រាជធានីភ្នំពេញ ៖ កញ្ញា បុស្បាប៉ាន់ ជាអ្នកចុំករៀងអូប៉េរ៉ាមួយរូបនៅកម្ពុជា និងជាអ្នកដែលមានជំនាញខាងផ្នែកនិពន្ធបទភ្លេង និងតន្ត្រីផងដែរ បានទៅសិក្សារៀនសូត្របន្ថែមនៅសាលា Walnuts School for the Art និងសាលា New England Conservatory នៃទីក្រុង Boston សហរដ្ឋអាមេរិក ។ នៅថ្ងៃទី១២ កក្កដា ២០១៦ កញ្ញា បុស្បាប៉ាន់ បានត្រឡប់មកដល់ប្រទេសកម្ពុជាវិញ ក្នុងទឹកចិត្តមួយចង់ជួយជំរុញ និងលើកស្ទួយវិស័យសិល្បៈរបស់កម្ពុជា ដើរឱ្យទាន់ប្រទេសរីកចម្រើននៅលើសាកលលោក។
នៅក្នុងសន្និសីទនៅអាកាសយានដ្ឋានអន្តរជាតិភ្នំពេញ កាលពីព្រឹកថ្ងៃទី១២ កក្កដា ២០១៦ កញ្ញា បុស្បាប៉ាន់ បាននិយាយថា អំឡុងពេលដែលនាងមកលេងស្រុកខ្មែរនាងនឹងទៅបង្ហាត់តែងភ្លេងដល់សិស្សសាលាមួយនៅខេត្តសៀមរាប ។ ដោយសារតែនៅសហរដ្ឋអាមេរិក នាងបានរៀនបន្ថែមពីជំនាញតន្ត្រីនៅសាលា New England Conservatory នៅទីក្រុង Boston ពេលនេះនាងបានបញ្ចប់ឆ្នាំទី១ហើយ ដូចនេះនាងអាចយកអ្វីដែលនាងរៀនមកចែករំលែកដល់កូនខ្មែរបានមួយចំណែកដែរ ។
កញ្ញាបានបន្តថា ដោយសារតែកាលពីបួនឆ្នាំមុននៅស្រុកខ្មែរ អត់មានសាលាបង្វឹកក្មេង ហើយដោយសារតែនាងបានជាប់អាហារូបករណ៍ នាងក៏បានចេញទៅរៀននៅសហរដ្ឋអាមេរិក ដំបូងនាងរៀននៅសាលា Walnuts School for the Art ។ សាលានោះ គេបានបង្រៀននាងពីសិល្បៈបែបបស្ចឹមប្រទេស និងបែបអឺរ៉ុប ហើយពេលនាងទទួលបានការបង្រៀនទាំងនោះហើយ បុស្បាក៏មានបំណងចង់បកប្រែ និងចងក្រងជាសៀវភៅមួយជាភាសាខ្មែរ ដើម្បីងាយស្រួលដល់កូនខ្មែរដែលមានបំណងចង់សិក្សាស្រាវជ្រាវសិល្បៈបែបបស្ចឹមប្រទេស ។
បុស្បាប៉ាន់ បានរៀនសូត្រស្រាវជ្រាវពីវប្បធម៌ប្រទេសដទៃតាំងពីនាងនៅក្មេងម្ល៉េះ ដោយសារតែនាងជាក្មេងម្នាក់អាចនិយាយបីភាសា ហើយក៏ជាក្មេងម្នាក់ដែលមានជំនាញខាងសិល្បៈនេះដែរ ព្រោះនាងអាចលេងភ្លេងផង ច្រៀងផង និងរាំបានទៀតផង ។ បុស្បានិយាយថា នៅស្រុកខ្មែរមានក្មេងៗជាច្រើនដែលមានជំនាញក្នុងវិស័យសិល្បៈនេះ ប៉ុន្តែការសិក្សារៀន និងការទទួលចំណេះដឹងផ្នែកសិល្បៈរវាងក្មេងៗទាំងនោះ មិនដូចគ្នានោះឡើយ ក្មេងខ្លះបានទទួលចំណេះដឹងច្រើន ក្មេងខ្លះទៀតមានជំនាញ និងទេព្យកោសល្យ តែបែរជាមិនបានទទួលការបណ្ដុះបណ្ដាលជ្រៅជ្រះទៅវិញ ។
បុស្បានិយាយទៀតថា នាងចង់ជួយដល់ក្មេងៗនៅកម្ពុជាណាស់ ប៉ុន្តែនាងដឹងច្បាស់ថា កម្រិតចំណេះដឹងរបស់នាងនៅមិនទាន់អាចទៅបង្រៀនឱ្យគេជឿជាក់លើនាងទាំងស្រុងទេ ហេតុនេះហើយនាងត្រូវការរយៈពេល៨ឆ្នាំទៀតនៅសហរដ្ឋអាមេរិក ដើម្បីសិក្សាស្រាវជ្រាវផ្នែកសិល្បៈឱ្យដល់ថ្នាក់បណ្ឌិត ដើម្បីចំណេះទាំងនោះ មកបង្រៀនដល់កូនខ្មែរ និងអ្នកជំនាន់ក្រោយៗនាង ។
លោក អ៊ឹង ជិនណារី ជាគ្រូរបស់បុស្បាប៉ាន់ផ្ទាល់ ក៏បានមានប្រសាសន៍ថា ក្នុងផ្នែកសិល្បៈនេះ ត្រូវការឱ្យមានការរៀនសូត្រពីគ្នាទៅវិញទៅមក គឺយើងត្រូវរៀនពីគេ ហើយគេក៏បានរៀនពីយើងវិញដែរ ដើម្បីឱ្យដឹងពីវប្បធម៌នៃប្រទេសនីមួយៗ ។
លោកបន្តថា គោលបំណងរបស់លោកមកស្រុកខ្មែរនៅពេលនេះ គឺដើម្បីកសាងសាលាតែងបទភ្លេងសម្រាប់អ្នកជំនាន់ក្រោយ ហើយពេលនេះមានសិស្ស១២នាក់ហើយ ទាំងបរទេស និងខ្មែរ ដើម្បីរៀនតែងនិពន្ធបទភ្លេងខ្មែរ ។ លោកថា លោកមកស្រុកខ្មែរតែ២សប្ដាហ៍ តែលោកនឹងចាត់ចែងសម្រាប់លោកគ្រូ អ្នកគ្រូ ដែលជាអ្នកបង្រៀននៅក្នុងសាលារបស់លោក ដោយឧបត្ថម្ភដល់ពួកគាត់ផងដែរ ដើម្បីបង្រៀនបន្តទៀតដល់សិស្ស ៕
ចែករំលែកព័តមាននេះ