ខេត្តស្ទឹងត្រែង៖ អាជីវករនៅសហគមន៍អេកូទេសចរណ៍ព្រះរំកិល ស្ថិតនៅស្រុកបុរីអូរស្វាយសែនជ័យ បានបង្ហាញនូវការព្រួយបារម្ភពាក់ព័ន្ធនឹងកក្តាជីវភាព បន្ទាប់ពីប្រាក់ចំណូលរបស់បងប្អូនបានធ្លាក់ចុះយ៉ាងច្រើន ដោយសារតែការថមថយយ៉ាងគំហុកនៃភ្ញៀវទេសចរទៅកំសាន្តនៅតំបន់ទេសចរណ៍មួយនេះ ។ អ្នកស្រី…
ខេត្តស្ទឹងត្រែង៖ អាជីវករនៅសហគមន៍អេកូទេសចរណ៍ព្រះរំកិល ស្ថិតនៅស្រុកបុរីអូរស្វាយសែនជ័យ បានបង្ហាញនូវការព្រួយបារម្ភពាក់ព័ន្ធនឹងកក្តាជីវភាព បន្ទាប់ពីប្រាក់ចំណូលរបស់បងប្អូនបានធ្លាក់ចុះយ៉ាងច្រើន ដោយសារតែការថមថយយ៉ាងគំហុកនៃភ្ញៀវទេសចរទៅកំសាន្តនៅតំបន់ទេសចរណ៍មួយនេះ ។
អ្នកស្រី ធីដា អាយុ៣២ឆ្នាំ រស់នៅភូមិអន្លង់ស្វាយ ឃុំព្រះរំកិល ជាអ្នកលក់បាយដំណើបបុកល្ហុង នៅសហគមន៍អេកូទេសចរណ៍ព្រះរំកិល បានឱ្យដឹងនាព្រឹកថ្ងៃទី០៦ ខែកុម្ភះ ឆ្នាំ២០២០នេះថា ការលក់ដូររបស់គាត់នាពេលនេះគឺមិនកាក់កបទាល់តែសោះ ហើយចំណូលក៏មានការធ្លាក់ចុះជារៀងរាល់ថ្ងៃ ជាប់ៗគ្នារយៈពេល ៣ ឆ្នាំមកហើយ ព្រោះមិនសូវឃើញភ្ញៀវទេសចរមកកំសាន្តច្រើនដូចកាលពី ៣ ឬ ៤ឆ្នាំមុននោះទេ ។
អ្នកស្រី ធី តា បានពោលត្អូញត្អែរថា «ភ្ញៀវទេសចរមកទីនេះ គឺចង់ទស្សនាសត្វផ្សោតដែលពីមុនគឺមានចម្លោះពី ៨ទៅ៩ក្បាល ដោយឡែកឥឡូវមានតែ៣ក្បាលប៉ុណ្ណោះ» ។ អ្នកស្រីបានបន្តថា ការធ្លាក់ចុះនៃផ្សោតទន្លេនៅទឹកដីទេសចរណ៍មួយនេះគឺអ្នកស្រីគិតថាប្រហែលជាមកពីការសាងសង់វ៉ារីអគ្គីសនីដនសាហុង នៅប្រទេសឡាវ ព្រោះទំនប់វារីអគ្គិសនីនេះអាចបង្កការរំខានដោយសំឡេងបំផ្ទុះថ្មនិងគ្រឿងចក្រ នាំឱ្យសត្វផ្សោតផ្អើលនិងបន្លាស់ទីទៅរស់នៅខ្សែទឹកផ្សេង។ អ្នកស្រី បាននិយាយថា «ការបាត់បង់សត្វផ្សោតនេះ ធ្វើឱ្យមានការថយទេសចរ ទាំងបរទេស និងខ្មែរ ខណៈទេសចរបរទេសទស្សនាសត្វផ្សោតនៅទឹកដីឡាវវិញ» ។
ប្រាក់ចំណូលរបស់ពលរដ្ឋនៅសហមគន៍ទេសចរព្រះរំកិល គឺមួយផ្នែកបានមកពីវិស័យ ទេសចរណ៍ ដូចជា ការលក់សំបុត្រទស្សនាផ្សោត សេវាដឹកជញ្ជូនភ្ញៀវទេសចរ លក់ម្ហូបអាហារ និងកន្លែងស្នាក់នៅជាដើម។ អ្នកស្រីបានបន្ថែម ថារយៈពេលប៉ុន្មានឆ្នាំចុងក្រោយនេះ កម្ររមាន ភ្ញៀវទេសចរទាំងជាតិនិងអន្តរជាតិ មកទស្សនាផ្សោត ពីប្រទេសឡាវ មកកម្ពុជាណាស់ ពោលគឺ ឃើញមានតែភ្ញៀវទេសចរជាតិ និងអន្តរជាតិមកពីប្រទេសកម្ពុជា ។
លោកប៉ា ភឿន អាយុ៥៥ឆ្នាំតំណាងសហគមន៍អេកូទេសចរព្រះរំកិល ក្នុងស្រុកបុរីអូសែនជ័យបានមានប្រសាសន៍ថា បច្ចុប្បន្នសហគមន៍អាចលក់សំបុត្របានចាប់ពី ៦០ ម៉ឺនរៀល ទៅ ៧០ ម៉ឺនរៀលក្នុងមួយខែ ហើយកាលពី ៣ ឬ ៤ឆ្នាំមុន អាចរកប្រាក់ចំណូលបានចាប់ពី ១,៥លាន រៀល ទៅ ២លានរៀលក្នុងមួយខែ។ តាមការសង្កេតរបស់សហគមន៍ព្រះរំកិលឱ្យដឹងថា មុនឆ្នាំ ២០១០ សត្វ ផ្សោត នៅ អន្លង់ឈើទាល មាន ៨ ក្បាល ក៏ប៉ុន្តែសត្វកម្រទាំងនេះបានបាត់បង់ជាបន្តបន្ទាប់ ហើយបច្ចុប្បន្ន នៅសល់ផ្សោតធំៗប្រមាណ ៣ ក្បាលបន្តរស់នៅក្រោមការអភិរក្សរបស់សហគមន៍ព្រះរំកិល និងឆ្មាំទន្លេ។
