ខេត្តបន្ទាយមានជ័យ ៖ ស្ត្រីម្នាក់រងរបួសពោរមុខបានអះអាងថា នាងត្រូវបុរសម្នាក់វាយសន្លប់ រួចរំលោភលើទឹកដីថៃ កាលពីវេលាទៀបភ្លឺថ្ងៃទី៣ ខែកក្កដា ឆ្នាំ២០១៥ នៅខេត្តអាយុធ្យា ខណៈប្ដីជាប់រវល់ធ្វើការពេលយប់ ។ ស្ត្រីរងគ្រោះឈ្មោះអ.ភ អាយុ៣១ឆ្នាំ ជាកម្មករនៅសិប្បកម្មផលិតទឹកកកមួយកន្លែងក្នុងខេត្តអាយុធ្យា ប្រទេសថៃ និងមានទីលំនៅសង្កាត់និមិត្ត ក្រុងប៉ោយប៉ែត ។
ស្ត្រីរងគ្រោះរងរបួសផ្ទៃមុខ និងដងខ្លួនមានស្នាមជាំជាច្រើនកន្លែង ព្រមទាំងមានស្នាមខាំផងដែរ បានរៀបរាប់ថា កាលពីវេលាម៉ោង២ទៀបភ្លឺថ្ងៃទី៣ ខែកក្កដាកន្លងទៅថ្មីៗនេះ ពេលប្ដីរវល់ធ្វើការពេលយប់ នាងដេកក្នុងបន្ទប់ជួលម្នាក់ឯង ស្រាប់តែបុរសម្នាក់ជាកម្មករដូចគ្នា និងជាអ្នកស្រុកភូមិជាមួយគ្នា បានលបចូលបន្ទប់បន្លំធ្វើជាប្ដីរបស់នាង ហើយចាប់រំលោភនាងតែម្តង ។
ស្ត្រីរងគ្រោះបន្តថា ដោយសារនាងដឹងថា មិនមែនជាប្ដី ក៏ប្រតាយប្រតប់ជាមួយបុរសសង្ស័យ តែត្រូវបុរសនោះដាល់លើផ្ទៃមុខ និងពោះជាច្រើនដៃរហូតសន្លប់ រួចរំលោភបានសម្រេច ។ ក្រោយពីរំលោភនាងរួច គេបានយកកម្រាលពូករុំក្បាលនាង ទំនងជានឹកស្មានថានាងស្លាប់ ប្រុងអូសចេញទៅក្រៅ តែចៃដន្យជួបជាមួយបុរសជនជាតិថៃម្នាក់ដែលធ្វើការជាមួយគ្នា ជនសង្ស័យក៏អូសនាងចូលក្នុងបន្ទប់កន្លែងកើតហេតុវិញ ។
ស្ត្រីរងគ្រោះបន្តទៀតថា ពេលដែលរឿងរ៉ាវខាងលើបែកការណ៍ គាប់ជួននាងបានដឹងខ្លួនវិញ ក៏រត់ទៅហៅប្ដីនាងដែលធ្វើការនៅក្បែរកន្លែងកើតហេតុទាំងគ្មានសំលៀកបំពាក់ មានត្រឹមតែកម្រាលពូករុំព័ទ្ធខ្លួនតែប៉ុណ្ណោះ ។ ភ្លាមៗនោះកម្មកររួមអាជីពទាំងខ្មែរ ទាំងថៃ បានព័ទ្ធចាប់បុរសសង្ស័យប្រគល់ឲ្យសមត្ថកិច្ចប៉ូលិសថៃ ។
ស្ត្រីរងគ្រោះបានឱ្យដឹងថា ជនសង្ស័យឈ្មោះរ៉ុម សុភា អាយុ១៨ឆ្នាំ ជាកម្មកររួមអាជីព និងមានទីលំនៅក្នុងភូមិថ្មសិន សង្កាត់និមិត្ត ក្រុងប៉ោយប៉ែត ត្រូវបានសមត្ថកិច្ចថៃចាប់ឃុំតែមួយយប់ប៉ុណ្ណោះ ក៏ត្រូវថៅកែនាងធានាចេញពីស្ថានីយតម្រួតថៃ ហើយបណ្ដេញចេញពីកន្លែងធ្វើការ សង្ស័យខ្លាចមានរឿងរ៉ាវដល់ខ្លួន ។ មិនតែប៉ុណ្ណោះថៅកែរបស់នាងបានអង្វរសុំឲ្យនាងដកពាក្យបណ្ដឹងពីស្ថានីយតម្រួតថៃទៀតផង ។
ស្ត្រីរងគ្រោះក្រោយពីជួបរឿងអាក្រក់បាននាំប្ដីប្រពន្ធមកស្រុកកំណើតវិញដើម្បីដាក់ពាក្យបណ្ដឹងឲ្យសមត្ថកិច្ចជួយរកយុត្តិធម៌ ។ នាងបន្តថា ពេលដែលនាង និងប្ដីមកដល់លំនៅដ្ឋានភ្លាម ឪពុកម្ដាយជនសង្ស័យបានសុំសម្រុះសម្រួលដោយសងជម្ងឺចិត្តនាង៤.០០០បាតប្រាក់ថៃ តែនាង និងគ្រួសារមិនព្រម បន្ទាប់មកឪពុកម្ដាយជនសង្ស័យបានតម្លើងថ្លៃដល់២០.០០០បាត(២ម៉ឺនបាត)នៅផ្ទះមេភូមិ ។ តែនាង និងគ្រួសារ ព្រមទាំងសាច់ញាតិ មិនព្រមយកសំណងនេះក៏នាំគ្នាទៅដាក់ពាក្យបណ្ដឹងនៅប៉ុស្តិ៍រដ្ឋបាលនគរបាលសង្កាត់និមិត្តកាលពីថ្ងៃទី៥ កក្កដា ទាមទារសំណង១០លានរៀល តែមកដល់ពេលនេះពុំទាន់មានដំណោះស្រាយនៅឡើយទេ។
ជនសង្ស័យឈ្មោះរ៉ុម សុភា មិនអាចទាក់ទងសុំការបំភ្លឺបានទេ ព្រោះជននេះកំពុងគេចខ្លួននៅឯស្រុកថៃ មិនហ៊ានត្រឡប់មកស្រុកវិញទេ ។
លោកម៉ារិន មេប៉ុស្តិ៍រដ្ឋបាលនគរបាលសង្កាត់និមិត្តបានប្រាប់«កោះសន្តិភាព»ថា ករណីខាងលើពិតជាកើតមានមែន គឺជនរងគ្រោះបានដាក់ពាក្យបណ្ដឹងនៅប៉ុស្តិ៍រដ្ឋបាលរបស់លោកដើម្បីឲ្យជួយរកយុត្តិធម៌ ។ ទោះជាយ៉ាងណាលោកមេប៉ុស្តិ៍ប្រាប់ថា បញ្ហាខាងលើសមត្ថកិច្ចពិបាកធ្វើការណាស់ ព្រោះជនសង្ស័យគេចខ្លួននៅថៃនៅឡើយ ។
គួរបញ្ជាក់ថា នៅព្រឹកថ្ងៃទី៧ ខែកក្កដា ឆ្នាំ២០១៥នេះ នៅផ្ទះជនរងគ្រោះគេឃើញមានមន្ត្រី នៃសមាគមការពារសិទ្ធមនុស្សលីកាដូរបានចុះសួរនាំជនរងគ្រោះផងដែរ ៕
ចែករំលែកព័តមាននេះ