តារាចម្រៀងនាង ទឹម វល័ក្ខ កំពុងតែញាំញីដោយជំងឺ និងជួបបញ្ហាជីវភាពយ៉ាងខ្លាំង បន្ទាប់ពីតារារូបនេះបានបាត់វត្តមានពីសិល្បៈមួយរយៈធំ។ តារាចម្រៀងរូបនេះ ត្រូវបានគេផ្តល់ដំណឹងថា
រាជធានីភ្នំពេញ ៖ តារាចម្រៀងនាង ទឹម វល័ក្ខ កំពុងតែញាំញីដោយជំងឺ និងជួបបញ្ហាជីវភាពយ៉ាងខ្លាំង បន្ទាប់ពីតារារូបនេះបានបាត់វត្តមានពីសិល្បៈមួយរយៈធំ។ តារាចម្រៀងរូបនេះ ត្រូវបានគេផ្តល់ដំណឹងថា នាងបានឆ្លងកាត់ការវះកាត់ដោយសារជំងឺដុះសាច់ក្នុងពោះ ហើយកំពុងត្រូវការឈាមជាចាំបាច់ ខណៈពេលនាងក៏កំពុងតែត្រូវការជួយជាងថវិកាពីសប្បុរសជន ជាពិសេសអ្នកសិល្បៈដែលបានស្គាល់នាង។
បើយោងតាមការបង្ហោះហ្វេសប៊ុកពីលោក ទឹម សុភា ដែលត្រូវជាបងបង្កើតរបស់នាង ទឹម វល័ក្ខ នោះបានអោយដឹងថា «សូមជម្រាបសួរពុកម៉ែបងប្អូន ខ្ញុំបាទទឹមសុភា ពេលនេះប្អូនស្រីរបស់ខ្ញុំបង្កើតបានចូលវះកាត់ បន្ទាប់មកលោកគ្រូពេទ្យប្រាប់ថា ត្រូវការឈាមចំនួនបីសាក់។ សូមមេត្តា បងប្អូនសិល្បករនិងមិត្តភក្តិ មេត្តាជួយដល់ប្អូនស្រីខ្ញុំបាទផង ពេលនេះគាត់កំពុងសម្រាកនៅក្នុងបន្ទប់វះកាត់នៅឡើយទេ គាត់ត្រូវការឈាមបន្ទាន់ ដូច្នេះសូមមេត្តាពុកម៉ែ បងប្អូនមិត្តភក្តិ និងសិល្បករទាំងអស់ មេត្តាជួយដល់ប្អូនស្រីខ្ញុំបាទផង ហើយក៏សូមអរគុណជាមុនសម្រាប់ទឹកចិត្តពុកម៉ែបងប្អូនទាំងអស់គ្នា និងមេត្តាជួយដល់ប្អូនស្រីខ្ញុំឥឡូវនេះផង»។
ដោយឡែកតារាចម្រៀង និងត្រូវជាមិត្តិភក្តិធ្លាប់ប្រកបអាជីពចម្រៀងជាមួយគ្នា នាង ផាត់ សុធារ៉ា បានអះអាងប្រាប់កោះសន្តិភាពតាមសារអេឡិចត្រូនិចបន្ថែមថា នាង កែវ វល័ក្ខ បានចូលសម្រាកព្យាបាលនៅក្នុងមន្ទីរពេទ្យមួយក្នុងរាជធានីភ្នំពេញ ហើយត្រូវទទួលការវះកាត់ ដោយសារជំងឺដុះសាច់ក្នុងពោះ។
នាងបញ្ជាក់ថា តារារូបនេះក៏បានជួបបញ្ហាខ្វះខាតជីវភាពផងដែរ ដោយសារមួយរយៈចុងក្រោយនេះហាងដែលនាងធ្លាប់ច្រៀងរាល់ថ្ងៃ ត្រូវបានបិទដោយសារជំងឺកូវីដ១៩ ខណៈពេលប៉ុន្មានឆ្នាំចុងក្រោយនេះ នាងក៏មិនមានឱកាសបានឡើងច្រៀងតាមស្ថានីយទូរទស្សន៍ផងដែរ។
បើតាម ផាត់ សុធារ៉ា ថា ដោយសារឃើញការលំបាកនេះនាង និងមិត្តភក្តិដែលបានស្គាល់ ទឹម វល័ក្ខ មួយចំនួនក៏បានសហការគ្នាជួយដល់នាងបានតិចតួចប៉ុណ្ណោះ។ ផាត់ សុធារ៉ា បានលើកឡើងបន្ថែមថា ដោយសារ ទឹម វល័ក្ខ ជាអ្នកសិល្បៈមិនសូវល្បីនោះ ហើយមិនសូវមានគេស្គាល់ច្រើននោះ ទើបរហូតមកទល់នាពេលនេះមិនសូវមានអ្នកជួយនាងនោះឡើយ។ យ៉ាងណា ក្នុងនាមជាអ្នកសិល្បៈដូចគ្នា នាងសូមអំពាវនាវដល់សប្បុរសជននានា ជាពិសេសបណ្តាអ្នកសិល្បៈ សូមមេត្តាជួយឧបត្ថម្ភដល់ ទឹម វល័ក្ខ ផង ទោះតិចក្តីច្រើនក្តីក្នុងកាលៈទេសៈដែលតារារូបនេះកំពុងជួបការលំបាក និងញាំញីដោយសារជំងឺ។
គួរបញ្ជាក់ថា ក្នុងវ័យប្រមាណ៣០ឆ្នាំ និងត្រូវជាប្អូនរបស់តារាចម្រៀង វល័ក្ខ ដួងច័ន្ទ នាង ទឹម វល័ក្ខ ធ្លាប់បានចាប់ឈោងភាពល្បីល្បាញមួយគ្រាកាលពីប៉ុន្មានឆ្នាមុន។ ក្រោយពីល្បីមួយឆាវ នាងក៏បានបាត់មុខអស់ជាច្រើនឆ្នាំ ប៉ុន្តែនាងក៏មិនបានទៅណាឆ្ងាយពីអាជីពសិល្បៈនេះដែរ ពោលគឺនាងបានប្រកបអាជីពច្រៀងនៅភោជនីយដ្ឋានមួយកន្លែងក្នុងរាជធានីភ្នំពេញ។ ទឹម វល័ក្ខ នៅមិនទាន់មានគ្រួសារនៅឡើយទេ ហើយក្រៅពីការច្រៀង នាងក៏មានមុខរបរជាអ្នកលក់ផលិតផលថែរក្សាសម្រស់តាមអនឡាញផងដែរ៕
ចែករំលែកព័តមាននេះ