រាជធានី​ភ្នំពេញ ៖ បើទោះជាការប្រកួតប្រជែងនៅក្នុងកម្មវិធីប្រឡងចម្រៀងលំដាប់ថ្នាក់ពិភពលោក Cambodian Idol រដូវកាលទី ៤ បានបញ្ចប់ទៅហើយក្តី និងបានរកឃើញម្ចាស់ពានរង្វាន់ជ័យលាភីបានទៅលើកម្លោះតូច លីម តិចម៉េង។  តែកម្មវិធីខាងលើនេះ ក៏នៅតែជាប្រធានបទក្តៅគគុកក្នុងការចែករំលែកព្រោងព្រាតនៅលើបណ្តាញសង្គមឥតឈប់ឈរ ជាពិសេសនោះ រដូវកាលនេះបានបំបែកកំណត់ត្រា ដែលកម្មវិធី Cambodian Idol រដូវកាលទី ៤ មានអ្នកទស្សនាការ Live តាមរយៈហ្វេសប៊ុកកាលពីរាត្រីថ្ងៃទី ២៨ ខែសីហា ឆ្នាំ ២០២២ ដល់ទៅជាងកន្លះលាននាក់ឯណោះ។

តែអ្វីដែលកាន់តែកក្រើកក្រោយការរកឃើញម្ចាស់ពានរង្វាន់ទើបបញ្ចប់ទៅក្តៅៗសោះ ស្រាប់តែមានរឿងថ្មីផ្ទុះកក្រើកពាក់ព័ន្ធម្ចាស់ពានរង្វាន់កាលពីរដូវកាលមុនៗមកជាប់ជំពាក់ផងដែរ។ នោះគឺរឿងដែលគេបានប្រទេះឃើញភាពចៃដន្យមួយបានកើតឡើងស្ទើរតែមិនចង់ជឿ ដោយត្រូវបានមហាជនអ្នកគាំទ្រជាច្រើនភ្លូកទឹកភ្លូកដីនាំគ្នាសម្តែងការចាប់អារម្មណ៍យ៉ាងខ្លាំង និងមានការចែករំលែកតៗគ្នាព្រោងព្រៀតពាសពេញបណ្ដាញសង្គមតែម្ដង ពាក់ព័ន្ធទៅនឹងម្ចាស់ជ័យលាភី ៣ នៃកម្មវិធីប្រឡងចម្រៀងមកពីរដូវកាលផ្សេងៗគ្នានោះ គឺ ១. លោក នី រតនា បានក្លាយជាម្ចាស់ពាននៅឆ្នាំ ២០១៥ នៃកម្មវិធីប្រឡងចម្រៀង Cambodian Idol រដូវកាលទី១ របស់ទូរទស្សន៍ហង្សមាស។ បន្ទាប់ពីរូបគេបានទទួលសារគាំទ្រច្រើនបេក្ខជនពីរនាក់ទៀតគឺ ម៉ៅ ហាជី និងលោក សៅ ឧត្តម នៅវគ្គផ្តាច់ព្រ័ត្រនារាត្រីថ្ងៃអាទិត្យទី១ខែវិច្ឆិកាដោយមានលោកខៀវ កាញារីទ្ធរដ្ឋមន្ត្រីក្រសួងព័ត៌មានចូលរួមធ្វើជាអធិបតីភាព។ ទី ២. គឺកញ្ញា ឈិន ម៉ានិច្ច គឺជាតារាចម្រៀងស្រីមានភាពល្បីល្បាញសំនៀងផ្អែមមុត បានក្លាយជាម្ចាស់ពានរង្វាន់នៃ កម្មវិធីCambodian Idol រដូវកាលទី២ កាលពីរាត្រីថ្ងៃ អាទិត្យទី ២៥ ខែធ្នូ ឆ្នាំ២០១៦កន្លងទៅ ដោយកញ្ញា ឈិន ម៉ានិច្ច រូបនេះមកពីខេត្តកំពង់ស្ពឺ បានក្លាយជាម្ចាស់ ពានពីការប្រកួតមួយនេះ មិនតែប៉ុណ្ណោះជ័យជម្នះរបស់នាងមានការភ្ញាក់ផ្អើលយ៉ាងខ្លាំងគ្រប់ស្រទាប់យុវវ័យដោយសារតែនាង បានចេញមុខមកប្រកាសថា ខ្លួនទើបតែធ្លាក់ពីការប្រលង The Voice រដូវកាលទី១ ហើយមិននឹកស្មានថាខ្លួនអាចមានឱកាស និងវាសនាខ្ពស់កាន់ពាននៅលើឆាកដ៏ធំមួយនេះ។ និងទី៣នោះ គឺ កម្លោះតូច លីម តិចម៉េង ដែលជាបេក្ខជនប្រឡងចម្រៀង Cambodian Idol រដូវកាលទី ៤ ដែលបេក្ខជនវ័យក្មេងនេះឆក់យកបេះដូងក្រមុំៗមិនតិចនាក់ ក៏បានក្លាយជាម្ចាស់ជ័យលាភី បន្ទាប់ពីរូបគេទទួលបាននៅការគាំទ្រច្រើន ពីបេក្ខជន៣នាក់ទៀត គឺនាង ដាវីន ថុល សុភិទិ និង ស៊ឹម ច័ន្ធពន្លឺ។

