អ្នកគាំទ្រសម្ដែងការភ្ញាក់ផ្អើល និងចាប់អារម្មណ៍ជាខ្លាំង ក្រោយឃើញស្រីស្អាតរូបស្រស់ បេនី យ៉ាំង បង្ហោះរូបភាពយ៉ាងស្និទ្ធស្នាលជាមួយបុរសម្នាក់ រួចពោលថា
រាជធានីភ្នំពេញ ៖ អ្នកគាំទ្រសម្ដែងការភ្ញាក់ផ្អើល និងចាប់អារម្មណ៍ជាខ្លាំង ក្រោយឃើញស្រីស្អាតរូបស្រស់ បេនី យ៉ាំង បង្ហោះរូបភាពយ៉ាងស្និទ្ធស្នាលជាមួយបុរសម្នាក់ រួចពោលថា «ចោលគ្រាប់ពេជ្ររើសដុំថ្ម» ដែលការបង្ហោះរូបអមជាមួយសំណេរនេះ ធ្វើឲ្យអ្នកគាំទ្រផ្ទុះការសង្ស័យថា បេនីយ៉ាំង និងបុរសសង្ហាខាងលើ មានទំនាក់ទំនងពិសេស។
ប្រាកដណាស់ កាលពីកន្លងនេះ អតីតតារាសម្ដែងស្រីដ៏ល្បីឈ្មោះ បេនីយ៉ាំង បានចែកផ្លូវគ្នាជាមួយអតីតគូស្នេហ៍ ខណៈបច្ចុប្បន្ននេះ អ្នកនាងមានកូនម្នាក់ឃ្យូតគួរឲ្យស្រលាញ់បាត់ទៅហើយ។ ជារឿយៗអតីតតារាសម្ដែងស្រីរូបនេះ តែងតែបង្ហោះរូបភាពកូនរបស់ខ្លួនជារឿយៗនៅលើបណ្ដាញសង្គមពោរពេញដោយសេចក្ដីសុខ និងសុភមង្គល ត្បិតថានាងនិងគូស្នេហ៍បានចែកផ្លូវគ្នាហើយក្ដី។
មួយវិញទៀត គិតមកទល់នឹងពេលនេះ កូនរបស់អ្នកនាងធំល្មមគួរសម អាចក្រឡាប់បាន និងថ្លោសគួរអោយស្រលាញ់ខ្លាំងណាស់។ អ្នកនាង បេនីយ៉ាំង បានបង្ហាញភាពជាម្ដាយពេញលេញមើលថែកូនរបស់ខ្លួនបានយ៉ាងល្អ ទោះបីគ្មានវត្តមានអតីតគូស្នេហ៍ក្ដី។ ភាពរឹងមាំដែលមហាជនកត់សម្គាល់ឃើញ ចំពោះអ្នកម្ដាយវ័យក្មេងរូបនេះ គឺអង់អាចក្លាហានមិនទន់ជ្រាយ មិនចុះចាញ់ គឺតស៊ូជំនះរាល់ឧបសគ្គទាំងអស់។
យ៉ាងណាមិញ ទោះមានកូនមួយក៏ពិតមែន តែអ្នកម៉ាក់វ័យក្មេង បេនីយ៉ាំង ពីមួយថ្ងៃទៅមួយថ្ងៃ លេងស្តាយតុបតែងខ្លួនមិនអោយចាញ់ក្រមុំៗឡើយ ដោយអ្នកនាងរស់នៅជាមួយភាពស៊ីវីល័យហាយសូរ ប្រើប្រាស់របស់សុទ្ធតែប្រេនៗល្អៗ ធ្វើអោយកំលោះៗជាច្រើនចោមរោមសុំស្នេហ៍ ធ្លាក់ក្នុងអន្លង់ស្នេហ៍ភ្លូកទឹកភ្លូកដីតែម្ដង។
ដោយឡែក កាលពីថ្ងៃទី២៧ ខែកញ្ញា ឆ្នាំ២០២២ ម្សិលមិញនេះ អ្នកគាំទ្រ និងមហាជនដែលស្រលាញ់ចូលចិត្តអ្នកនាងសម្ដែងការភ្ញាក់ផ្អើល និងដាក់ការសង្ស័យថា អ្នកនាងមានគូស្នេហ៍ថ្មី ក្រោយឃើញ បេនីយ៉ាំង បង្ហាញមុខបុរសសង្ហាម្នាក់លើបណ្ដាញសង្គម តាមរយៈការបង្ហោះរូបភាពជាច្រើនសន្លឹកយ៉ាងស្និទ្ធស្នាលចជាគូស្នេហ៍ ដើរលេងកំសាន្តលំហែកាយជាមួយគ្នាក៏ដូចជាដើរ Shopping ក្នុងផ្សារទំនើបជាមួយគ្នាផងដែរ។
