រាជធានីភ្នំពេញ៖ នៅថ្ងៃទី៤ ខែសីហា ឆ្នាំ២០២០នេះ នៅទីបញ្ជាការវរសនាតូចថ្មើរជើងលេខ៥៣៤ កងពលតូចថ្មើរជើងលេខ៥៣ នៃយោធភូមិភាគទី៥ បានប្រារព្ធពិធីបើកវគ្គហ្វឹកហ្វឺនបំប៉ន វិន័យ សណ្តាប់ធ្នាប់ បច្ចេកទេស យុទ្ធវិធី ដល់នាយទាហាន នាយទាហានរង និងពលទាហាន ក្រោមអធិបតីភាព ឧត្តមសេនីយ៍ត្រី កែវ សេងលន មេបញ្ជាការកងពលតូចថ្មើរជើងលេខ៥៣។ តាមរបាយការណ៍បើកវគ្គហ្វឹកហ្វឺននេះ គឺដើម្បីពង្រឹងសមត្ថភាព វិន័យសណ្តាប់ធ្នាប់ ចំណេះដឹងថ្មីៗដល់កម្លាំងអន្តរាគមន៍អោយយល់កាន់តែច្បាស់ ទាំងផ្នែកយុទ្ធវិធី និងជំនាញ។
វគ្គហ្វឹកហ្វឺនមានសិក្ខាកាមចូលរួមចំនួន ៥៥នាក់ រយៈពេលហ្វឹកហ្វឺន៤៥ថ្ងៃ លើមុខវិជ្ជា យោធារួម លំហាត់របៀប ប្រជុំជួរ យុទ្ធវិធីអាវុធគ្រាប់ យុទ្ធវិធីថ្មើរជើង កីឡា និងអប់រំចិត្តសាស្ត្រ។
លោកឧត្តមសេនីយ៍ត្រី កែវ សេងលន មេបញ្ជាការកងពលតូចថ្មើរជើងលេខ៥៣ បានលើកអំពីភារកិច្ចរបស់កងយោធពលខេមរភូមិន្ទ ក្នុងពេលប្រទេសជាតិមានសុខសន្តិភាព មានការអភិវឌ្ឍន៍ គឺចាំបាច់ត្រូវធ្វើការហ្វឹកហាត់បំប៉នសមត្ថភាព។ កងទ័ពត្រូវរៀនសូត្រ ហ្វឹកហ្វឺនជានិច្ច និងត្រូវខិតខំ ពង្រឹងកសាង អង្គភាពរឹងមាំលើគ្រប់វិស័យ ក្នុងនោះមានការងារបង្កបង្កើនផលចិញ្ចឹមសត្វ ដើម្បីផ្គត់ផ្គង់ជីវភាពរស់នៅដល់កងទ័ពអោយបានសមរម្យ។
លោកឧត្តមសេនីយ៍ត្រី ក៏បានលើកឡើងពីសភាពការណ៍ជាតិ និងអន្តរជាតិ ជូនដល់ នាយទាហាន នាយទាហានរង ពលទាហាន ព្រមទាំងសិក្ខាកាម ធ្វើការសិក្សាស្វែងយល់ ជំរុញការយកចិត្តទុកដាក់ខ្ពស់ ក្នុងការចូលរួមថែរក្សា ការពារសុខសន្តិភាព អោយបានគង់វង្ស។
លោកឧត្តមសេនីយ៍ត្រី បានផ្តាំផ្ញើដល់សិក្ខាកាមត្រូវខិតខំរៀនសូត្រ គោរពវិន័យរបស់វគ្គ និងត្រូវជៀសអោយឆ្ងាយពីគ្រឿងញៀន ជាមួយគ្នានោះត្រូវយកចិត្តទុកដាក់ខ្ពស់ ថែទាំសុខភាព ទប់ស្កាត់ និងបង្ការជម្ងឺកូវីដ-១៩ តាមការណែនាំរបស់ក្រសួងសុខាភិបាលបានដាក់ចុះ ។ តំណាងកម្មសិក្សាការី ព្រិន្ទបាលឯក ម៉ៅ ប៉ូលីន បានឡើងប្តេជ្ញាចិត្ត ខិតខំរៀនសូត្រ ត្រងត្រាប់ នូវមេរៀនដែលគ្រូយោធាចារ្យ បង្ហាត់បង្រៀន ដើម្បីយកចំណេះដឹងទៅអនុវត្តនៅអង្គភាពរបស់ខ្លួន និងប្តេជ្ញាការពារជាតិ សាសនា ព្រះមហាក្សត្រ ការពាររាជរដ្ឋាភិបាលស្របច្បាប់ ។
ក្រោយប្រកាសបើកវគ្គហ្វឹកហ្វឺន ឧត្តមនីយ៍ត្រី កែវ សេងលន មេបញ្ជាការកងពលតូចថ្មើរជើងលេខ៥៣ ព្រមទាំងប្រតិភូអមដំណើរក៏បានចុះត្រួតពិនិត្យមើលការកសាងអង្គភាព និងការដាំដុះ ចិញ្ចឹមសត្វ ក្នុងទីបញ្ជាការវរសេនាតូច៥៣៤ ផងដែរ៕ (កែសម្រួលដោយ ៖ ធីតា)
ចែករំលែកព័តមាននេះ