ប្រវត្តិដើមនៃបទចម្រៀង «រាហូចាប់ចន្ទ» កវីគង្គ ប៊ុនឈឿន បាននិពន្ធ និងថតនៅអំឡុងឆ្នាំ១៩៧៣ សម្រាប់បញ្ចូលក្នុងប្រលោមលោកមួយឈ្មោះ «រាហូចាប់ចន្ទ» ហើយត្រៀមថតទៅជាខ្សែភាពយន្តទៀតផង ។
ប្រវត្តិដើមនៃបទចម្រៀង «រាហូចាប់ចន្ទ» កវីគង្គ ប៊ុនឈឿន បាននិពន្ធ និងថតនៅអំឡុងឆ្នាំ១៩៧៣ សម្រាប់បញ្ចូលក្នុងប្រលោមលោកមួយឈ្មោះ «រាហូចាប់ចន្ទ» ហើយត្រៀមថតទៅជាខ្សែភាពយន្តទៀតផង ។ មុននឹងចាប់ផ្តើមសរសេររឿងនេះ លោកគង្គ ប៊ុនឈឿនបានយកសាច់រឿងសង្ខេបទៅសុំសេចក្តីអនុញ្ញាតពីការិយាល័យព័ត៌មាននៃក្រសួងឃោសនាការជាតិ ដោយឆ្លងកាត់សមាគម «អ្នកភាពយន្តខ្មែរ»នាសម័យនោះ ហើយបានទទួលលេខតម្កល់ទុកតាមច្បាប់ ដើម្បីរក្សាសិទ្ធិមិនឱ្យអ្នកណាយកចំណងជើងរឿងនេះទៅប្រើប្រាស់ក្នុងផ្លូវជំនួញបានទៀតឡើយ ។
កាលណោះមានចាងហ្វាងផលិតកម្មភាពយន្តមួយដែលបានឃើញប្រលោមលោករឿង«រាហូចាប់ចន្ទ» ចេញផ្សាយទៅមានសន្ទុះខ្លាំងនៅលើទីផ្សារក៏បានយកឈ្មោះរឿងនេះទៅដាក់ជាចំណងជើងរឿងរបស់គេផ្សេង ។
ពេលនោះ លោកគង្គ ប៊ុនឈឿន បានហាមជា រឿយៗថា សុំកុំយក ព្រោះឈ្មោះរឿងនេះលោកបានសុំ «តម្កល់ទុកតាមច្បាប់» រួចហើយ ប៉ុន្តែចាងហ្វាងផលិតកម្មនោះមិនព្រមដោយសម្អាងថា ឈ្មោះរាហូចាប់ចន្ទជាឈ្មោះបុរាណ អ្នកណាយកទៅធ្វើអ្វីក៏បាន ទើបគេក៏យកចំណងជើងនោះទៅដាក់រឿងរបស់គេតាមទំនើងចិត្ត ។ លោកគង្គ ប៊ុនឈឿន បានធ្វើពាក្យប្តឹងនៅ Bureau de Presse នាសម័យនោះ ហើយគេបានកាត់សេចក្តីឱ្យលោកឈ្នះ ដោយតម្រូវឱ្យចាងហ្វាងផលិតកម្មនោះសងជាប្រាក់ជំងឺចិត្តដល់លោកទៀតផង ព្រោះច្បាប់បានសម្អាងថា ពិតមែនតែពាក្យ«រាហូចាប់ចន្ទ»ជាពាក្យពីបុរាណតែកន្លងមកពុំទាន់មានអ្នកណាទៅសុំច្បាប់រក្សាសិទ្ធិតម្កល់ទុកជាផ្លូវការនៅឡើយ ដូច្នេះអ្វីដែលលោកបានទៅសុំតម្កល់ទុកមុនគឺចំណងជើងនេះពិតជាកម្មសិទ្ធិរបស់លោក មិនអាចមាននរណារំលោភបំពានលួចយកទៅប្រើប្រាស់បានឡើយ លុះត្រាតែមានការព្រមព្រៀងគ្នាជាទ្វេភាគី ។