ក្នុងការបង្ហោះរូបភាពជាច្រើនសន្លឹកជាមួយគ្នានេះ អ្នកនាងក៏បានភ្ជាប់មកជាមួយសំណេរដ៏ចាក់ដោតមួយឃ្លា ដោយបង្ហាញអារម្មណ៍ស្ដាយក្រោយថា «ពេលបានជួបមនុស្សល្អ បែរជាខ្ញុំមានអារម្មណ៍ថា ខ្ញុំមិនល្អគ្រប់គ្រាន់ ពេលដែលខ្ញុំបានធ្វើល្អសឹងតែគ្រប់យ៉ាង បែរជាខ្ញុំជួបមនុស្សមិនល្អទៅវិញ ចោលគ្រាប់ពេជ្ររើសដុំថ្ម»។
អ្នកនាងបានបន្តថា «អរគុណដែលតែងតែមើលខ្ញុំពីចម្ងាយ ពេលខ្ញុំសប្បាយចិត្ត អរគុណដែលនៅក្បែរខ្ញុំ ពេលខ្ញុំមានបញ្ហា #8year memories»។
ថ្វីត្បិតតែអ្នកនាង បេនី យ៉ាំង មិនបានបញ្ជាក់ថា បុរសតែងតែនៅក្បែរខ្លួននេះជានរណាក៏ដោយ ប៉ុន្ដែបើមើលតាមភាពស្និទ្ធស្នាលរបស់ពួកគេទាំងពីរ ធ្វើឱ្យអ្នកគាំទ្រជាច្រើនយល់ថាអ្នកទាំងពីរពិតជាស័ក្ដិសមគ្នាណាស់ ហើយតែងតែនៅក្បែរគ្នា មើលថែគ្នា យ៉ាងមានក្ដីសុខ និង ស្នាមញញឹមតែម្ដង។
ការបង្ហោះរូបភាពទាំងនេះ ក៏ត្រូវបានមហាជនជាច្រើនលើកឡើងថា «អីយ៉ា អ្នកម៉ាក់សម័យថ្មី សង្ស័យបានជួបដៃគូថ្មីហើយមើលទៅ» ខ្លះលើកឡើងថា «សាកសមគ្នាណាស់បង ជូនពរបងទាំងពីរនាក់មានសេចក្ដីសុខ សុភមង្គលជាមួយគ្នាជារៀងរហូតណា» ។ ខ្លះទៀតលើកឡើងបន្តថា «ស្ងាត់ៗបង្ហាញជាសារធារណៈយ៉ាងស្និទ្ធស្នាល និងផ្អែមល្ហែមតែម្ដង អ្នកម៉ាក់វ័យក្មេង» ក្នុងការបញ្ចេញមតិទាំងអស់នោះ សុទ្ធតែជាខមិនល្អៗ និងមានការលើកទឹកចិត្តដល់អ្នកនាងដែលយើងមិនអាចរៀបតរាប់អស់បានឡើយ។
គួររំលឹកថា កាលពីកន្លងទៅ អ្នកនាង បេនីយ៉ាំង ក៏ធ្លាប់ចែកផ្លូវគ្នាជាមួយអតីតគូស្នេហ៍ជាច្រើនលើកច្រើនសារមកហើយដែរ តែក្រោយមកក៏ត្រូវរ៉ូវគ្នាវិញ ខណៈមួយរយៈចុងក្រោយមកនេះ អ្នកនាងក៏បានចែកផ្លូវគ្នាសារជាថ្មី ហើយក៏គ្មានដំណឹងត្រូវរ៉ូវគ្នាវិញឡើយ ខណៈពេលនេះ អ្នកនាងក៏បានបង្ហាញមុខមាត់បុរសសង្ហាម្នាក់ ដែលត្រូវបានអ្នកលេងបណ្ដាញសង្គមដាក់ការសង្ស័យថា អាចជាដៃគូថ្មីរបស់នាងផងដែរ និងមានការជំរុញលើកទឹកចិត្តជាច្រើនអោយអ្នកទាំងពីរទាក់ទងគ្នាផងដែរ។
ទោះជាយ៉ាងណាក៏ដោយ យើងនៅមិនអាចទាន់ទាក់ទង់អ្នកនាង បេនីយ៉ាំង ដើម្បីសុំការបកស្រាយបាននៅឡើយទេថា តើអ្នកនាងនិងបុរសសង្ហាខាងលើនេះ ត្រូវជាអ្វីនឹងគ្នាអោយប្រាកដនោះឡើយ?។
ចែករំលែកព័តមាននេះ