យោងតាមតម្រាទស្សន៍ទាយខ្សែបាតដៃបានរកឃើញថា មានខ្សែបាតដៃបីប្រភេទដែលជាអ្នកមានវាសនាខ្ពស់ហួសអស់មនុស្សទាំងឡាយ សម្បូរសម្បត្តិទ្រព្យ សម្បូរលាភសំណាង មាសប្រាក់ហូរចូលមកដោយឯងៗដោយមិនបាច់ចំណាយកម្លាំងច្រើន ។ ប្រុសស្រីដែលមានខ្សែបាតដៃទាំងបីប្រភេទដូចពោលមកនេះ អ្នកខ្លះក៏ក្លាយជាអ្នកមានលុយក្នុងបឋមវ័យ ខ្លះមានលុយក្នុងមជ្ឈិមវ័យ និងខ្លះទៀតក៏ក្លាយជាអ្នកមានទ្រព្យស្តុកស្តម្ភក្នុងបច្ឆិមវ័យ គឺចៀសមិនផុតឡើយ ។ ខាងក្រោមនេះជាខ្សែបាតដៃ៣ប្រភេទដែលលោកអ្នកអាចមើលដឹងពីឆាកជីវិតរបស់ខ្លួនទៅថ្ងៃមុខបាន៖
១-ខ្សែបាតដៃកណ្ដាល ឬហៅថាខ្សែត្រង់ បន្ទាត់ខ្សែដៃនេះចាប់ផ្ដើមពីគល់កដៃរត់ត្រង់ទៅម្រាមដៃ ជោគវាសនានៃអាជីពការងារមហិច្ឆតា និងទិសដៅបង្ហាញពីភាពជឿជាក់ជាមួយនឹងសមត្ថភាពរបស់ខ្លួន ។ មនុស្សណាដែលមានខ្សែបាតដៃបែបនេះបង្ហាញថាលោកអ្នកមានគោលបំណង និងទិសដៅច្បាស់លាស់ក្នុងជីវិត និងទទួលបានលទ្ធផលដ៏អស្ចារ្យដូចបំណងប្រាថ្នា នាំដំណើរជីវិតទៅរកភាពសប្បាយរីករាយពេញមួយអត្តភាពនេះ ។
២-ខ្សែបាតដៃរៀងបញ្ឆិតបន្តិច រត់ត្រង់ទៅក្រោមម្រាមកូនដៃ គឺជាបន្ទាត់សំខាន់នៃការទំនាក់ទំនង ។ មនុស្សដែលមានខ្សែបាតដៃបែបនេះ ជាមនុស្សមានអាជីវកម្មច្រើន ប្រាក់ហូរចូលដូចទឹកបាក់ទំនប់ រស់នៅលើគំនរទ្រព្យសម្បត្តិដ៏មហាសាល ។
៣-ខ្សែបាតដៃរត់បញ្ឆិតខ្លាំងទៅក្រោមនាងដៃ វាបង្ហាញពីភាពជោគជ័យនៃខ្សែជីវិត ។ ម្ចាស់ខ្សែបន្ទាត់នេះគឺជាអ្នកមានសំណាងល្អក្នុងការរកលុយ ហើយរាល់ការខិតខំប្រឹងប្រែងរបស់លោកអ្នកនឹងទទួលបានរង្វាន់ធំរស់នៅដោយសុខសាន្តពេញមួយជីវិត ។
ទោះជាយ៉ាងណាលោកអ្នកត្រូវខិតខំប្រកបរបររកទទួលទានក្នុងផ្លូវសុចរិតផង កុំផ្តេកផ្តួលទៅតាមព្រេងវាសនាពេកព្រោះថានេះគ្រាន់តែជាក្បួនហោរតែប៉ុណ្ណោះ ។ សាន សារិន
ចែករំលែកព័តមាននេះ