ខេត្តកែប៖ គណៈកម្មាធិការជាតិគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជា(គ.អ.ឆ.ក) នៅថ្ងៃទី៣០ ខែឧសភា ឆ្នាំ២០២២ នេះ បានរៀបចំសិក្ខាសាលាផ្សព្វផ្សាយពីបទដ្ឋានគតិយុត្តិនានា ក្នុងការគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា។ សិក្ខាសាលានេះ បានរៀបចំនៅសាលប្រជុំធំនៃខេត្តកែប ក្រោមវត្តមានលោក ថោង ខុន រដ្ឋមន្ត្រីក្រសួងទេសចរណ៍ អនុប្រធានអចិន្ត្រៃយ៍ គ.អ.ឆ.ក រួមទាំងអភិបាលខេត្តកែប ខេត្តកំពត ខេត្តព្រះសីហនុ និងខេត្តកោះកុង។
លោក ថោង ខុន រដ្ឋមន្ត្រីក្រសួងទេសចរណ៍ បានរម្លឹកទ្បើងវិញ អំពីសាវតានៃយន្តការគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា។
លោកថា ដោយពិនិត្យ និងវាយតម្លៃឃើញពីភាពចាំបាច់ក្នុងការអភិរក្ស និងជំរុញកំណើនសេដ្ឋកិច្ច និងទេសចរណ៍នៅតំបន់ឆ្នេរសមុទ្រកម្ពុជា ក្រសួងទេសចរណ៍បានចងក្រង និងរៀបចំឯកសារបច្ចេកទេសដើម្បីស្នើដាក់បញ្ចូលបេក្ខភាពតំបន់ឆ្នេរសមុទ្រកម្ពុជា ទៅក្នុងក្លឹបឆ្នេរសមុទ្រ ដែលស្អាតបំផុតលើសាកលលោកកាល ក្នុងឆ្នាំ២០០៩ និងទទួលស្គាល់ជាបេក្ខភាព ក្នុងឆ្នាំ២០១០។
លោកបន្តថា ដោយសារភាពទោល (Uniqueness) នៃសក្តានុពលទេសចរណ៍តំបន់ឆ្នេរ ដែលសម្បូរទៅដោយធនធានធម្មជាតិ ប្រព័ន្ធអេកូឡូស៊ី ជីវៈចំរុះដ៏សំបូរបែបនានា ទាំងក្នុងទឹកសមុទ្រ និងលើគោក ខេត្តទាំងបួននៃតំបន់ឆ្នេរសមុទ្រកម្ពុជា រួមមាន ខេត្តកែប ខេត្តព្រះសីហនុ ខេត្តកោះកុង និងខេត្តកំពត ត្រូវបានដាក់បញ្ចូលទៅជាសមាជិកក្លឹបឆ្នេរសមុទ្រ ដែលស្អាតជាងគេបំផុតលើសកលលោក កាលពីថ្ងៃទី២៥ ខែឧសភា ឆ្នាំ២០១១ នៅប្រទេសសេនេហ្គាល ក្រោមឈ្មោះរួមតែមួយ គឺឆ្នេរសមុទ្រកម្ពុជា (Cambodia Bay) និងត្រូវបានប្រសិទ្ធនាមថា ឆ្នេរសមុទ្រកម្ពុជា “តារារៈ នាទិសនិរតី”។
លោកបញ្ជាក់បន្ថែមថា ការបញ្ចូលជាសមាជិកក្លឹបឆ្នេរនេះ ខេត្តនិមួយៗ មានឡូហ្គូដោយឡែកៗពីគ្នា និងការអភិវឌ្ឍឆ្នេរត្រូវគោរពតាមគោលការណ៍ លក្ខខណ្ឌ និងសូចនាករ ដែលបានដាក់ចេញដោយក្លឹបឆ្នេរសមុទ្រដែលស្អាតបំផុតលើសកលលោក។
