ខេត្តសៀមរាប ៖ អ្នកបម្រើសេវាកម្មទេសចរណ៍តាមសហគមន៍ទេសចរណ៍ចំនួន ៦៥ នាក់ ក្នុងនោះមកពីសហគមន៍អេកូទេសចរណ៍ ទឹកជប់ខ្នារពោធិ៍ និងសហគមន៍ជុំវិញសហគមន៍អេកូទេសចរណ៍ចាន់សជើង សហគមន៍អេកូទេសចរណ៍ចាន់សត្បូង និងសហគមន៍ទេសចរណ៍ត្រាវកុដ…
ខេត្តសៀមរាប ៖ អ្នកបម្រើសេវាកម្មទេសចរណ៍តាមសហគមន៍ទេសចរណ៍ចំនួន ៦៥ នាក់ ក្នុងនោះមកពីសហគមន៍អេកូទេសចរណ៍ ទឹកជប់ខ្នារពោធិ៍ និងសហគមន៍ជុំវិញសហគមន៍អេកូទេសចរណ៍ចាន់សជើង សហគមន៍អេកូទេសចរណ៍ចាន់សត្បូង និងសហគមន៍ទេសចរណ៍ត្រាវកុដ និងពីសហគមន៍សហគមន៍ទេសចរណ៍ធម្មជាតិចង្ក្រានរយ បានបញ្ចប់ការបណ្តុះបណ្តាល ជំនាញលើកិច្ចការបដិសណ្ឋារកិច្ច ចម្អិនម្ហូបអាហារ និងការធ្វើអនាម័យដើម្បីយកចំណេះទាំងនេះទៅលើកកម្ពស់ការទទួលភ្ញៀវតាមសហគមន៍របស់ខ្លួនឱ្យកាន់ប្រសើរឡើង ។
ក្រសួងទេសចរណ៍ សហការជាមួយសហគ្រិនខ្មែរ (Khmer Enterprise) បានរៀបចំវគ្គបណ្តុះបណ្តាលស្តីពី «សហគ្រិនភាព ការគ្រប់គ្រងសហគមន៍ទេសចរណ៍» ដែលផ្តើមចេញពីសហគមន៍ទេសចរណ៍នៅក្នុងខេត្រសៀមរាបនេះ ។ ក្រោយពេលវិបត្តកូវីដ ១៩ ជាង២ ឆ្នាំ ដែលធ្វើវិស័យទេសចរណ៍សឹងតែស្លាប់នោះ កម្ពុជាបានលើកកម្ពស់ការដើរកម្សាន្តរបស់ពលរដ្ឋក្នុងស្រុក ។ ការលើកកម្ពស់សហគមន៍ទេសចរណ៍មិនត្រឹមផ្តល់ជូននូវសេវាទេសចរណ៍សម្បូរបែបដល់អ្នកដើរកម្សាន្តនោះទេ តែជាការលើកកម្ពស់ជីវភាពពលរដ្ឋ និងការការពាបរិស្ថានផងដែរ ។
លោក តុប សុភ័ក រដ្ឋលេខាធិការក្រសួងទេសចរណ៍ នៅក្នុងពិធីបិទវគ្គបណ្តុះបណ្តាលកាលពីថ្ងៃទី ២៥ ធ្នូ បានលើកទឹកចិត្តដល់សិក្ខាកាមដែលបានចូលរួមវគ្គបណ្តុះបណ្តាលនេះ យកចំណេះដឹង និងជំនាញទៅប្រើប្រាស់ដើម្បីលើកកម្ពស់គុណភាពសេវា និងផលិតផលទេសចរណ៍ បង្កើនទំនុកចិត្តភ្ញៀវទេសចរ ។
លោកបណ្ឌិត ឈៀង វណ្ណមុនិណ្ឌ ជានាយកប្រតិបត្តិសហគ្រិនខ្មែរ បាននិយាយថា ក្រៅពីការបណ្តុះបណ្តាលនេះ នៅមានការងារផ្សេងទៀត ដែលត្រូវអនុវត្តនក្នុងគោលបំណងលើកកម្ពស់សហគ្រិនភាពនៅមូលដ្ឋាន ពិសេសជំរុញកំណើនភ្ញៀវទេសចរឱ្យទៅកម្សាន្តតាមតំបន់សហគមន៍ដែលបានកំណត់ក្នុងគម្រោងនោះ ។
ក្រសួងទេសចរណ៍ បានចុះអនុស្សារណៈយោគយល់ជាមួយសហគ្រិនខ្មែរ កាលពីថ្ងៃទី ២៧ ខែសីហា ឆ្នាំ ២០២១ ក្នុងគោលបំណងជំរុញចលនាទេសចរណ៍ផ្ទៃក្នុង និងលើកកម្ពស់សកម្មភាពទេសចរណ៍ក្នុងសហគមន៍ក្នុងបរិបទជំងឺកូវីដ-១៩ ដើម្បីជំរុញចលនាទេសច រណ៍ទៅកាន់តំបន់សហគមន៍ទេសចរណ៍សំខាន់ៗចំនួន ៥ រួមមានសហគមន៍អេកូទេសចរណ៍ទឹកជប់ខ្នារពោធិ៍ និងសហគមន៍ទេសចរណ៍ចង្ក្រាន្តរយក្នុងខេត្តសៀមរាប សហគមន៍ទេសចរណ៍ទឹកធ្លាក់អូរជាំក្នុងខេត្តបាត់ដំបង សហគមន៍ទេសចរណ៍រាំងខ្វាវក្នុងខេត្តពោធិ៍សាត់ និងសហគមន៍ទេសចរណ៍ស្រែអំពិលក្នុងខេត្តបាត់ដំបង ៕
ចែករំលែកព័តមាននេះ