រាជធានីភ្នំពេញ ៖ លោកនាយឧត្តមសេនីយ៍ បណ្ឌិតម៉ៅ ហាវណ្ណាល់ រដ្ឋមន្រ្តីទទួលបន្ទុករដ្ឋលេខាធិការដ្ឋានអាកាសចរស៊ីវិលបានចាត់តាំងមន្ត្រី២រូប មកទទួលថ្នាំបាញ់សម្លាប់មេរោគលើយន្តហោះចំនួន២០ធុង (ក្នុង១ធុងមានទឹកថ្នាំចំណុះ២៥លីត្រ)និងឧបករណ៍បាញ់ថ្នាំចំនួន៤០គ្រឿង ពីស្ថានទូតចិនប្រចាំនៅព្រះរាជាណាចក្រកម្ពុជា ។ នេះបើយោងតាមប្រភពពីរដ្ឋលេខាធិការដ្ឋានអាកាសចរស៊ីវិល ។
យោងប្រភពខាងលើបានគូសបញ្ជាក់ទៀតថា ការផ្តល់សម្ភារខាងលើជាការឆ្លើយតបតាមការសន្យារបស់ លោកស្រីលោកស្រី Zuo Wenxing អនុប្រធានស្ថានបេសកកម្ម និងជាទីប្រឹក្សានយោបាយ (Deputy Chief of Mission and Political Counselor of the Chinese Embassy ) ប្រចាំស្ថានទូតចិន ដែលបានសន្យាផ្តល់នូវឧបរណ៍សម្ភារ និងថ្នាំសម្លាប់មេរោគ ក្នុងឱកាស ជំនួបពិភាក្សាការងារជាមួយលោកនាយឧត្តមសេនីយ៍បណ្ឌិត ម៉ៅ ហាវណ្ណាល់ កាលពីថ្ងៃទី១១ មីនា ឆ្នាំ២០២០ កន្លងទៅ ។
លោកនាយឧត្តមសេនីយ៍បណ្ឌិត ម៉ៅ ហាវណ្ណាល់ បានមានប្រសាសន៍ថា ថ្នាំបាញ់២០ធុងនិងឧបករណ៍៤០គ្រឿងមានសារសំខាន់ណាស់ សម្រាប់បាញ់លើយន្តហោះពិសេស ( VVIP Flight) ជាព្រះទីនាំងនៃព្រះករុណា ព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្ដេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ, សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងថ្នាក់ដឹកនាំកំពូលៗនៃរាជរដ្ឋាភិបាលកម្ពុជា និងសម្រាប់បាញ់លើក្រុមហ៊ុនអាកាសចរណ៍កម្ពុជាដែលត្រូវការចាំបាច់។
លោកនាយឧត្តមសេនីយ៍បណ្ឌិតក៏បានជូនលិខិតថ្លែងអំណរគុណដល់ លោក Wang Wentian ឯកអគ្គរដ្ឋទូតវិសសាមញ្ញ និងពេញសមត្ថភាពស្ថានទូតចិន ប្រចាំព្រះរាជាណាចក្រកម្ពុជា ដែលបានផ្តល់នូវឧបករណ៍ សម្ភារ និងថ្នាំសម្លាប់មេរោគខាងលើ ដែលរដ្ឋលេខាធិការដ្ឋានអាកាសចរស៊ីវិល កំពុងត្រូវការជាចាំបាច់ និងលោកនាយឧត្តមសេនីយ៍បណ្ឌិតបានគួសបញ្ជាក់បន្ថែមថា នេះជានិមិត្តរូបនៃកិច្ចសហប្រតិបត្តិការគ្រប់វិស័យក្រោមពាក្យស្លោក «មិត្តភាពដែកថែប៖ កម្ពុជា-ចិន»។
ដើម្បីទប់ស្កាត់ និងការពារការរាលដាលមេរោគ កូវិត ១៩ (COVID 19) រដ្ឋលេខាធិការដ្ឋានអាកាសចរស៊ីវិល កំពុងអនុវត្តនូវវិធានការវាស់កំដៅយ៉ាងតឹរឹងគ្រប់មន្ត្រីថ្នាក់ដឹកនាំ និងភ្ញៀវជាតិ-អន្តរជាតិ ទាំងអស់ពេលចូលធ្វើការ និងមកដល់ក៏បានបាញ់ថ្នាំសម្លាប់មេរោគ ក្នុងបរិវេណអគារធ្វើការ និងគ្រប់នាយកដ្ឋាន ព្រមទាំងការិយាល័យធ្វើការទាំងអស់ ក្នុងគោលបំណង ទប់ស្កាត់ និងការពារ ការរាលដាលមេរោគ កូវិត ១៩ (COVID 19)ដែលជាសត្រូវមើលមិនឃើញ ។ ចំពោះមន្ត្រីដែលបញ្ចប់បេសកម្មក្រៅប្រទេស ពេលមកដល់នឹងតម្រូវឱ្យនៅដាច់ដោយឡែក និងនៅគេហដ្ឋានចំនួន១៤ ថ្ងៃសិនមុនចាប់ផ្តើមធ្វើការ។
ចែករំលែកព័តមាននេះ