លោកអនុប្រធានអចិន្ត្រៃយ័ គ.អ.ឆ.ក ក៏បានថ្លែងឲ្យដឹងអំពីលក្ខខណ្ឌតម្រូវនៃសមាជិកភាពរបស់ក្លឹបឆ្នេរសមុទ្រ ដែលស្អាតជាងគេបំផុតលើសាកលលោកផងដែរ នោះគឺការគ្រប់គ្រងធនធានធម្មជាតិ និងការធានានូវចីរភាពនៃការអភិវឌ្ឍ ដោយមានយន្តការគ្រប់គ្រងច្បាស់លាស់។ ឆ្លើយតបទៅនឹងលក្ខ័ណ្ឌនេះ គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា (គ.អ.ឆ.ក) ដែលជាយន្តការអន្តរក្រសួងមួយ ត្រូវបានបង្កើតឡើងដោយព្រះរាជក្រឹត្យលេខនស/រកត/០២១២/០៧៩ ចុះថ្ងៃទី១៦ ខែកុម្ភៈ ឆ្នាំ២០១២ ដើម្បីធានាដល់ការគ្រប់គ្រងធនធានធម្មជាតិតំបន់ឆ្នេរ ប្រកបដោយប្រសិទ្ធភាព និងការអភិវឌ្ឍប្រកដោយចីរភាព ទាំងទិដ្ឋភាពទេសចរណ៍ បរិស្ថាន នគរូបនីយកម្ម និងសង្គម។
លោកបន្ថែមទៀតថា ស្របជាមួយគ្នានោះ ពិធីបុណ្យសមុទ្រត្រូវបានបង្កើតឡើង ដើម្បីធ្វើការផ្សព្វផ្សាយនិងជម្រុញវិស័យទេសចរណ៍តំបន់ឆ្នេរសមុទ្រកម្ពុជា ដោយយកខេត្តតំបន់ឆ្នេរធ្វើជាម្ចាស់ផ្ទះវិលជុំរៀបចំ៤ឆ្នាំម្តង ហើយឆ្នាំនេះគឺជាជុំទី៤ ដែលនឹងត្រូវរៀបចំឡើងនាខែធ្នូ ឆ្នាំ២០២២ នៅខេត្តព្រះសីហនុ អមដោយការរៀបចំមហាសន្និបាតក្លឹបឆ្នេរសមុទ្រដែលស្អាតបំផុតលើសាកលលោក ដែលកម្ពុជាទទួលបានសិទ្ធធ្វើជាម្ចាស់ផ្ទះ។ ប៉ុន្តែជាគោលការណ៍ និងជាលក្ខណ្ឌនៃក្លឹបឆ្នេរសមុទ្រ ដែលសម្អាតជាងគេបំផុតលើសាកលលោក ប្រសិនបើសមាជិកឆ្នេរណាមួយ មានការធ្វេសប្រហែសពុំបានគ្រប់គ្រងតំបន់ឆ្នេរ របស់ខ្លួនបានល្អនោះទេ ពិសេសការបំពុលបរិស្ថាន និងជីវចម្រុះ សមាជិកភាពនឹងត្រូវបញ្ចប់។
លោក ថោង ខុន បានថ្លែងបញ្ជាក់ថា ក្រោយចូលជាសមាជិកក្លឹបឆ្នេរសមុទ្រ ដែលស្អាតជាងគេបំផុតលើសាកលលោក និងការរៀបចំពិធីបុណ្យសមុទ្រប្រកបដោយជោគជ័យជាបន្តបន្ទាប់ តំបន់ឆ្នេរសមុទ្រកម្ពុជាមានការរីកចម្រើនយ៉ាងឆាប់រហ័សលើគ្រប់វិស័យ។ ជាក់ស្តែង ក្នុងឆ្នាំ២០១៩ តំបន់ឆ្នេរសមុទ្រកម្ពុជា ទទួលបានទេសចរអន្តរជាតិមក កម្សាន្តមានចំនួនសរុប ១លាន ២សែននាក់ កើនឡើង ៣៧.៣% បើធៀបនឹងឆ្នាំ២០១៨ និងភ្ញៀវទេសចរជាតិមកកម្សាន្តក្នុងឆ្នាំ២០១៩ មានចំនួនសរុប ៣លាន ២សែននាក់។
លោកថា ដើម្បីធានាអោយបាននូវនិរន្តភាពនៃកំណើនសេដ្ឋកិច្ចទេសចរណ៍ឥតឈប់ឈរ នៅតំបន់ឆ្នេរសមុទ្រ រដ្ឋាភិបាលបានដាក់ចេញនូវបទដ្ឋានគតិយុត្តជាច្រើន រួមមាន សារាចរណែនាំលេខ០១ សរណន ចុះថ្ងៃទី២០ ខែកុម្ភៈ ឆ្នាំ២០១២ ស្តីពី ការអភិវឌ្ឍតំបន់ឆ្នេរសមុទ្រនៃព្រះរាជាណាចក្រកម្ពុជា គោលការណ៍ណែនាំ ស្តីពី ការអភិវឌ្ឍរមណីយដ្ឋានឆ្នេរ គោលការណ៍ណែនាំស្តីពីការគ្រប់គ្រងឆ្នេរខ្សាច់កម្សាន្ត និងបទដ្ឋានគតិជាច្រើនទៀត។
