រាជធានីភ្នំពេញ ៖ តារាចម្រៀងនៅផលិតកម្មពីរផ្សេងគ្នា គឺនាងសុខ ពិសី និងនាង លី អុីវ៉ាធីណា បានឈ្លោះទាស់ពាក្យសម្តីគ្នាទៅវិញទៅមកតាមហ្វេសប៊ុក ។
ជម្លោះរបស់តារាចម្រៀងទាំងពីរនាក់កើតមានឡើង
រាជធានីភ្នំពេញ ៖ តារាចម្រៀងនៅផលិតកម្មពីរផ្សេងគ្នា គឺនាងសុខ ពិសី និងនាង លី អុីវ៉ាធីណា បានឈ្លោះទាស់ពាក្យសម្តីគ្នាទៅវិញទៅមកតាមហ្វេសប៊ុក ។
ជម្លោះរបស់តារាចម្រៀងទាំងពីរនាក់កើតមានឡើងបន្ទាប់ពីតារាចម្រៀងក្នុងផលិតកម្មថោន នាងលី អុីវ៉ាធីណា ពេលធ្វើជាគណៈកម្មការនៅក្នុងកម្មវិធី «ពេញចិត្តអត់» របស់ស្ថានីយទូរទស្សន៍ My TV បានផ្តល់មតិចំពោះបក្ខនារីដែលច្រៀងធ្វើត្រាប់តាមតារាចម្រៀងនាងសុខ ពិសីថា «មានទឹកដមសំឡេងពីរោះជាងម្ចាស់ដើមបន្តិច » ។ ចំណុចនេះធ្វើឲ្យតារាចម្រៀងក្នុងផលិតកម្មសាន់ដេនាងសុខ ពិសី ខឹងខ្លាំង និងវាយបកវិញ ។ សុខ ពិសី ចាត់ទុកពាក្យសម្តីរបស់នាងលី អុីវ៉ាធីណាថា «ហាក់មាក់ងាយ ឈ្នានីស និងហាក់មិនមានការចេះដឹង» ។
សុខ ពិសី សរសេរតាមហ្វេសប៊ុកថា «កម្មវិធីប្រឡងចម្រៀងទូទាំងប្រទេសដែលខ្ញុំធ្លាប់បានទស្សនាកន្លងមក ខ្ញុំធ្លាប់តែឃើញគណៈកម្មការវិនិច្ឆ័យពីចំណុចវិជ្ជមាន និងអវិជ្ជរបស់បេក្ខជនបេក្ខនារី ហើយខ្ញុំក៏មិនដែលទស្សនាប៉ះចំគណៈកម្មការដែលដាក់ពិន្ទុផ្ទុយនឹងគោលការណ៍កម្មវិធីដែរ ។ ដូចបងប្អូនបានជ្រាបហើយកម្មវិធី«ពេញចិត្ដឬអត់» គឺជាកម្មវិធីបង្កើតឡើងដោយមានវគ្គតារាកិក្តិយសប្រចាំសប្ដាហ៍ ដែលត្រូវឡើងបកស្រាយបទចម្រៀងរបស់ខ្លួន និងបង្ហាញពីចំណាប់អារម្មណ៍នៅក្នុងកម្មវិធី ជាពិសេសជាពេលវេលាដែល បងៗដែលអង្គុយនៅតុខាងមុខវេទិកាសួរសុខទុក្ខគ្នា និងចំអន់តារាចម្រៀងទៅវិញទៅមក ។ ខ្ញុំក៏ធ្លាប់បានចូលរួមកម្មវិធីនេះច្រើនដងដែរ ដូច្នេះខ្ញុំយល់ពីលក្ខខណ្ឌកម្មវិធីច្បាស់ណាស់ ព្រោះកម្មវិធីនេះថតទុកអីុចឹងមានពេលគ្រប់គ្រាន់ក្នុងការស្ដាប់អ្នករៀបចំកម្មវិធីរៀបរាប់ពីអ្វីដែលគេចង់បាន ។
កន្លងមកពេលដែលខ្ញុំចូលរួមកម្មវិធីនេះខ្ញុំតែងសួរអ្នករៀបចំកម្មវិធីច្រើនលើកច្រើនសាដើម្បីឱ្យប្រាកដក្នុងចិត្ត ហើយក៏មិនដែលមានប្រវត្តិគណៈកម្មការប្រើពាក្យសម្ដី ឬកាយវិការដែលមិនសមរម្យមកកាន់តារាច្រៀងកិត្តិយសដែរ ព្រោះកម្មវិធីនេះបង្កើតឡើងដើម្បីផ្ដល់ភាពសប្បាយរីករាយដល់ទស្សិកជនទស្សនាតាមគេហដ្ឋាន ។ អ្វីដែលសំខាន់ គឺការចំអន់គ្នាក៏ត្រូវមានកម្រិត ។ សម្រាប់់បទពិសោធន៍ដែលខ្ញុំចូលរួមកម្មវិធីនេះ កន្លងមកពុំធ្លាប់មានបញ្ហានោះទេ ព្រោះ បងៗដែលចូលរួមសុទ្ធតែជ្រាបច្បាស់ពីកម្មវិធីទាំងស្រុង ហើយសម្រាប់់វគ្គបញ្ចេញសមត្ថភាពរបស់បេក្ខជន-បេក្ខនារីត្រូវច្រៀងត្រាប់តាមសំឡេងតារារបស់ពួកគាត់ពេញចិត្ត ហើយតួនាទីរបស់គណៈកម្មការ គឺគ្រាន់តែស្ដាប់ និងជួយដាក់ពិន្ទុថាដូចម្ចាស់សំឡេងដើមប៉ុន្មានភាគរយ និងប្រាប់ទៅបេក្ខជនប្រឡងឱ្យដឹងពីចំណុចខ្វះខាតរបស់ពួកគាត់ ។ ខ្ញុំបានសាកសួរទៅបងដែលជាអ្នករៀបចំកម្មវិធីនេះទាំងមូលអំពីតួនាទីគណៈកម្មការកិត្តិយសគាត់ចូលរួមវិនិច្ឆ័យទៅលើអ្វីឱ្យប្រាកដ ? បងរៀបចំកម្មវិធីក៏បានពន្យល់ខ្ញុំថា កម្មវិធីនេះគឺតម្រូវឱ្យបេក្ខភាពត្រាប់តាមសំឡេងតារាដែលគាត់ពេញចិត្ត ហើយគណៈកម្មការកិត្តិយសរបស់យើងបានត្រឹមផ្ដល់មតិថា ដូចម្ចាស់សំនៀងដើម ឬក៏អត់ មិនមែនគណៈកម្មការចេះតែហាស្ដីតាមតែចិត្តចង់នោះទេ។ ព្រោះបងរៀបចំកម្មវិធីអះអាងថា គាត់ចង់បានចម្លើយពីគណៈកម្មការកិត្តិយសថាដូចឬមិនដូច ប៉ុន្តែគណៈកម្មការគាត់អត់ខ្វល់ សំខាន់គាត់បែរជានិយាយប៉ះពាល់ដល់ម្ចាស់បទទៅវិញ។ សមត្ថភាពខ្ញុំប៉ុនណា ខ្ញុំដឹង ព្រោះប្អូនស្រីដែលជាបេក្ខនារីគាត់ក៏បានជម្រាបជូនដល់បងស្រីលី អីុវ៉ាធីណា រួចហើយថាគាត់ចូលចិត្ដ និងគាំទ្រនាងខ្ញុំ ដូច្នេះស្ដែងបញ្ជាក់ឱ្យឃើញថា នាងខ្ញុំក៏គ្មានពាក្យអ្វីក្រៅពីថ្លែងអំណរគុណដល់ប្អូនស្រី និងបណ្ដាអ្នកគាំទ្ររបស់នាងខ្ញុំទាំងអស់ដែលកាន់ដៃខ្ញុំមកដល់ចំណុចនេះ ។ បងមិនពេញចិត្តសំឡេងរបស់ខ្ញុំបងទុកឱ្យបណ្ដាអ្នកគាំទ្ររបស់នាងខ្ញុំស្ដាប់ចុះ បងគ្រាន់តែឆ្លើយទៅតាមគោលការណ៍កម្មវិធីថាដូច ឬអត់តែប៉ុណ្ណឹង ចប់បាត់ ចាំបាច់អីមកប៉ះពាល់ដល់ឈ្មោះនាងខ្ញុំទៅវិញ ។ ខ្ញុំអត់ខឹងគ្រាន់តែហួសចិត្ត ខ្ញុំពេញចិត្តនឹងអ្វីដែលខ្ញុំមាន ហើយព្រោះជាសមត្ថភាពដែលម៉ាក់ប៉ាខ្ញុំផ្ដល់ឱ្យ ។ អីុចឹងបើបងអាចប្ដូរសំឡេងធម្មជាតិរបស់បងបានសូមអញ្ជើញប្ដូរទៅ ដើម្បីឱ្យគេប្លែកត្រចៀកខ្លះ ព្រោះតារាគ្រប់រូបមិនអាចតម្រូវចិត្តមនុស្សទូទាំងប្រទេសបានទេ ក្នុងនោះក៏មានបងដែរ ។ បងសំឡេងពីរោះសម្រាប់់បណ្ដាអ្នកគាំទ្ររបស់បង តែអាចមិនត្រូវចិត្តអ្នកដែលមិនចូលចិត្ដបង បើបងអាចប្ដូរស្ទីលច្រៀងដើម្បីប្រមូលយកអ្នកគាំទ្រមួយប្រទេសបានកាន់តែល្អ » ។
