ដឹងការពិតហើយ! ករណីវត្ថុបុរាណ១ខាំតម្លៃ៧០លានដុល្លារ
- ភ្នំពេញ
រាជធានីភ្នំពេញ ៖ ជនសង្ស័យចំនួន៤នាក់ ដែលពាក់ព័ន្ធរៀបចំលក់ដូរលោហៈធាតុ ស៊ី រំសេវ (អកកំបោរធ្វើពីសំរិទ្ធ) ដែលគេអះអាងថា មានតម្លៃ៧០លានដុល្លារ ក្នុង១ខាំ…
រាជធានីភ្នំពេញ ៖ ជនសង្ស័យចំនួន៤នាក់ ដែលពាក់ព័ន្ធរៀបចំលក់ដូរលោហៈធាតុ ស៊ី រំសេវ (អកកំបោរធ្វើពីសំរិទ្ធ) ដែលគេអះអាងថា មានតម្លៃ៧០លានដុល្លារ ក្នុង១ខាំ ត្រូវបាននគរបាលខណ្ឌឬស្សីកែវកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញនៅស្អែកថ្ងៃទី២១ ខែធ្នូ ឆ្នាំ២០២០ ដើម្បីចាត់ការតាមច្បាប់។ គួររំលឹកថា វត្ថុបុរាណ១ខាំ«៧០លានដុល្លារ» កំពុងយកទៅពិនិត្យថា«ពិតឬមិនពិត»
ទោះបីជាយ៉ាងណា វត្ថុបុរាណដែលសមត្ថកិច្ចខណ្ឌឬស្សីកែវ សហការណ៍ជាមួយមន្ត្រីជំនាញ នៃក្រសួងវប្បធម៌ និងវិចិត្រសិល្បៈ និងសមត្ថកិច្ចខេត្តស្ទឹងត្រែងដកហូតបានកាលពីព្រឹកថ្ងៃទី១៩ ខែធ្នូ ហើយបានធ្វើការត្រួតពិនិត្យរកឃើញថា អកកំបោរនោះមានទម្ងន់៣ខាំមិនសុទ្ធនោះទេ ធ្វើអំពីស្ពាន ។
ជនសង្ស័យទាំង៤នាក់ខាងលើ ត្រូវបាននគរបាលអោយដឹងថា ១-ឈ្មោះសួង តាក់ អាយុ២៩ឆ្នាំ ស្នាក់នៅភូមិកាំងដែក ឃុំកោះស្រឡាយ ស្រុកសៀមបូក ខេត្តស្ទឹងត្រែង ជាអ្នកលក់
២-ឈ្មោះ ទូច ប៊ុនថា ភេទប្រុស អាយុ៥១ឆ្នាំ មានទីលំនៅ ភូមិចាំយាម ឃុំបាក់ខ្លង ស្រុកមណ្ឌលសីមា ខេត្តកោះកុង ជាអ្នកទិញ ៣-ឈ្មោះសេង ទៀត ភេទប្រុស អាយុ៥៧ឆ្នាំ មានទីលំនៅភូមិស្រែឫស្សី ឃុំស្រែប្ញស្សី ស្រុកថាលាបរីវ៉ាត់ ខេត្តស្ទឹងត្រែង មុខរបរគ្រូថ្នាំខ្មែរ ជាអ្នកទិញ និង៤-ឈ្មោះ ប៊ុន សំអាត ភេទប្រុស អាយុ៤៧ឆ្នាំ មានទីលំនៅ ភូមិភ្នំខៀវ ឃុំអូរៀង ស្រុកសំបូ ខេត្តក្រចេះ ជាអ្នកទិញ។
ជនសង្ស័យទាំងអស់ខាងលើត្រូវបាននគរបាលខណ្ឌឬស្សីកែវឃាត់ខ្លួនកាលពីវេលារសៀលថ្ងៃទី១៧ ខែធ្នូ ឆ្នាំ២០២០ នៅចំណុចមុខផ្ទះលេខ32 ផ្លូវA បុរីហុងលេងយី ភូមិបឹងឈូក សង្កាត់គីឡូម៉ែត្រលេខ6 ខណ្ឌឫស្សីកែវ រាជធានីភ្នំពេញពាក់ព័ន្ធទិញលក់ទិញលក់អកកំបោរ ដែលអះអាងថា ជាវត្ថុបុរាណ។
តាមព័ត៌មានបានអោយដឹងថា នៅថ្ងៃទី៨ ខែធ្នូ ឆ្នាំ២០២០ ជនសង្ស័យឈ្មោះសួង តាក់ បានប្រាប់អោយជនសង្ស័យឈ្មោះប៊ុន សំអាត ដែលរកឈ្មួញទិញវត្ថុបុរាណរបស់ខ្លួនក្នុងតំលៃ២០លានដុលារអាមេរិក ហើយជនសង្ស័យឈ្មោះ ទូច ប៊ុនថា និងឈ្មោះសេង ទៀត ក៏បានឯកភាពយល់ព្រមទិញក្នងតំលៃខាងលើ និងបានកក់ប្រាក់ចំនួន១០០០ដុល្លារ ដំណាក់កាលទីមួយ។ លុះដល់ថ្ងៃទី៩ ខែធ្នូ ឆ្នាំ២០២០ ជនសង្ស័យបានកក់ប្រាក់បន្ថែមចំនួន៣.៦០០.០០០រៀលទៀត ដោយសន្យាប្រគល់វត្ថុបុរាណពេលដែលប្រគល់លុយគ្រប់នៅថ្ងៃទី១៤ ខែធ្នូ ឆ្នាំ២០២០ ។
