះឡើយ បើនិយាយទៅដល់តារាសម្ដែងប្រុសមានវ័យ៣២ឆ្នាំមួយរូប ដែលមានសន្ទុះនៃការគាំទ្រមិនធម្មតាតាមរយៈស្នាដៃដ៏ល្អឯកប្រចាំប៉ុស្តិ៍
ប្រទេសថៃ ៖ គ្រប់គ្នាដែលនិយមតាមដានទស្សនានៅខ្សែភាពយន្តរឿងភាគថៃជាច្រើនមិនថាតារាសម្ដែងប្រុស មិនថាតារាសម្ដែងស្រីនោះទេ ប្រាកដជាស្គាល់ជាក់ជាមិនខាននោះឡើយ បើនិយាយទៅដល់តារាសម្ដែងប្រុសមានវ័យ៣២ឆ្នាំមួយរូប ដែលមានសន្ទុះនៃការគាំទ្រមិនធម្មតាតាមរយៈស្នាដៃដ៏ល្អឯកប្រចាំប៉ុស្តិ៍ One31 នោះ គឺលោក Gun Naphat ដែលជាតារាសម្ដែង ក៏ដូចជាតារាចម្រៀងសំឡេងផ្អែមស្រទន់គួរអោយទាក់ទាញ មុខមាត់មានមន្តស្នេហ៍មួយរូប កំពុងតែទាក់ចិត្តស្រីៗជាច្រើនអោយធ្លាក់ក្នុងអន្លង់ស្នេហ៍លោកគ្រប់ៗគ្នាតែម្ដង។
ដោយឡែក បើក្រឡេកមកដឹងឃើញថា ប៉ុន្មានថ្ងៃមកនេះ គេហាក់ដូចជាមិនសូវឃើញលោកលេចមុខនៅក្នុងកម្មវិធីទៀតនោះទេ គឺបាត់មុខឈឹងរហូតអ្នកគាំទ្រនាំគ្នាលើកឡើងយ៉ាងដូច្នេះថា ប្រហែលជាតារាប្រុសរូបនេះ កំពុងតែមានរឿងអ្វីកើតឡើងហើយ បានជាមិនឃើញចេញមុខមកអញ្ជឹងនោះ។
បន្ទាប់ពីស្ងប់ស្ងាត់បានមុខមួយរយៈក្រោយមក ស្រាប់តែកាលពីពេលថ្មីៗនេះ កំពូលតារាសម្ដែង ក៏ដូចជាចម្រៀង លោក Gun Napat បែរជាត្រូវទទួលរងនៅការរិះគន់គ្មានសំចៃមាត់ពីសំណាក់អ្នកប្រើប្រាស់បណ្ដាញសង្គមទៅវិញ។ ក្រោយតារាប្រុសរូបនេះ លោកបានចេញមុខមកបង្ហោះសារប៉ុន្មានឃ្លានៅលើគណនី IG របស់ខ្លួន ផ្ទាល់បែបនេះថា «ឯកាណាស់បាទ ចូលមកញ៉ែខ្ញុំខ្លះមកបាទ តើបានទេ? សំណប់ចិត្តសំណប់បេះដូងរបស់ខ្ញុំអើយ ប្រហែលជាមិនមានអ្នកពេញចិត្តខ្ញុំសោះឡើយឬ? មានតែអ្នកថាខ្ញុំជាមនុស្សអាក្រក់ មុខមាត់ចាស់ សាកញ៉ែខ្ញុំតិចៗក៏បានដែរ ហេតុអ្វីឆ្នាំនេះឯកាម្ល៉េះ? ខ្ញុំចង់អោយនរណាម្នាក់ទៅជាមួយខ្ញុំនៅចុងឆ្នាំ»។
មិនបង្អង់យូរ គ្រាន់តែបានឃើញលោកបង្ហោះសារអញ្ជឹងរួចមក គេក៏បាននាំគ្នាសង្កេតឃើញថា មានមហាជនមួយចំនួនហាក់ដូចជាមិនពេញចិត្ត និងខឹងសម្បាជាខ្លាំង ហើយក៏បានចូលទៅខមិនបញ្ចេញមតិដាក់ទៅលោកផាំងៗទៅកាន់តារាប្រុសរូបនេះ ដោយពួកគេបានលើកឡើងថា «ម៉េចក៏មិនទៅញ៉ែគេទៅ ខ្លួនជាប្រុសដេកចាំអោយគេខាងស្រីមកញ៉ែឬក៏យ៉ាងមិច» «ពេលមានសង្សារមិនចេះថែទេ ដល់ពេលបែកគ្នានៅម្នាក់ឯង គ្មានអ្នកស្រលាញ់បានបង្ហោះសារប្រកាសចង់មានស្នេហ៍»។ អ្នកខ្លះទៀតបាននិយាយថា «កុំទៅខ្វល់នឹងមាត់របស់គេដែលបានរិះគន់យើងអី ដែលគេជេរនេះ ក៏ព្រោះតែគេស្អប់ឯង តាំងពីរឿងទាក់ទងគ្នាជាមួយតារាស្រីវ័យក្មេង កញ្ញា Marie មកម្ល៉េះ»។