លោកតំណាងសហគមន៍បានបន្តថា សត្វផ្សោត ៣ក្បាលមានការបំលាស់ទីពីដីខ្មែរ ទៅទឹកដីឡាវ នារដូវប្រាំង ហើយបំលាស់ទីមកទឹកដីខែ្មរវិញនារដូវវស្សា តែទេសចរអាចធ្វើដំណើរតាមទូកទស្សនា ឬទូកកៃយ៉ាក់ ទស្សនាសត្វផ្សោតនៅទឹកដីឡាវបាន ហើយទេសចរខាងឡាវ ក៏អាចមកទស្សនានៅទឹកដីខ្មែរ ខណៈសត្វផ្សោតទាំងនោះបំលាស់ទីទៅវិញទៅមក។
លោក ប៉ា ភឿន កត់សម្គាល់ថាមូលហេតុដែលផ្សោតចំនួន ៣ ក្បាល បន្លាស់ទីទៅខ្សែ ទឹកខាងលើដោយសារមានការដ្ឋានសាងសង់ទំនប់វារីអគ្គិសនី ស្ថិតនៅចម្ងាយ ៥០០ ម៉ែត្រ ពីទីតាំងជ្រករបស់ត្រីផ្សោតអន្លង់ឈើទាល និងការហ៊ុមព័ទ្ធនេសាទនៅក្បែរអន្លង់អភិរក្សបង្កភាព ស្មុគស្មាញស្វែងរកចំណី ចាប់ត្រីជាអាហាររបស់សត្វផ្សោត។
យ៉ាងណាមិញ សត្វផ្សោតកំពុងប្រឈមគ្រោះថ្នាក់ខ្លាំងដោយសារតំបន់ឆ្លងកាត់សំខាន់ៗ ដែលផ្សោតធ្វើដំណើរសម្បូរទៅដោយអ្នកនេសាទ ទាំងប្រជាជនឡាវ និងខ្មែរ បានដាក់ មង និងឧបករណ៍នេសាទផ្សេងៗ ត្បិតប្រជាជនប្រទេសទាំងពីរមានទម្លាប់នេសាទនៅដងទន្លេ ខ្សែបន្ទាត់ខណ្ឌទឹកដីប្រទេសទាំងពីរនៅតំបន់នោះ។ សហគមន៍អេកូទេសចរណ៍ព្រះរំកិលបានទទូចស្នើសុំអាជ្ញាធរ និងស្ថាប័នពាក់ព័ន្ធ រក មធ្យោបាយអភិរក្សសត្វផ្សោតនៅអន្លង់អភិរក្សឈើទាលឱ្យគង់វង្ស ដើម្បីធានានិរន្តរភាពវិស័យ ទេសចរណ៍ក្នុងតំបន់ និងកុំឱ្យឈានទៅរកការផុតពូជសត្វផ្សោតនាពេលអនាគតនៅអន្លង់ឈើទាល នៃសហគមន៍អេកូទេសចរណ៍ព្រះរំកិលនេះ។
ជុំវិញរឿងនេះ លោក ទុំ នីរ៉ូ នាយខណ្ឌរដ្ឋបាលជលផលស្ទឹងត្រែងបានឱ្យដឹងថា សត្វផ្សោតនៅខេត្តមានចំនួនប្រមាណជាង៣០ក្បាល ដែលរស់នៅក្នុងអន្លង់ចំនួន៤កន្លែង គឺអន្លង់ចំនួន៣ ស្ថិតក្នុងស្រុកសៀមបូក និងមួយទៀតគឺអន្លង់អូរឈើទាល ឋិតក្នុងឃុំព្រះរំកិល ស្រុកបុរីអូរស្វាយសែនជ័យ។ សត្វផ្សោតមានសារសំខាន់ណាស់ ដើម្បីទាក់ទាញភ្ញៀវ ទេសចរជាតិ និងអន្តរជាតិ ប្រសិនបើ នៅក្នុងអន្លង់ អូរឈើទាល សត្វផ្សោតវាកាន់តែជិតបាត់បង់អស់ទៅហើយនោះ ហើយភ្ញៀវទេសចរណ៍ ក៏ថយចុះទៅតាមហ្នឹងដែរ។
លោកបានបន្តដូច្នេះសូមបងប្អូនប្រជាពលរដ្ឋនៅតំបន់នោះមេត្តាជួយថែរក្សាគ្នាកុំប្រើឧបករណ៍ ខុសច្បាប់ នៅជិតតំបន់ហាមឃាត់ នៅក្នុងតំបន់ដែលសត្វផ្សោត វាកំពុងរស់នៅឱ្យសត្វផ្សោតគង់វង្ស ដើម្បីទាក់ទាញភ្ញៀវទេសចរជាតិនិងអន្តរជាតិចូលទស្សនាឱ្យបានកាន់តែច្រើនឡើងវិញ ៕ កែសម្រួលដោយ ៖ សុឃាក់
ចែករំលែកព័តមាននេះ