សាលាខេត្ត​ព្រៃវែង​ស្នើ​ក្រសួង​វប្បធម៌​ចាត់វិធានការ​ផ្លូវច្បាប់​លើ​ម្ចាស់​ផលិតកម្ម​រឿង​បទ​ចម្រៀង​ដៀល​អ្នក​ព្រៃវែង


ខេត្តព្រៃវែង ៖ ដោយ​សង្កេត​ឃើញ​ថា បទ​ចម្រៀង​មួយ​បទ​ដែល​មាន​ចំណងជើង​ថា «​អ្នក​ព្រៃវែង​អាក្រក់​ត្រង់​ណា​» កំពុង​បង្ក​នូវ​ការ​រិះគន់ និង​ប្រតិកម្ម​ខ្លាំង​ពី​សំណាក់​ថ្នាក់ដឹកនាំ​ជួរ​រាជរដ្ឋាភិបាល​ផង និង​ប្រជាជន​សាមញ្ញ​ផង​នោះ ស្រាប់​ពេល​នេះ​រដ្ឋបាល​ខេត្តព្រៃវែង​បាន​សរសេរ​លិខិត​ជូន​រដ្ឋមន្ត្រីក្រសួង​វប្បធម៌ និង​វិចិត្រសិល្បៈ​ឲ្យ​ចាត់វិធានការ​ចំពោះ​ផលិតកម្ម​មរតក មេ​ឌៀ (Morodok Media) ដែល​បាន​បង្ហោះ​ឃ្លី​ប​វី​ដេ​អូ​បទ​ចម្រៀង​ខាងលើ​នេះ ។

យោង​តាម​លិខិត​របស់​សាលាខេត្ត​ព្រៃវែង ចុះហត្ថលេខា​ដោយ​ឯកឧត្តម​អភិបាលខេត្ត ជា សុ​មេធី ចុះ​ថ្ងៃ​ទី​៣ មិថុនា បាន​បញ្ជាក់​ថា ផលិតកម្ម​ខាងលើ កាលពី​ថ្ងៃ​ទី​០២ កក្កដា បាន​បង្ហោះ​ឃ្លី​ប​វី​ដេ​អូ​បទ​ចម្រៀង «​អ្នក​ព្រៃវែង​អាក្រក់​ត្រង់​ណា​» ក្នុង​បណ្តាញ​ផ្សព្វផ្សាយ​សង្គម និង​បណ្តាញ​យូ​ធូប «​ដែល​ខ្លឹមសារ និង​រូបភាព​នោះ​បាន​និយាយ​ថា «​អ្នក​ព្រៃវែង​សុទ្ធ​អ្នក​មិនល្អ ពូជ​ចោរលួច ចោរប្លន់ កាប់​ចាក់ សុំទាន និង​ជា​អ្នកក្រ​» ។

នៅ​ក្នុង​លិខិត​បាន​បញ្ជាក់​ថា អត្ថន័យ​ឃ្លី​ប​វី​ដេ​អូ​បទ​ចម្រៀង​នេះ រដ្ឋបាល​ខេត្តព្រៃវែង​យល់​ឃើញ​ថា ៖ «១- ជា​ការ​ប្រមាថ​យ៉ាងធ្ងន់ធ្ងរ​មក​លើ​កិត្តិយស សេចក្តី​ថ្លៃថ្នូរ និង​សតិអារម្មណ៍ ប្រជាពលរដ្ឋ​ខេត្តព្រៃវែង ។ ២- ជា​ការ​ចោទប្រកាន់​ដោយ​គ្មាន​មូលដ្ឋាន​ច្បាស់លាស់ និង​អយុត្តិធម៌ មក​លើ​ប្រជាពលរដ្ឋ​ខេត្តព្រៃវែង ។ ៣- បង្កើត​នូវ​ការ​រើសអើង​យ៉ាងធ្ងន់ធ្ងរ ចំពោះ​ប្រជាពលរដ្ឋ​ខេត្តព្រៃវែង ។ ៤- ជា​សកម្មភាព​វិទ្ធង្សនា​វប្បធម៌​ធ្ងន់ធ្ងរ ចំពោះ​ប្រជាជាតិ​កម្ពុជា ។

លោក​អភិបាលខេត្ត​ព្រៃវែង​បាន​បញ្ជាក់​បន្ថែម​ក្នុង​លិខិត​ថា ផ្អែក​តាម​ខ្លឹមសារ​ខាងលើ រដ្ឋបាល​ខេត្ត​ព្រៃ​វេ​ង សូម​ស្នើ​សុំ ១- ចាត់វិធានការ​ច្បាប់​ចំពោះ​ផលិតកម្ម មរតក មេ​ឌៀ ជា​ពិសេស​ពាក់ព័ន្ធ​ទៅ​នឹង​បទល្មើស​ញុះញង់ បង្ក​ឲ្យ​មានការ​រើសអើង និង​ប្រព្រឹត្ត​បទល្មើស​។ ២- ផលិតកម្ម មរតក មេ​ឌៀ ត្រូវ​លុប​ឃ្លី​ប​វី​ដេ​អូ និង​ធ្វើការ​បកស្រាយ​សុំ​ទោស​ជា​សាធារណៈ​» ។

យ៉ាងណាមិញ គិត​ត្រឹម​ម៉ោង ៥ និង​៣០ នាទី​រសៀល​ថ្ងៃ​ទី​៥ កក្កដា​នេះ នៅ​មិន​ទាន់​ឃើញ​មានការ​បកស្រាយ​ណាមួយ​ពី​ម្ចាស់​ផលិតកម្ម​ឡើយ ៕

Facebook Google Twitter Email

Live

Sponsored News

ការស្ទង់មតិគេហទំព័រថ្មី




សូម​អរគុណ