អ្វីដែលបងប្អូនប្រើប្រាស់បណ្តាញសង្គម និងអ្នកគាំទ្រ មានការចាប់អារម្មណ៍និងបងប្អូនខ្លះ បង្ហាញអារម្មណ៍ស្រឡាំងកាំង បើកភ្នែកធំមិនចង់ជឿទៅវិញនោះ គឺវាហាក់ដូចជា រឿងដែលចៃដន្យពេក ដោយគេសង្កេតឃើញម្ចាស់ពានរង្វាន់ Cambodian Idol ៣រដូវកាលផ្សេងៗគ្នា បែរជាពាក់ចិញ្ជៀនមួយដូចគ្នា គឺចិញ្ជៀនត្បូងពណ៌ខ្មៅ។ អ្នកគាំទ្រនាំគ្នាសង្កេតឃើញដោយម្នាក់ៗបានលើកឡើងថា «ម្ចាស់ពាន៣រដូវកាលដ៏កក្រើកពិភពលោកខាងលើនេះ មានពាក់ចិញ្ចៀនត្បូងខ្មៅដូចគ្នាទាំង៣ ហើយម្នាក់ៗសុទ្ធសឹងតែជាម្ចាស់ជ័យលាភីដែលបានឈ្នះពានរង្វាន់ពីកម្មវិធីថែមទៀតផង។

តែយ៉ាងណាមិញ វាអាចជាភាពចៃដន្យ ព្រោះអ្នកទាំងបី ទាំងលោក សុទ្ធតែជាមនុស្សមានទេពកោសល្យ និងសមត្ថភាពខ្លាំងក្នុងការប្រើប្រាស់សម្លេងច្រៀង ហើយសម្លេងរបស់អ្នកទាំង ៣ គឺ លោក នី រតនា កញ្ញា កញ្ញា ឈិន ម៉ានិច្ច និងកម្លោះតូច លីម តិចម៉េង ដែលជាម្ចាស់ជ័យលាភីនៃការប្រឡងចម្រៀងលំដាប់ថ្នាក់អន្តរជាតិ សុទ្ធតែមានទឹកដមសម្លេងពិរោះក្រអួនក្រអៅ និងមានសមត្ថភាពបកស្រាយចម្រៀងទាំងណោតខ្ពស់និងណោតទាបបានយ៉ាងល្អបំផុត។ រឿងជំនឿ ថាពាក់ចិញ្ជៀនខ្មៅ នាំសំណាងឱ្យឈ្នះពានរង្វាន់ គឺគ្រាន់តែជាជំនឿមួយផ្នែកតែប៉ុណ្ណោះ ព្រោះគេសង្កេតឃើញមានបេក្ខជនប្រឡងចម្រៀងផ្សេងទៀត ក៏មានពាក់ចិញ្ជៀនដូចគ្នានេះផងដែរ។ ដូច្នេះជារួម គ្រប់យ៉ាងគឺពិតលើសមត្ថភាពពិតៗនិងប្រជាប្រិយភាព តួយ៉ាងការសិក្សាអប់រំក៏ដូចគ្នា «បើចេះគឺប្រឡងជាប់»៕