នេះចង់បញ្ជាក់ថា ច្បាប់ទម្លាប់យើងនាសម័យនោះ មានប្រសិទ្ធភាពណាស់សម្រាប់ការពារសិទ្ធិខាងបញ្ញាពលកម្ម ប៉ុន្តែសម័យបច្ចុប្បន្ននេះ ទោះបីមានច្បាប់ស្តីពីកិច្ចការការពារសិទ្ធិខាងនិពន្ធនេះហើយក៏ដោយ ក៏នៅតែមានការលួចបន្លំ រំលោភសិទ្ធិគ្នាទៅវិញទៅមកជាប់ជានិច្ច ។
បទ«រាហូចាប់ចន្ទ» លោកគង្គ ប៊ុនឈឿន បាននិពន្ធទៅតាមលំអានសាច់រឿងប្រលោមលោក គឺតួប្រុសឈ្មោះរាហូ បានផ្សងព្រេងរហូតទៅដល់កោះស៊ូម៉ាត្រា កោះបាលីនៃប្រទេសឥណ្ឌូណេស៊ី ជួបនឹងកុលាបកោះបាលីនៅទីនោះ ហើយបង្កើតជាបញ្ហាស្មុគស្មាញក្នុងឆាកស្នេហាផ្សងព្រេង ។
បទ «រាហូចាប់ចន្ទ» និងបទ «លាហើយស៊ូម៉ាត្រា» សុទ្ធតែដកស្រង់ចេញពីរឿងរាហូចាប់ចន្ទដូចគ្នា ប៉ុន្តែពេលនោះលោកគង្គ ប៊ុនឈឿនមិនបានទៅថតផ្ទាល់នៅស្ទូឌីយោទេ ព្រោះមានជំងឺ គឺប្រគល់ឱ្យប្រពន្ធលោកជាអ្នកដឹកនាំចាត់ចែងទាំងអស់ ។
សព្វថ្ងៃបទទាំងពីរនេះត្រូវក្រុមហ៊ុនផលិតចម្រៀងកាយវិការខារ៉ាអូខេយកទៅថត ប៉ុន្តែការរៀបចំសម្លៀកបំពាក់ និងកាយវិការ ត្រូវលោកគង្គ ប៊ុនឈឿនបញ្ជាក់ថាហាក់មិនត្រូវទៅតាមសាច់រឿងឡើយ ព្រោះគេមិនដឹងរឿងពិត ចេះតែថតឱ្យតែបាន ។
បទ«រាហូចាប់ចន្ទ»និពន្ធបទភ្លេង និងទំនុកច្រៀងដោយដោយគង្គ ប៊ុនឈឿន សម្រួលតន្ត្រីដោយហាស់ សាឡន និងច្រៀងដោយស៊ីន ស៊ីសាមុត ។ បទនេះរាយទំនុកថា៖
១-ថ្ងៃបងជួបអូនជាថ្ងៃសុបិន ថ្ងៃដែលមាសឆ្អិនចង់ប្រហារបង រាហូចាប់ចន្ទ អូនចាប់បងចង ឥឡូវចំណងក្លាយជាស្នេហា ។
២-អធ្រាត្រណាស់ហើយគេងកើយភ្លៅស្រី សន្សើមជោកដីប្រោះព្រំចិន្តា ចង្កៀង ប្លុងៗ ក្នុងខ្ទមជរា ប្រវត្តិស្នេហាចារដោយលោហិត ។ បន្ទរ-នេះគឺដួងចន្ទក្នុងដៃរាហូ ផែនថ្ពាល់ទាំងក្រអូបផ្អែមឆ្អិត ទឹកភ្នែកស្រីម៉ុមបងសូមថើបផ្តិត ចងក្រងដួងចិត្តនែបនិត្យលុះក្ស័យ ។
៣-ឥឡូវរាហូខ្ជាក់ចន្ទវិញហើយ ឱដួងចន្ទអើយកែវកុំយំអី បើខឹងនឹង បងៗឱ្យប្រល័យ ដកកាំបិតខ្លីប្រហារបងចុះ ៕
ចែករំលែកព័តមាននេះ