រាជធានីភ្នំពេញ ៖ លោកនាយឧត្តមសេនីយ៍ ជួន សុវណ្ណ បានថ្លែងក្នុងពិធីប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្តរសក្តិដល់មន្ត្រីនគរបាលជាតិរាជធានីភ្នំពេញ កាលពីព្រឹកថ្ងៃទី៧ កញ្ញា នេះថា លោកបានឡើងធ្វើជាស្នងការនៃស្នងការដ្ឋាននគរបាលរាជធានីភ្នំពេញខ្វះ១ខែ គឺ៦ឆ្នាំហើយ។ ក្នុង៦ឆ្នាំខ្វះ១ខែនោះ លោកបានដឹកនាំមន្ត្រីនគរបាលរាជធានីភ្នំពេញ គ្រប់ផ្នែក គ្រប់ជំនាញ និងគ្រប់ខណ្ឌ បង្ក្រាបបទល្មើសធំៗ បានលទ្ធផលជោគជ័យលើ៧០ភាគរយ។ លោកនាយឧត្តមសេយ៍ថ្លែងដូច្នេះហាក់ចង់បង្ហាញពីស្នាដៃលលោកនៅកាន់ជាស្នងការនគរបាលរាជធានីភ្នំពេញ ព្រោះបន្តិចទៀតនេះ(អាចថ្ងៃ១២ កញ្ញាខាងមុខលោកនឹង ត្រូវចូលនិវត្តន៍ ពោលគឺលោកត្រូវបាន បញ្ចប់កាងារជាស្នងការទៀតហើយ)។
ពិធីប្រកាសផ្ទេរភារកិច្ចតែងតាំងមុខតំណែង និងបំពាក់ឋានន្តរសក្តិ នាព្រឹកថ្ងៃទី៧ កញ្ញា នេះគឺមានសមាសភាពមន្ត្រីនគរបាល២៣រូប ដែលផ្លូវផ្ទេរចេញ និងដាក់ចូលជំនួស វិញ ដូចជា ១.លោកឧត្តមសេនីយ៍ទោ លូ រ៉ាបូ ពីស្នងការរងទទួលផែនអន្តោប្រវេសន៍ នៃស្នងការដ្ឋាននគបាលរាជធានីភ្នំពេញ ទៅជាអនុប្រធាននាយកដ្ឋានសរុបផែនការ ចំណុះសេនាធិការដ្ឋាន នៃអគ្គស្នងការនគរបាលជាតិ ២.លោកឧត្តមសេនីយ៍ត្រី ស៊ឹម វុទ្ទី ពីស្នងការរងទទួលផែនការងារសន្តិសុខ នៃស្នងការនគរបាលរាជធានីភ្នំពេញ ទៅជាអនុប្រធាននាយកដ្ឋានប្រឆាំងភាវរកម្ម និងឧក្រិដ្ឋកម្មឆ្លងដែន ៣.លោកឧត្តមសេនីយ៍ សេង សុគន្ធ ពីស្នងការរងទទួលផែនការងារគ្រប់គ្រងធនធានមនុស្ស ទៅជាស្នងការរង នៃស្នងការដ្ឋាននគរបាល រាជធានីភ្នំពេញ។
៤.លោកវរៈសេនីយ៍ឯក ហួត ចាន់យ៉ារ៉ាន់ ពីអធិការនគរបាលខណ្ឌដូនពេញ ទៅជាស្នងការរង នៃស្នងការដ្ឋាននគរបាលរាជធានីភ្នំពេញ ៥.លោក ហ៊ុន សុធី ពីអធិការនគរបាល ខណ្ឌទួលគោក ទៅជាស្នងការរងទទួលផែនការងារគ្រប់គ្រងធនធានមនុស្ស នៃស្នងការដ្ឋាននគរបាល រាជធានីភ្នំពេញ។ ៦.ផ្ទេរលោកវរៈសេនីយ៍ឯក ទៀង ច័ន្ទខន្តិសារ ពីអធិការនគរបាលខណ្ឌឫស្សីកែវ ទៅជាអធិការនគរបាលខណ្ឌដូនពេញ ៧.លោកវរៈសេនីយ៍ទោ គល់ យី ពីអធិកររង នៃអធិការដ្ឋាននគរបាលខណ្ឌដូនពេញ ទៅជាអធិការនគរបាលឫស្សីកែវ ៨.លោកវរៈសេនីយ៍ទោ សុខ ហេង ពីអធិការរង ទៅជាអធិការនគរបាលខណ្ឌទួលគោក។