តាមព័ត៌មានអោយដឹងទៀតថា ក្រោយមកឈ្មោះសួង តាក់ បានរត់គេចខ្លួនមិនប្រគល់របស់ លុះមកដល់ថ្ងៃទី១៧ ខែ១២ ឆ្នាំ២០២០ វេលាម៉ោង៣និង៣០នាទីរសៀល ជនសង្ស័យទូច ប៊ុនថា, សេង ទៀត និងឈ្មោះប៊ុន សំអាត តាមរកជនសង្ស័យ សួង តាក់ ឃើញនៅចំណុចភូមិបឹងឈូក សង្កាត់គីឡូម៉ែត្រលេខ៦ ខណ្ឌប្ញស្សីកែវ រាជធានីភ្នំពេញ ពេលកំពុងទំនាស់ពាក្យសម្ដីគ្នា ហើយត្រូវកម្លាំងល្បាតប៉ុស្តិ៍ឃើញក៏បានសួនាំ និងឃាត់ខ្លួនតែម្ដង ។
បន្ទាប់ពីឃាត់ខ្លួន សមត្ថកិច្ចដកហូតឯកសារកិច្ចសន្យាទិញលក់វត្ថុបុរាណចំនួន៩ច្បាប់ ស្មើរនឹង១៩សន្លឹក និងលុយចំនួន១៤០០ដុល្លារ។
នៅក្នុងឯកសារ មាន២ដំណាក់កាល ដែល ១គឺជនសង្ស័យ ឈ្មោះ សួង តាក់ ដែលជាម្ចាស់ ធ្វើកិច្ចសន្យាលក់ ទៅអោយឈ្មោះ ប៊ុន សំអាត ក្នុងតម្លៃ ២០លានដុល្លារនិង ធានា សងជាសោហុយចំនួន៣ពាន់ដុល្លារ បើសិន ពិសោធន៍ មិនសុទ្ធ។ក្នុងកិច្ចសន្យានោះ ក៍មានអោយដឹងថា វត្ថុបុរាណ មានទង្ងន់ ១,៧ខាំ។
ដោយឡែក ដំណាក់ការទី២ មានឯកសារមួយទៀត ដែលម្ចាស់ឈ្មោះ សួង តាក់ បានប្រគល់សិទ្ធិដោយមនុស្ស៤នាក់១-ឈ្មោះ ប៊ុន សំអាត ភេទប្រុសអាយុ ៤៧ឆ្នាំ, ២-ឈ្មោះទូច ប៊ុនថា, ៣-ឈ្មោះសេង ទៀត និង៤-ឈ្មោះញ៉ៃ ស៊ុយលី ហើយបានព្រមព្រៀងលក់វត្ថុបុរាណនោះទៅអោយក្រុមហ៊ុន ដែលមានតំណាង៣នាក់ ១-ឈ្មោះផាន់ សុធា ,២.សាន វុទ្ធីនិង៣.ឈ្មោះញឹក មួន ។
អ្នកទាំង៣នាក់ធានាអះអាងថា ក្រុមហ៊ុនដែលមានអាជ្ញាប័ណ្ណស្របច្បាប់ក្នុងការទិញលោហៈធាតុខាងលើ ។ ក្នុងលិខិតកាតព្វកិច្ចទទួលខុសត្រូវរបស់ភាគីតំណាងក្រុមហ៊ុន នោះក៍មានហត្ថលេខា និង ត្រាមេធាវី សេង សុទ្ធសំរិទ្ធផងដែរ ។ នៅក្នុងឯកសារព្រមព្រៀង លក់កេរ្តិ៍ មរតកឯកជនខាងលើបន្តនោះ ក៍បានអោយដឹងថា ក្នុងតម្លៃ១ខាំ៧០លានដុល្លារនិងទាមទារតម្លៃសេវាបង់ខាតពេលវេលាចំនួន ៣ពាន់ដុល្លារ ក្នុងករណីដែលក្រុមហ៊ុន មកដល់ក្នុងរយៈពេល២ម៉ោង បែរជាគ្មានរបស់មានប្រសិទ្ធិភាពដូចការធានារបស់ភាគី.ក ដែលជាអ្នកលក់នោះ ។
បន្ទាប់ពីឃាត់ខ្លួន សមត្ថកិច្ចខណ្ឌឬស្សីកែវ បានសហការជាមន្ត្រីនាយកដ្ឋានបេតិកភណ្ឌនៃ ក្រសួង វប្បធម៌ និងវិចិត្រសិល្បះដោយនាំម្ចាស់ទៅកាន់ខេត្តស្ទឹងត្រែងហើយ ឈានទៅដកហូតបានអកកំបោរនោះនៅព្រឹកថ្ងៃទី១៩ ខែធ្នូ ឆ្នាំ២០២០ ។
តាមនគរបាលអោយដឹងថា បន្ទាប់ពីមន្ត្រីជំនាញធ្វើការត្រួតពិនិត្យ និងធ្វើការពិសោធន៍ អកកំបោរនោះមិនសុទ្ធនោះទេ ធ្វើអំពីស្ពាន ។ ជនសង្ស័យត្រូវបានសមត្ថកិច្ចកសាងសំណុំរឿងចោទពីបទលក់ដូរវត្ថុបុរាណហើយ ត្រូវបានបញ្ជូនទៅកាន់សាលាដំបូងរាជធានីភ្នំពេញដើម្បីចាត់ការតាមច្បាប់នៅថ្ងៃស្អែក ទី២១ ធ្នូ ឆ្នាំ២០២០ ៕ (កែសម្រួលដោយ ៖ ធីតា)
ចែករំលែកព័តមាននេះ