ខេត្តស្វាយរៀង ៖ មានការភ្ញាក់ផ្អើលដល់អ្នកភូមិ និងសមត្ថកិច្ចមូលដ្ឋាន ខណៈមានក្មេងៗជាសិស្សសាលា០៦នាក់នាំគ្នាចុះហែលទឹកព្រែក និងលោតពីលើស្ពានចុះទឹកព្រែកនៅចំណុច
ខេត្តស្វាយរៀង ៖ មានការភ្ញាក់ផ្អើលដល់អ្នកភូមិ និងសមត្ថកិច្ចមូលដ្ឋាន ខណៈមានក្មេងៗជាសិស្សសាលា០៦នាក់នាំគ្នាចុះហែលទឹកព្រែក និងលោតពីលើស្ពានចុះទឹកព្រែកនៅចំណុចស្ពានខាងកើតវត្តចាស់ចម្ងាយជាង១០០ម៉ែត្រ ហើយក្មេងប្រុសម្នាក់ឈ្មោះ សាន វីត អាយុ១៤ឆ្នាំ ជាសិស្សបានលង់ទឹកព្រែករកមិនឃើញកាលពីវេលាម៉ោង១១និង៣០នាទីព្រឹក ថ្ងៃទី៣ ខែធ្នូ ឆ្នាំ២០១៦ ស្ថិតក្នុងភូមិតាប៉ ឃុំតាសួស ស្រុកស្វាយជ្រំ បណ្តាលឲ្យស្លាប់។
បើតាមលោកអធិការនគរបាលស្រុកស្វាយជ្រំ លោក ពិន អានបានឲ្យដឹងថា ក្មេងប្រុសដែលជាសិស្សសាលា ដែលនាំគ្នាចុះហែលទឹកព្រែកទាំង០៦នាក់នោះ ទី១.ឈ្មោះ សាន វីត ភេទប្រុស អាយុ១៤ឆ្នាំ ទី២.ឈ្មោះ កាន រតនៈ ភេទប្រុស អាយុ១៣ឆ្នាំ ទី៣.ឈ្មោះ ម៉ៅធួន ភេទប្រុស អាយុ១៣ឆ្នាំ ទី៤.ឈ្មោះ រស់ សាផៃ ភេទប្រុស អាយុ១៤ឆ្នាំ ទី៥.ឈ្មោះ ភិន សារ៉ូត ភេទប្រុស អាយុ១៤ឆ្នាំ និងទី៦.ឈ្មោះ ជឹម សំណាង ភេទប្រុស អាយុ១៣ឆ្នាំ សិស្សទាំង០៦នាក់មានទីលំនៅភូមិស្វាយក្អែ ឃុំតាសួស ស្រុកស្វាយជ្រំ។
បើតាមក្មេងប្រុសឈ្មោះ រស់ សាផៃ បានឲ្យដឹងថា មុនពេលកើតហេតុរូបគេ និងមិត្តភក្តិ៥នាក់ បានចេញពីសាលារៀន ហើយក៏បបួលគ្នាមកលេងទឹកព្រែកក្បែរវត្តចាស់ និងឡើងលោតពីលើស្ពានចុះទៅក្នុងទឹកព្រែកមុជហែលលេងយ៉ាងសប្បាយ។ ប្រភពដដែលបន្តថា ពេលកំពុងតែលេងទឹកប្រមាណកន្លះម៉ោង មិត្តភក្តិដែលបាត់ខ្លួនឈ្មោះ សាន វីត បានឡើងឈរលើបង្កាន់ដៃស្ពានរួចលោតចុះពីលើស្ពានម្តងទៀតក៏លិចទឹកបាត់មិនឃើញងើបឡើងពីទឹកវិញធ្វើឲ្យមានការភ្ញាក់ផ្អើលក៏នាំគ្នាទាំង៥នាក់ចុះជួយរាវរកប៉ុន្តែមិនឃើញក៏ត្រឡប់ទៅផ្ទះម្តាយរបស់មិត្តភក្តិជាជនរងគ្រោះហើយបានប្រាប់ពីរឿងហេតុការណ៍ ទើបចាស់ទុំឆោឡោ ហើយទាំងអស់គ្នាបានត្រឡប់ទៅរកសាជាថ្មីប៉ុន្តែទោះបីខំរាវរកយ៉ាងណាក៏ដោយ ក៏រកមិនឃើញឡើយ។
រហូតមកដល់វេលាម៉ោង៨ព្រឹក ថ្ងៃទី៤ ខែធ្នូឆ្នាំ២០១៦ ទើបក្រុមគ្រួសារ និងអ្នកភូមិប្រទះឃើញសាកសពក្មេងរងគ្រោះអណ្តែតទឹក នៅខាងជើងស្ពានព្រែកវត្តចាស់ប្រមាណ១៥០ម៉ែត្រក៏បានស្រង់សពយកទៅលំនៅដ្ឋានដើម្បីធ្វើបុណ្យតាមប្រពៃណី ទាំងក្ដុកក្ដួលបំផុត៕
ចែករំលែកព័តមាននេះ