៩.លោកវរៈសេនីយ៍ទោ សូ ពាន់ ពីនាយរងការិយាល័យ ទៅជានាយការិយាល័យគ្រប់គ្រងអាវុធគ្រឿងផ្ទុះ និងជាតិពុល ១០.លោកវរៈសេនីយ៍ទោ សូ ពៅចិន្តា ពីនាយរងការិយាល័យបុគ្គលិក ទៅជានាយរងការិយាល័យ គណនេយ្យ ១១.លោកវរៈសេនីយ៍ត្រី សំ វាន់ឌី ពីនាយរងការិយាល័យប្រឆាំងភាវរៈកម្ម និង ឧក្រិដ្ឋកម្មឆ្លងដែន ទៅជានាយការិយាល័យប្រឆាំងបទល្មើសបច្ចេកវិទ្យា ១២.លោកវរៈសេនីយ៍ត្រី រស់ អេងស៊ីថា ពីអធិការរងខណ្ឌព្រែកព្នៅ ទៅជានាយរងការិយាល័យប្រឆាំងបច្ចេកវិទ្យា។ និង នៅមានការផ្ទេរភារកិច្ច បំពាក់ឋានន្តរសក្តិដល់មន្ត្រីបន្តបន្ទាប់ទៀត រហូតគ្រប់២៣រូប ដែលមានវត្តមានពេលនោះ។
ពិធីនេះក្រោយអធិបតិភាពលោក មាន ចាន់យ៉ាដា អភិបាលរងសាលារាជធានីភ្នំពេញ លោកនាយឧត្តមសេនីយ៍ ជួន សុវណ្ណ អគ្គស្នងការរង និងជាស្នងការនគរបាលរាជធានីភ្នំពេញ និងលោកឧត្តមសេនីយ៍ឯក ប៉ុល សុគន្ធ អនុប្រធាននាយកដ្ឋានបុគ្គលិកក្រសួងមហាផ្ទៃ។ ដោយមានការចូលរួមពីសំណាក់ ស្នងការរង នាយការិយាល័យ អធិការ អធិការរង និងនាយផ្នែកនាយនគរបាលប៉ុស្តិ៍រដ្ឋបាលគ្រប់បណ្តាខណ្ឌ ប្រមាណជាង២០០នាក់ផងដែរ។ ក្នុងនោះគណៈអធិបតីគឺលោក មាន ចាន់យ៉ាដា អភិបាលរង បានថ្លែងការកោតសសើរពីស្នាដៃនគរបាលរាជធានីភ្នំពេញ ដែលបានរួមគ្នាជួយការពារសន្តិសុខ សុវត្ថិភាពជូនថ្នាក់ដឹកនាំរាជរដ្ឋាភិបាល និងប្រជាពលរដ្ឋដែលរស់នៅក្នុងរាជធានីភ្នំពេញពីអាណត្តិមុន និងបន្តអាណត្តិរដ្ឋាភិបាលថ្មីនេះទៀត។
ចុងក្រោយលោកនាយឧត្តមសេនីយ៍ ជួន សុវណ្ណ អគ្គស្នងការង និងជាស្នងការនគរបាលរាជធានីភ្នំពេញ បានផ្តាំផ្ញើដល់មន្ត្រីនគរបាលរាជធានីភ្នំពេញ ទាំងអស់ឲ្យខិតខំប្រឹងប្រែងយកចិត្តទុកដាក់បន្ថែមទៀត ដែលកន្លងមកនគរបាលរាជធានីភ្នំពេញ ដឹកនាំដោយរូបលោកអស់រយៈពេល៦ឆ្នាំ ខ្វះ១ខែ ឃើញថា សមត្ថកិច្ចយើងបង្ក្រាបបានបទល្មើស ឧក្រិដ្ឋធំៗ ដូចជាករណី លួច ឆក់ ប្លន់ប្រដាប់អាវុធ ឃាតកម្ម និងពិសេសការការពាររាល់បាតុកម្ម កូបកម្ម ទទួលបានលទ្ធផលលើ៧០ភាគរយ។ លោកនាយឧត្តមសេនីយ៍បានធ្លោយពាក្យពេចន៍បន្ថែមថា ពេលនេះអាចមិនយូរទេលោកនឹងត្រូវចូលនិវត្តន៍ ដូច្នោះសូមមន្ត្រីនគរបាលទាំងអស់ បង្កើនការងារការពារថ្នាក់ដឹកនាំ និងរក្សាសន្តិសុខជូនប្រជាពលរដ្ឋឲ្យកាន់តែល្អថែមទៀត៕
ចែករំលែកព័តមាននេះ