លោក អ៊ួន បឋម ហៅសាយ ក្រោយទទួលបានពាន ប្រកាសជំហានទី២ ដើម្បីសប្បុរសធម៌
- ភ្នំពេញ
រាជធានីភ្នំពេញ ៖ កាលពីរសៀលថ្ងៃទី៣០ មករា ឆ្នាំ២០២១ មុននេះ លោកអ៊ួន បឋម ហៅ សាយ…
រាជធានីភ្នំពេញ ៖ កាលពីរសៀលថ្ងៃទី៣០ មករា ឆ្នាំ២០២១ មុននេះ លោកអ៊ួន បឋម ហៅ សាយ បានប្រកាសបិទបញ្ចប់សកម្មភាពរត់ដើម្បីសប្បុរសធម៌ ដែលបានគៀរគរជំនួយជាច្រើនជួយដល់មន្ទីរពេទ្យកុមារអង្គរនៅខេត្តសៀមរាបនោះ ។ ការប្រកាសបិទបញ្ចប់នោះ មិនមែនមានន័យថា លោកនឹងដើរចេញពីការធ្វើសកម្មភាពរៃអង្គាសជួយដល់គម្រោងដែលលោកបានធ្វើប៉ុណ្ណោះទេ ពោលគឺលោកបានប្រកាសគម្រោងមួយផ្សេងទៀត ដែលគម្រោងថ្មីនេះ គឺនឹងរំពឹងថា នឹងទទួលបានជំនួយច្រើនលើសពីមុនទៀត ដើម្បីមន្ទីរពេទ្យកុមារអង្គរខេត្តសៀមរាប។
លោក អ៊ួន បឋម ហៅសាយ បានថ្លែងបញ្ជាក់ថា នៅចុងខែមករា កន្លងទៅ គឺជាការបិទបញ្ចប់សកម្មភាពរបស់លោក ដោយសកម្មភាពរត់របស់លោកដែលបានឆ្លងកាត់ជាច្រើនខេត្តនោះ បានទទួលនូវបទពិសោធយ៉ាងច្រើនដែលលោកអះអាងថា គឺរត់បានចម្ងាយផ្លូវរហូតដល់ជាង២៤០០គីឡូម៉ែត្រ ជុំវិញប្រទេសកម្ពុជា ២១ខេត្ត ។
ក្នុងសកម្មរត់នេះ លោកថាមិននឹកស្មានថានឹងមានជីវិតត្រឡប់មកវិញនោះទេ ដោយក្នុងកាលៈទេសៈខ្លះ គឺលោកជួបប្រទះនូវឧបសគ្គជាច្រើន។ លោកថា ប្រជាពលរដ្ឋជាច្រើនបានជួយផ្ដល់បាយទឹកឱ្យលោក ផ្ដល់កន្លែងស្នាក់នៅ ខណៈមន្ត្រីប៉ូលិស ក៏ជួយលោកលើផ្នែកចរាចរ ដែលធ្វើឱ្យសកម្មភាពរត់រយៈពេល៩៩ថ្ងៃលោកបញ្ចប់ទៅដោយជោគជ័យ ។ លោកកាន់តែរំភើបចិត្ត នៅពេលសកម្មភាពលោកទៅដល់ទីតាំងខេត្តក្រុងម្ដងៗ គឺមានពលរដ្ឋនិងមន្ត្រីគ្រប់ជាន់ថ្នាក់ស្វាគមន៍លោក ដែលធ្វើឱ្យលោកមានភាពកក់ក្ដៅ ។
ជាមួយនឹងបទពិសោធន៍នេះហើយ ដែលលោកប្រកាសថា នឹងស្វែងរកដៃគូផលិតជាភាពយន្តមួយ ដែលនិយាយពីការរត់សប្បុរសធម៌រយៈពេល៩៩ថ្ងៃរបស់លោក ដើម្បីឱ្យភាពយន្តនេះ បានរួមចំណែកកាន់តែច្រើន ជួយដល់មន្ទីរពេទ្យកុមារអង្គរ ។ ភាពយន្តដែលគ្រោងផលិតនោះ គឺនិយាយពីការតស៊ូ បង្ហាញពីរឿងរ៉ាវដ៏លំបាកជាច្រើន នៅពីក្រោយការរត់ និង បង្ហាញពីទឹកចិត្តដ៏ច្រើនឥតគណនារបស់បងប្អូនខ្មែរ ដែលបានជួយយកអាសារលោក នៅក្នុងសកម្មភាពរត់។ ភាពយន្តនេះ លោកប្រកាសលក់សំបុត្រ ហើយលុយដែលបានពីការឧបត្ថម្ភ និងបានពីការដាក់បញ្ចាំងតាមរោង គឺប្រគល់ជូនមន្ទីរពេទ្យកុមារអង្គរទាំងអស់ ដែលការប្រកាសរបស់លោកបានធ្វើឱ្យមានការសរសើរយ៉ាងខ្លាំង នៅក្នុងពិធីបិទបញ្ចប់ពីសកម្មភាពរត់នោះ។
គណៈអធិបតីដែលបានចូលរួមក៏បង្ហាញនូវការស្ងើចសរសើរចំពោះទឹកចិត្តលះបង់របស់លោកផងដែរ ដោយការប្រកាសបង្កើតភាពយន្តដើម្បីបន្តស្វែងរកថវិកាជួយដល់មន្ទីរពេទ្យកុមារអង្គររនេះ នឹងក្លាយជាសញ្ញាណថ្មីមួយ ដើម្បីបំផុសឱ្យសប្បុរសជនដែលមានបំណងចង់ជួយនឹងមានឱកាសជួយដល់មន្ទីរពេទ្យកុមារអង្គរកាន់តែច្រើន តាមរយៈការប្រកាសផលិតនូវស្នាដៃមួយនេះ។
លោក សាយ បន្តថា លោកនឹងប្រើអាជីព និងជីវិតរបស់លោកដើម្បីជាប្រយោជន៍ចំពោះកុមារឱ្យបានកាន់តែច្រើនបន្ថែមទៀត ហើយក្រៅពីគម្រោងបង្កើតភាពយន្តនេះ លោកក៏នឹងបង្កើតគម្រោង Let’go with Sai ដើម្បីរៃលុយឱ្យបានច្រើនបន្ថែមទៀតសម្រាប់យកទៅជួយដល់មន្ទីរពេទ្យកុមារ៕
ចែករំលែកព័តមាននេះ