ជាការឆ្លើយតបនាងលី អុីវ៉ាធីណា បានចេញវីដេអូឃ្លីបបញ្ជាក់ថា «ចំពោះបេក្ខនារីច្រៀងត្រាប់សុខ ពិសី ក្នុងកម្មវិធីពេញចិត្តអត់នោះ នាងខ្ញុំចង់សួរថា តើត្រង់ណាដែលនាងខ្ញុំចង់ឈ្នានីសប្អូនសុខ ពិសី ។ ជាធម្មតាបងធ្វើជាគណៈកម្មការ បងនិយាយអ្វីដែលជាការណ៍ពិត បើគាត់ច្រៀងពីរោះ បងថាច្រៀងពីរោះ បើច្រៀងមិនពិរោះបងថាមិនពីរោះ ថ្វីដ្បិតតែគាត់ច្រៀងមិនត្រូវភ្លេងបន្តិច ប៉ុន្តែសំឡេងគាត់ពីរោះ អីុចឹងបងថា ពីរោះ ហើយបងមិនបានថា កញ្ញាសុខ ពិសី ច្រៀងអន់ជាងអូន ឬក៏សុខ ពិសី ច្រៀងមិនបានប៉ុនអូន បងមិនបាននិយាយទេ បងគ្រាន់តែនិយាយថា អូនច្រៀងពីរោះជាងម្ចាស់ដើម បងគ្រាន់តែបាននិយាយប៉ុណ្ណឹង។ បងចង់និយាយផ្តាំទៅអូនសុខ ពិសី វិញថា តាំងពីបងបានស្គាល់អូន បងមិនដែលថា ចង់ឈ្នានីសអូន ឬក៏ច្រណែនជាមួយអូនឡើយ ។
ចំណែកចំណុចមួយទៀតដែលអូនថា បងចូលសិល្បៈមុនអូនតែ១ ឬ២ឆ្នាំទេ តែបើគិតពីអាយុអូនក៏មិនតិចជាងបង១ ឬ២ឆ្នាំដែរ បងគិតថា អូននិយាយពាក្យសម្តីហ្នឹងអូនចង់មានរឿងជាមួយបង ឬក៏យ៉ាងមេចក៏បងអត់ដឹង ប៉ុន្តែអ្វីដែលបងនិយាយនាពេលនេះ គឺបងចង់និយាយអ្វីជាការណ៍ពិត មិនមានបំណងចង់ឈ្លោះជាមួយអូន ឬក៏ឈ្នានីសអូនទេ ។
ចំណែកចំណុចមួយទៀតដែលអូនថា បងមិនស្អាត យិនស៊ិន ឬក៏ថាបងឡើង កប់ៗ បងចង់ប្រាប់អូនថា អ្វីដែលជារបស់បងគឺបងស្រឡាញ់ខ្លួនបងសព្វថ្ងៃ » ។
ស្តាប់ឮហើយសុខ ពិសី បានឆ្លើយតបទៅវិញថា «នាងខ្ញុំសុខពិសីសូមផ្ដាំទៅរៀមច្បង លី អុីវ៉ាធីណា ផងដែរថា នាងខ្ញុំមិនទំនេរដើរបង្កបញ្ហាជាមួយអ្នកណាទេ នេះជាលើកទីមួយហើយដែលខ្ញុំត្រូវជួបបញ្ហាបែបនេះ ។ សង្ឃឹមថា លើកក្រោយបើបងមិនពេញចិត្តនរណាម្នាក់ សូមបងមេត្តារក្សាកិត្តិយសដល់គេខ្លះផង មិនមែននឹកឃើញម៉េចក៏និយាយអីុចឹងទេ ព្រោះពាក្យខ្លះអាចធ្វើឱ្យគេគិតថា បងមើលងាយគេ ខ្ញុំសប្បាយចិត្ដដែលមានបេក្ខភាពជាច្រើន ជ្រើសរើសបទចម្រៀងខ្ញុំទៅបកស្រាយ ប៉ុន្តែសម្ដីបងមិនបានសរសើរលើសមត្ថភាពបេក្ខជន និងបេក្ខនារីតែម្យ៉ាងនោះទេ តែបងហាក់បង្កប់ន័យចំអកដល់សមត្ថភាពនាងខ្ញុំ ដែលមិនធ្លាប់មានបញ្ហាជាមួយបងសូម្បីតែបន្តិច ។ ខ្ញុំនៅមានកម្មវិធីជាច្រើនដែលខ្ញុំត្រូវបង្ហាញវត្តមាន បូករួមនឹងការងារមនុស្សធម៌ដែលខ្ញុំត្រូវចូលរួមជាបន្តបន្ទាប់ទៀតនៅពេលខាងមុខ ។ ខ្ញុំសង្ឃឹមថា បងនឹងយល់ពីចិត្តរបស់ខ្ញុំ និងយល់ពីអ្វីដែលខ្ញុំស្តាប់ឮបងនិយាយនៅលើឆាក ។ សូមអរគុណ និងសង្ឃឹមថា បងនឹងទទួលយកការពន្យល់ និងរៀបរាប់របស់ខ្ញុំ » ៕
ចែករំលែកព័តមាននេះ