ខេត្តកំពត ៖ មានការភ្ញាក់ផ្អើលមួយកាលពីវេលាម៉ោង៤និង៣០នាទីរសៀល ថ្ងៃទី២៨ ឧសភា នៅតាមដងផ្លូវជាតិលេខ៣១ ពីស្រុកកំពង់ត្រាច ទៅស្រុកបន្ទាយមាស ដោយសារតែគេឃើញរថយន្តស៊េរីទំនើបបើកអមរថយន្តនីស្សាន់មួយបាំងកន្លះ ដឹកឈើគ្រញូងពីត្បូងទៅជើង ដោយរថយន្តដឹកឈើគ្រញូងស្ថិតនៅកណ្តាល ។ អ្នកឃើញហេតុការណ៍និយាយថា ស្ថានភាពបែបនេះ ទំនងជារថយន្តដឹកឈើគ្រញូងមិនព្រមឈប់ លុះប្រមាណ២០នាទីក្រោយមកស្រាប់តែគេបានឮដំណឹងថា រថយន្តដឹកឈើគ្រញូងក្រឡាប់នៅចំណុចភូមិព្រៃផ្តៅ ឃុំភ្នំកុង ស្រុកអង្គរជ័យ ។
តាមប្រជាពលរដ្ឋដែលឃើញហេតុការណ៍និយាយថា រថយន្តដឹកឈើគ្រញូងនោះបើកកៀកគ្នាជាមួយរថយន្តគយក៏បណ្តាលឱ្យក្រឡាប់ដោយគ្មានបុកអ្វីទេ ហើយពេលក្រឡាប់នោះគេឃើញមន្ត្រីគយ២នាក់ បានចេញពីក្នុងរថយន្តមានគ្រោះថ្នាក់ ឯឈើគ្រញូងបានខ្ទាតចេញរាយប៉ាយ ចំណែករថយន្តដឹកឈើគ្រញូងនេះក៏បែកកង់ដែរ ។ ភ្លាមៗនោះ រថយន្តដឹកស៊ីម៉ង់ត៍មួយគ្រឿងត្រូវបានមន្ត្រីគយហៅឱ្យឈប់បាំងរថយន្តក្រឡាប់ហើយរារាំងមិនឱ្យអ្នកកាសែតថត លុះប្រហែលជា២០នាទីក្រោយមករថយន្តស្ទូចក៏បានស្ទូចរថយន្តដឹកឈើបន្តដំណើរទៅមុខទៀត។ ពេលរថយន្តដឹកឈើនិងរថយន្តគយចេញផុត ទើបនគរបាលស្រុកអង្គរជ័យ និងនគរបាលប៉ុស្តិ៍មកសួរនាំ ប៉ុន្តែមិនបានឃើញអ្វីទាំងអស់ឃើញតែស្រោមជើង និងព្រៃនៅក្បែរថ្នល់បាក់រាបអស់ ។
មន្ត្រីនៅមូលដ្ឋានក៏ដូចជានគរបាលស្រុកទាំង៣គឺកំពង់ត្រាច បន្ទាយមាស និងអង្គរជ័យ មិនបានដឹងពីមូលហេតុនេះឡើយ ម្នាក់ៗបានត្រឹមតែនិយាយថា រថយន្តដឹកឈើគ្រញូងត្រូវបានរថយន្តទំនើបបើកអម ។ ការស្វែងរកព័ត៌មានត្រូវបានមន្ត្រីគយមួយរូបឈរជើងនៅផ្លូវបែកគូស ស្រុកត្រាំកក់ និយាយថា រថយន្តក្រឡាប់នោះជារថយន្តដឹកឈើគ្រញូងដែលគយចាប់ពីក្រុមឈ្មួញកាលពីវេលាម៉ោងប្រហែល២រសៀល ថ្ងៃទី២៨ ឧសភា នៅចំណុចទំនប់គងលាន់ ឃុំឫស្សីស្រុកខាងកើត ស្រុកកំពង់ត្រាច។ មន្ត្រីគយរូបនោះបាននិយាយថា ការចុះចាប់ឈើគ្រញូងលើកនេះមានលោកអ៊ុន ឃាង ប្រធានគយចល័តផ្លូវជាតិលេខ៣ និងលេខ២ ចុះផ្ទាល់តែម្តង ។ កំណាត់ឈើគ្រញូងដែលគេដឹកតាមរថយន្ត ហើយត្រូវគយចាប់នោះមានចំនួន៥៧ដុំ និងត្រូវបានបញ្ជូនទៅកាន់ទីស្នាក់ការឯរាជធានីភ្នំពេញនៅថ្ងៃទី២៩ ឧសភា៕
ចែករំលែកព័តមាននេះ