ប៉ុន្តែចាប់តាំងពីដើមឆ្នាំ២០២០មក ស្ថានភាពពិភពលោកបានដើរដល់របត់ថ្មីមួយ ដែលបណ្ដាលមកពីការរាតត្បាតជាសកលនៃជំងឺកូវីដ-១៩ ខណនៅក្នុងឆ្នាំ២០២០ ទេសចរតំបន់ឆ្នេរសមុទ្រកម្ពុជាធ្លាក់ចុះ ដោយទទួលបាន ទេសចរអន្តរជាតិមក កម្សាន្តមានចំនួនសរុប ៣៥៦,៨៦៣ នាក់ ថយចុះ ៧០.៤% បើធៀបនឹងឆ្នាំ២០១៩ មានចំនួនសរុប ១,២០៤,៣៧៤ នាក់។ ចំណែក ទេសចរជាតិមក កម្សាន្តមានចំនួនសរុប ២,៨៧៣,៤៨៣ នាក់ ថយចុះ ៩.៥% បើធៀបនឹងឆ្នាំ២០២០ មានចំនួនសរុប ៣,១៧៥,៧៨០នាក់។
ដោយទ្បែកនៅក្នុងឆ្នាំ២០២១ ទេសចរតំបន់ឆ្នេរសមុទ្រកម្ពុជាធ្លាក់ចុះ ដោយទទួលបាន ទេសចរអន្តរជាតិមក កម្សាន្តមានចំនួនសរុប ១០៥,៨៩២ នាក់ ថយចុះ ៧០.៣% បើធៀបនឹងឆ្នាំ២០២០ មានចំនួនសរុប ៣៥៦,៨៦៣នាក់ ។ ទេសចរជាតិមក កម្សាន្តមានចំនួនសរុប ២,០៥០,៨៦៥នាក់ ថយចុះ ២៨.៦% បើធៀបនឹងឆ្នាំ២០២០ មានចំនួនសរុប ២,៨៧៣,៤៨៣នាក់។
ដើម្បីលើកស្ទួយវិស័យសេដ្ឋកិច្ច សង្គម និងទេសចរណ៍ រាជរដ្ឋាភិបាល បាន និងកំពុងដាក់ចេញជាបន្ដបន្ទាប់នូវគោលនយោបាយ យុទ្ធសាស្ដ្រ និងវិធាននានា ផែនទីចង្អុលផ្លូវស្តីពីផែនការស្តារ និងលើកស្ទួយវិស័យទេសចរណ៍កម្ពុជាក្នុង និងក្រោយវិបត្តិជំងឺកូវីដ១៩ ដែលត្រូវបានដាក់អោយប្រើប្រាស់នៅថ្ងៃទី៣០ ខែមីនា ឆ្នាំ២០២១។ ក្នុងនោះ យើងសង្កើតឃើញមានការកើនឡើងនៃចំនួនទេចរឡើងវិញ។
ជាក់ស្តែងរយៈពេលបួនខែ ដើមឆ្នាំ២០២២នេះ តំបន់ឆ្នេរសមុទ្រកម្ពុជា ទទួលបាន ទេសចរអន្តរជាតិមក កម្សាន្តមានចំនួនសរុប ១៨០,៦៥២ នាក់ កើនឡើង ៣១០.៥% បើធៀបនឹងឆ្នាំ២០២១ មានចំនួនសរុប ៤៤,០១១ នាក់ ។ ទេសចរជាតិ មកកម្សាន្តមានចំនួនសរុប ១,៩៤៥,៤០៩ នាក់ កើនឡើង ១១៤.៦% បើធៀបនឹងឆ្នាំ២០២១ មានចំនួនសរុប ៩០៦,៣៧២នាក់។
តាមការព្យាករណ៍ ដោយមានការអន្តរគមន៍ពីរាជរដ្ឋាភិបាល ស្ថានភាពភ្ញៀវទេសចរ មកកាន់តំបន់ឆ្នេរសមុទ្រកម្ពុជា រំពឹងថា នឹងវិលត្រលប់មករកស្ថានភាពដូចក្នុងឆ្នាំ២០១៩ វិញ ក្នុងនោះ ភ្ញៀវទេសចរអន្តរជាតិនឹងមានចំនួនប្រមាណ ១.២ លាន នាក់ ក្នុងឆ្នាំ២០២៣ និងប្រមាណ ២.២លាន នាក់ក្នុងឆ្នាំ២០២៥៕ សុខ សារ៉ាយ
ចែករំលែកព័តមាននេះ