អេ​ស្ប៉ា​ញ ៖ លោក Josep Maria Bartomeu អតីត​ប្រធាន​ក្លិប Barcelona ត្រូវ​បាន​ចាប់ខ្លួន​ដោយ​ប៉ូលិស​ពិសេស Mossos d’Esquadra កាលពី​ថ្ងៃ​ទី​០១ ខែមីនា ឆ្នាំ​២០២១ កន្លង​ទៅ​ថ្មី​ៗ​នេះ ដែលជាប់​ទាក់ទង​នឹង​រឿងអាស្រូវ «Barcagate» តាំងពី​ខែកុម្ភៈ ឆ្នាំ​មុន​មក​ម្ល៉េះ​។

សេចក្តីរាយការណ៍​ដំបូង​ពី Cadena SER និង RAC1 បានឱ្យ​ដឹង​ថា នាយក​ប្រតិបត្តិ​គឺ​លោក Oscar Grau និង​មេធាវី Roman Gomez Ponti ត្រូវ​បាន​ចាប់ខ្លួន​នៅ​ឯ​កីឡដ្ឋាន Camp Nou ខណៈ​​អតីត​នាយក​ប្រតិបត្តិ​គឺ​លោក Jaume Masferrer និង​លោក Bartomeu ត្រូវ​បាន​ចាប់ខ្លួន​នៅឯផ្ទះ​របស់​ពួក​គាត់​។

ការ​សម្រេចចិត្ត​ចាប់ខ្លួន​បុគ្គល​ខាងលើ មិនមែន​ជា​ការ​សម្រេច​របស់​តុលាការ​ឡើយ​។ ហើយ​យោង​តាម​ប្រព័ន្ធ​យុត្តិធម៌​ប្រចាំ​តំបន់​កា​តា​ឡាន​បាន​បង្ហើប​ថា ការ​ចាប់ខ្លួន​នេះ​គឺជា​ការ​សេចក្តីសំរេច​ផ្តាច់មុខ​របស់​ប៉ូលិស​ពិសេស Mossos d’Esquadra​។ ខណៈ​ដែល​តុលាការ​គ្រាន់តែ​បញ្ជា​ឱ្យ​ចុះស្រាវជ្រាវការិយាល័យ​ក្លិប​តែ​ប៉ុណ្ណោះ​។

គូសបញ្ជាក់​ថា «Barcagate» សំដៅលើ​ការ​ស៊ើបអង្កេត ដែល​កំពុង​ដំណើរការ​លើ​រដ្ឋបាល​របស់​អតីត​ប្រធាន​ក្លិប Barcelona ដែល​ត្រូវ​បាន​ចោទប្រកាន់​ពី​បទ​ចរាចរប្រាក់​ខុសច្បាប់​លួចលាក់​តាម​ប្រព័ន្ធ​អ៊ីនធឺណិត​សម្រាប់​ក្លិប​៕ (​ដកស្រង់​ចេញពី Marca)