តារាចម្រៀង ស៊ុន ស្រីពេជ្រ ជាប់គាំងនៅកាណាដាមិនអាចត្រឡប់មកវិញ

ថ្ងៃទី ១៨ ខែ មីនា ឆ្នាំ ២០២០
ម៉ោង ១៣:៥៩
សុខ វាសនា

តារាចម្រៀងអ្នកនាង ស៊ុន ស្រីពេជ្រ បានខកខានមិនអាចវិលត្រឡប់មកកម្ពុជាវិញតាមការកំណត់ឡើយ ដោយសារតែនាងនៅជាប់គាំងក្នុងប្រទេសកាណាដា ព្រោះការរីករាលដាលយ៉ាងខ្លាំងពីវីរុស COVID-19 នៅតំបន់អឺរ៉ុប និងនៅទូទាំងពិភពលោកទាំងមូល។

តាមគម្រោង ស៊ុន ស្រីពេជ្រ ត្រូវវិលត្រឡប់មកកាន់មាតុប្រទេសវិញ នៅអំឡុងថ្ងៃទី១៦ ខែមីនា ឆ្នាំ២០២០ នេះ បន្ទាប់ពីនាងបានធ្វើដំណើរទៅសម្តែងនៅទឹកដីនៃប្រទេសកាណាដាចំនួន៣ទៅ៤សប្តាហ៍ ជាមួយនឹងពិធីការិនីចាស់វស្សារបស់ស្ថានីយទូរទស្សន៍ គឺអ្នកនាង យុគ្គ ចិន្តា។

តារាចម្រៀងសំនៀងក្រអួនក្រអៅអ្នកនាង ស៊ុន ស្រីពេជ្រ បានអះអាងប្រាប់កោះសន្តិភាពតាមសារអេឡិចត្រូនិចកាលពីថ្ងៃទី១៦ ខែមីនា នេះថា នាងពិតជាបានជាប់គាំងនៅក្នុងប្រទេសកាណាដាប្រាកដមែន ដោយសារតែជំងឺ COVID-19 ទើបមិនមានជើងហោះហើរមកប្រទេសកម្ពុជាឡើយ។

នាងបញ្ជាក់ថា តាមពិតនាងត្រូវត្រឡប់ទៅកាន់មាតុប្រទេសវិញនៅថ្ងៃទី១៦ ខែមីនានេះ តែម្ចាស់ស្ព័នសឺរមិនអាចស្វែងរកជើងហោះហើរណាមួយបានសម្រាប់ជិះទៅកាន់ប្រទេសកម្ពុជាឡើយ បើទោះបីជាមានការខ្នេះខ្នែងពីអ្នករៀបចំកម្មវិធីសម្តែងនៅទីនេះក៏ដោយ។

អ្នកនាង ស៊ុន ស្រីពេជ្រ បានបន្ថែមថា មុនមានការផ្ទុះជំងឺនឹងនាងបានទៅសម្ភាសន៍ និងបានវីសារហើយ ទើបខាង sponsor កក់កន្លែងសំដែង ដោយមានការចូលរួមពីភ្ញៀវច្រើនគួរសម ប៉ុន្តែក្រោយផ្ទុះព័ត៌មានខ្លាំង ពួកយើងក៏ផ្អាកការសំដែងតែម្តងទៅ ខណៈពេលរហូតដល់ថ្ងៃរង់ចាំត្រឡប់ទៅស្រុកខ្មែរវិញ តែគេក៏បិទជើងហោះស្ទើរគ្រប់ច្រកទៅណាមិនរួច។

បើតាមអ្នកនាង ស៊ុន ស្រីពេជ្រ រហូតមកទល់ពេលនេះ នាងនៅមិនទាន់មានដំណឹងពីការវិលត្រឡប់មកកម្ពុជានៅពេលណានោះឡើយ ដោយសារនាងនៅតែបន្តការស្នាក់នៅក្នុងប្រទសកាណាដា ក្នុងពេលដែលវីសារបស់នាងនឹងផុតកំណត់នៅអំឡុងខែកក្កដាខាងមុខនេះ។

យ៉ាងណា នាងមិនមានបំណងចង់ស្នាក់នៅប្រទេសកាណាដានេះរយៈពេលយូរនោះឡើយ ដោយសារតែនាងខាតការងារច្រើននៅស្រុកខ្មែរ ជាពិសេសនាងចង់ជួបជុំគ្រួសារស្វាមី និងកូន ដែលកំពុងរង់ចាំផ្លូវនាងត្រឡប់ទៅវិញ ខណៈពេលក្នុងអំឡុងពេលនេះនាងអាចឃើញមុខស្វាមី និងកូនតាមរយៈវីដេអូខលតែប៉ុណ្ណោះ៕ (កែសម្រួលដោយ ៖ បុប្ផា)