រាជធានីភ្នំពេញ ៖ សមត្ថកិច្ចនគរបាលព្រហ្មទណ្ឌកម្រិតធ្ងន់រាជធានីភ្នំពេញ កាលពីថ្ងៃទី២៥ ខែសីហា ឆ្នាំ២០១៦ បានធ្វើការចាប់ខ្លួន ម្ចាស់ហាង រតន:រចនាម៉ូត ដែលពាក់ព័ន្ធថា បានប្រើអំពើហិ.ង្សា
រាជធានីភ្នំពេញ ៖ សមត្ថកិច្ចនគរបាលព្រហ្មទណ្ឌកម្រិតធ្ងន់រាជធានីភ្នំពេញ កាលពីថ្ងៃទី២៥ ខែសីហា ឆ្នាំ២០១៦ បានធ្វើការចាប់ខ្លួន ម្ចាស់ហាង រតន:រចនាម៉ូត ដែលពាក់ព័ន្ធថា បានប្រើអំពើហិង្សា វាយទៅលើអ្នករត់រ៉ឺម៉កម៉ូតូរហូតបាក់ដៃ កំពុងកសាងសំណុំរឿងបញ្ជូនទៅស្ថាប័នច្បាប់។ ម្ចាស់ហាងរតន:រចនាម៉ូតដែលសមត្ថកិច្ចឃាត់ខ្លួននោះឈ្មោះ ពៅ រតនៈ ហៅប្រុស ភេទប្រុស អាយុ៣៦ឆ្នាំ ស្នាក់នៅផ្ទះលេខ៦៣៨F ផ្លូវ២៧១ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។
ទាក់ទិនទៅនឹងការឃាត់ខ្លួនជនសង្ស័យខាងលើនេះ សមត្ថកិច្ចនគរបាលព្រហ្មទណ្ឌបានបង្ហើបឲ្យដឹងថា តាមចម្លើយម្ចាស់ហាងថា ខ្លួនពិតជាបានវាយជនរងគ្រោះរហូតបាក់ដៃមែន ក្នុងជម្លោះគ្នាមួយរឿងចតរ៉ឺម៉កម៉ូតូកង់បីនៅមុខហាង។ គួរបញ្ជាក់ថា បុរសវ័យចំណាស់រត់រ៉ឺម៉កម៉ូតូ(កង់បី)ម្នាក់ ត្រូវបានម្ចាស់ផ្ទះរតនៈរចនាម៉ូត វាយបណ្តាលឲ្យបាក់ដៃឆ្វេង ដោយគ្រាន់តែឈប់នៅមុខហាងដើម្បីរង់ចាំម៉ូយ។ ហេតុការណ៍នោះបានកើតឡើងនៅមុខហាង រតនៈរចនាម៉ូត ស្ថិតនៅតាមផ្លូវលេខ២៧១ ក្នុងសង្កាត់ផ្សារដើមថ្កូវ ខណ្ឌចំការមន កាលពីវេលាម៉ោង១០និង៥០នាទីយប់ ថ្ងៃទី២៣ ខែសីហា ឆ្នាំ២០១៦។
បុរសជាអ្នករត់រ៉ឺម៉កម៉ូតូកង់បី បានរៀបរាប់ប្រាប់សមត្ថកិច្ចថា មុនពេលកើតហេតុគាត់បានឈប់រ៉ឺម៉កម៉ូតូនៅមុខផ្ទះខាងលើនោះមែន ដើម្បីរង់ចាំឌុបម៉ូយ លុះបន្តិចក្រោយមកមានបុរសម្នាក់បើករថយន្តមួយគ្រឿងមិនស្គាល់ម៉ាកទៅដល់ ហើយបានប្រាប់គាត់ឲ្យយករ៉ឺម៉កម៉ូតូចេញពីមុខផ្ទះ។ ភ្លាមនោះគាត់រៀ នឹងបណ្តើរ៉ឺម៉កម៉ូតូចេញហើយ តែបណ្តើចេញមិនទាន់ក៏ត្រូវបុរសនោះចុះពីរថយន្តបើកទ្វារផ្ទះយកឈើជ្រុង វាយគាត់បណ្តាលឲ្យរងរបួសបាក់ដៃឆ្វេង។
ជនរងគ្រោះបានប្រាប់សមត្ថកិច្ចទៀតថា ក្រោយពេលម្ចាស់ហាងវាយគាត់បាក់ដៃហើយ បុរសរូបនោះក៏បើករយន្តចេញទៅបាត់ ទុកឲ្យរូបគាត់ដេកដួល និងឈឺចុកចាប់លើដី តែត្រូវបានអ្នករស់នៅជិតខាងអាណិតអាសូរ ជួយទាក់ទងរថយន្តសាមុយ ដឹកយកទៅព្យាបាលនៅមន្ទីរពេទ្យ។ គួរបញ្ជាក់ទៀតថា ក្រោយពីទទួលព័ត៌មាននោះ លោកនាយឧត្តមសេនីយ៍ ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ នៅព្រឹកថ្ងៃ២៤ ខែសីហា ឆ្នាំ២០១៦ បានចេញបទបញ្ជាផ្ទាល់ប្រកាសឲ្យសមត្ថកិច្ចជំនាញ ធ្វើការស្រាវជ្រាវលើករណីនេះ ដើម្បីចាប់ខ្លួនម្ចាស់ហាង”រតនៈរចនាម៉ូត” ដែលវាយបុរសវ័យចំណាស់អ្នករត់រ៉ឺម៉កម៉ូតូបណ្ដាលឲ្យបាក់ដៃនោះ យកមកទទួលខុសត្រូវចំពោះមុខច្បាប់។
បន្ទាប់ពីមានបទបញ្ជាយ៉ាងក្តៅគគុកនោះ លោកឧត្តមសេនីយ៍ត្រី សុង លី ស្នងការរង ទទួលជាប្រធានការិយាល័យកណ្តាលនគរបាលព្រហ្មទណ្ឌរាជធានីភ្នំពេញ បានប្រើប្រាស់កម្លាំងនគរបាលការិយាល័យព្រហ្មទណ្ឌកម្រិតធ្ងន់ ចុះទៅស្រាវជ្រាវ និងឈានដល់ការឃាត់ខ្លួនជនដៃដល់ ដែលពេលនេះកំពុងកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញតាមនីតិវិធី៕
ចែករំលែកព័តមាននេះ