រាជធានីភ្នំពេញ ៖ រឿងនឹកស្មានមិនដល់មួយបានធ្វើឱ្យមហាជនមានក្តីអាណិតសូរជាពន់ពេក ក្រោយពីបានដឹងថា សមាជិកគ្រួសារ និងសាច់ញាត់របស់តារាសម្តែង និងកំប្លែកមាឌយក្ស កញ្ញា យេយេ សរុប១៨នាក់ ត្រូវបានរកឃើញថា ឆ្លងកូវីដ១៩ ខណៈរូបនាងផ្ទាល់ក៏វិជ្ជមានវីរុសមួយនេះផងដែរ តែសាច់ញាតិទាំងអស់មិនមែនឆ្លងកូវីដ ពីរូបនាងនោះទេ ។ នេះជាអ្វីដែលនាង យេ យេ បានបញ្ជាក់ ។
កាលពីប៉ុន្មានថ្ងៃមុនពេលដែល យេយេ បានប្រកាសថា ខ្លួនមានវិជ្ជមានកូវីដ១៩នោះ ស្រាប់តែតារារូបនេះ ក៏បានអះអាងពីសមាជិកគ្រួសាររបស់នាងផ្សេងទៀតក៏បានឆ្លងជំងឺដ៏កាចសាហាវនេះដូចគ្នា ខណៈការឆ្លងនោះមិនចេញពីរូបនាងនោះឡើយ។
ប្រធានក្រុមក្នុងក្រុមកំប្លែងយក្សភ្លោះកញ្ញា យេយេ បានបង្ហោះសារតាមគណនេយ្យហ្វេសប៊ុករបស់ខ្លួនកាលពីពេលថ្មីនេះថា វាជារឿងមួយនឹកស្មានមិនដល់សម្រាប់ក្រុមគ្រួសារខ្ញុំ មនុស្សខ្ញុំចូលចិត្តធ្វើបុណ្យ ជួយគេទាំងខ្លួនជាមនុស្សក្រ ចុះហេតុអីបុណ្យដែលខ្ញុំធ្វើមិនជួយដល់ការបន់ផ្សងរបស់ខ្ញុំវិញខ្លះ?»។
នាងបញ្ជាក់ថា «បងខ្ញុំ2គ្រួសារ6នាក់ ត្រូវសម្រាកព្យាបាល នៅកោះពេជ្រ មួយគ្រួសារទៀត៤នាក់សម្រាកព្យាបាលនៅសាលាជំពូវន្ដ មួយគ្រួសារទៀត៤នាក់នៅបូរីពិភពថ្មីសែនសុខ ឣ្នកផ្ទះខ្ញុំ៤នាក់ទៀត ហេតុឣី?។ ស៊ូៗទាំងឣស់គ្នា ឆាប់បានត្រលប់មកផ្ទះយើងរៀងៗខ្លួនវិញណា បញ្ជាក់ខ្ញុំមិនដែលបានទៅជួបពួកគាត់ទេ គាត់ឆ្លងមកពីឣ្នកក្នុងភូមិ»។
យ៉ាងណារហូតមកទល់នាពេលនេះ គេនៅមិនទាន់ដឹងទេថា សុខភាពរបស់ យេយេ និងក្រុមគ្រួសាររបស់នាងទាំងអស់ដែលកំពុងសម្រាកព្យាបាលនោះបានវិវត្តន៍យ៉ាងណានៅឡើយទេ ក្នុងពេលដែលកោះសន្តិភាពបានព្យាយាមសាកសួរ តែមិនទាន់មានការឆ្លើយតបណាមួយពីតារារូបនេះនៅឡើយទេ។
ជាការកត់សម្គាល់ យេយេ បានប្រកាសថា ខ្លួនបានឆ្លងជំងឺកូវីដ១៩ កាលពីថ្ងៃទី២២ ខែមេសា ឆ្នាំ២០២១ ក្នុងពេលដែលនាងបានដាក់ការសង្ស័យពីការឆ្លងនេះមកពីអ្នកនៅផ្ទះរបស់នាងមួយរូប។
យ៉ាងណា បន្ទាប់ពីនាងបានប្រកាសពីការឆ្លងជំងឺមួយនេះ គេសង្កេតឃើញមានអ្នកសិល្បៈជាច្រើន ជាពិសេសអ្នកធ្លាប់ទទួលការព្យាបាលនៃជំងឺកូវីដ១៩ បាននាំគ្នាលើកទឹកចិត្ត និងផ្តល់ដំបូន្មានមួយចំនួនសម្រាប់រូបនាងតតាំងនឹងជំងឺដ៏កាចសាហាវមួយនេះ ហើយអាចឈានទៅរកការជាសះស្បើយឡើងវិញ៕
ចែករំលែកព័តមាននេះ