មួយចំនួនឯទៀតបានលើកឡើងបែបនេះថា «ហេតុអ្វីមើលទៅដូចជាចាស់យ៉ាងនេះ មិនចេះតុបតែងខ្លួនឬក៏យ៉ាងមិច?» «រៀបចំខ្លួនបន្តិចទៅ ជាតារាផង ម្ដេចក៏បណ្ដោយខ្លួនបែបនេះទៅវិញ» «មាត់និយាយថាឯកា តែក្នុងចិត្តដើរញ៉ែអ្នកនេះអ្នកនោះមិនឈប់ ជាមនុស្សប្រុសចូលចិត្តអ្នកណាក៏ញ៉ែអ្នកនឹងទៅច្បាស់ៗបន្តិចទៅ នៅចាំឱ្យអ្នកណាចូលទៅរកទៀត បើគេមិនពេញចិត្តមិនព្រមបើកបេះដូងអោយចាំគិតទៀត» «មិនដឹងថាមើលឃើញសង្ហាត្រង់ណាទេ ខ្ញុំមានអារម្មណ៍ថា មុខមាត់ដូចចាស់ដល់ហើយអីឡូវ»។
សូមរំលឹកផងដែរថា កាលពីកន្លងទៅនេះ តារាប្រុសរូបនេះ ចាប់តាំងតែចេះមានស្នេហារហូតមកដល់អីឡូវ បើនិយាយពីជីវិតស្នេហារបស់លោកវិញ ជារឿយៗលោក Gun Napat មិនដែលបានសមបំណងដូចគូស្នេហ៍តារាប្រុសស្រីដទៃៗដែលស្រលាញ់គ្នាតាំងពីថ្ងៃចាប់ផ្ដើម រហូតបន្តជាមួយគ្នាបានរៀបការនោះទេ។ បែបនេះហើយបានជាធ្វើអោយលោកមានអារម្មណ៍ថាឯកា គ្មានអ្នកនៅក្បែរចាំជួយលើកទឹកចិត្ត និយាយពាក្យល្អៗ និងកម្លាំងចិត្តដូចគូស្នេហ៍គេនោះទេ ដោយក្នុងនោះគេហាក់សង្កេតឃើញថា តារាប្រុស Gun Napat ហាក់មិនជោគជ័យនិងសមប្រកបដូចអាជីពសិល្បៈសម្ដែងនោះឡើយ ។
គួរបញ្ជាក់ផងដែរថា Gun Napat Injaieua គឺជាតារាចម្រៀង និងជាតារាចម្រៀងប៉ុបរ៉ក់ មានស្រុកកំណើតនៅខេត្ត Suphanburi នៃប្រទេសថៃ។ លោកគឺជាម្ចាស់ជ័យលាភីក្នុងកម្មវិធី The Star រដូវកាលទី៦ ដែលជាកម្មវិធីប្រកួតប្រជែងច្រៀងតាមទូរទស្សន៍មួយ។ ដោយកាលពីកន្លងទៅខែមករា ឆ្នាំ២០២២ លោកបានបែកបាក់គ្នាជាមួយតារាស្រីស្រស់ស្អាតមួយរូបនោះ គឺកញ្ញា Marie Broenner មូលហេតុដែលអ្នកទាំងពីរសម្រេចចិត្តដើរដល់ផ្លូវបំបែកនេះដែរ ព្រោះតែមិនចុះសម្រុងគ្នា ដោយមានព័ត៌មានអាស្រូវជាច្រើនរាប់មិនអស់ដល់ថ្នាក់ធ្វើឱ្យលោកទទួលរងនៅការរិះគន់យ៉ាងចាស់ដៃពីសំណាក់មហាជន ជាពិសេសអ្នកគាំទ្ររបស់តារាស្រីកញ្ញា Marie តែម្ដង៕
ចែករំលែកព័តមាននេះ