នៅទីបំផុតតារាចម្រៀងនាង ពេជ្រ សូលីកា បានសម្រាលកូនប្រុសបានម្នាក់ តាមបំណងហើយបន្ទាប់ពីនាងបានភ្ជាប់ពាក្យ កាលពីបំណាច់ឆ្នាំ២០១៩ កន្លងមកនេះ ។
បើទោះបីភ្លេងការមិនទាន់បន្លឺឡើង ហើយនាងមានកូនមុនរៀបការក៏ដោយ ប៉ុន្តែដំណឹងពីការសម្រាលកូនរបស់ពេជ្រ សូលីកា នាពេលនេះបានទទួលការសាទរយ៉ាងច្រើនពីប្រិយមិត្តគាំទ្រ ។
ជាមួយនឹងរូបថតកូនទើបនឹងសម្រាលអ្នកម្តាយវ័យក្មេងនាង ពេជ្រ សូលីកា បានភ្ជាប់ជាមួយនឹងសារថា ជំរាបសួរលោកតា លោកយាយ អ៊ុំ ពូ មីង បង ប្អូន ទាំងអស់គ្នា ។ អូន (កូនរបស់នាង) ឈ្មោះ ហង្ស អ៊ារី វ៉េនស្ដេ Hang Aari Wednesday កើតនៅថ្ងៃទី16 ខែឧសភា ឆ្នាំ2020 វេលាម៉ោង 7:30នាទីព្រឹក ភេទប្រុស មានទម្ងន់ 2.9kg អូនសុំផ្ញើខ្លួន ផ្ញើប្រាណផងណាបាទ ។ កូនរបស់ពេជ្រ សូលីកា នាពេលនេះបានទទួលការសសើរយ៉ាងខ្លាំងពីមហាជន ដោយមានរូបរាងស្រស់ស្អាត មិនខុសអ្វីទៅនឹងសម្រស់ឪពុកម្តាយរបស់គេនោះឡើយ ។
ពេជ្រ សូលីកា បានភ្ជាប់ពាក្យជាមួយនឹងបុរសអ្នកឆ្នៃម៉ូតដ៏ល្បីល្បាញ គឺលោក គីម ហាន កាលពីចុងឆ្នាំ២០១៩ ។ ពិធីភ្ជាប់ពាក្យរបស់នាងបានបង្កអោយមានការភ្ញាក់ផ្អើលយ៉ាងខ្លាំងពីមហាជន ក្នុងពេលដែលស្ងាត់ៗនាងបែជាភ្ជាប់ពាក្យ ខណៈពេលដែលមានពាក្យអារាមថា នាងកំពុងរស់នៅយ៉ាងមានសេចក្តីជាមួយមន្ត្រីថ្នាក់ខ្ពស់មួយរូបដែលមានទ្រព្យសម្បត្តិស្កុកស្តម្ភ ។
យ៉ាងណា ការភ្ជាប់ពាក្យរបស់ពេជ្រ សូលីកា នាពេលនេះ គឺជាការបំបែកពាក្យចចាមអារាមខាងលើនេះ ក្នុងពេលដែលអនាគតស្វាមីរបស់នាងមិនមែនជាមនុស្សមានឋានៈខ្ពស់ដូចការយល់ឃើញនោះឡើយ ។ ទោះជាយ៉ាងណាប្រិយមិត្តគាំទ្ររំពឹងថា ចំណងដៃកូនប្រុសលើកដំបូងរបស់នាងនាពេលនេះនឹងរិតធ្វើអោយចំណងស្នេហ៍រវាងនាង និងអនាគតស្វាមីកាន់តែមានភាពផ្អែមល្ហែមថែមទៀត ៕
ចែករំលែកព័តមាននេះ