ខេត្តសៀមរាប ៖ ក្រុមយុវជនគណបក្សកម្ពុជាខេត្តសៀមរាបបានលើកឡើង នៅថ្ងៃទី២២ ខែធ្នូ ឆ្នាំ២០២៤ នេះថា ពួកគេមានការព្រួយបារម្ភយ៉ាងខ្លាំងអំពីការបាត់បង់ ខ្លែងឯក ដែលជាមរតកសិល្បៈដ៏ចំណាស់របស់ខ្មែរ…
ខេត្តសៀមរាប ៖ ក្រុមយុវជនគណបក្សកម្ពុជាខេត្តសៀមរាបបានលើកឡើង នៅថ្ងៃទី២២ ខែធ្នូ ឆ្នាំ២០២៤ នេះថា ពួកគេមានការព្រួយបារម្ភយ៉ាងខ្លាំងអំពីការបាត់បង់ ខ្លែងឯក ដែលជាមរតកសិល្បៈដ៏ចំណាស់របស់ខ្មែរ ខណៈដែលចំនួនអ្នកចេះចាំជំនាញធ្វើខ្លែងនេះកាន់តែតិចទៅ ។
ក្នុងនោះដែរ លោក ហូ សម័យ ប្រធានក្រុមការងារយុវជនខេត្ត ចុះមូលដ្ឋានស្រុកសូទ្រនិគម បានលើកឡើងថា ក្នុងនាមជាយុវជនម្នាក់ លោកពិតជាមានការព្រួយបារម្ភពីការបាត់បង់ ខ្លែងឯកខ្មែរ ដែលជាមរតកសិល្បៈដ៏ផូរផង់របស់ខ្មែរយើង ។ ដូច្នេះ ទើបលោករួមជាមួយក្រុមការងារយុវជនមកពីបណ្តាក្រុង ស្រុកផ្សេងៗនាំគ្នាមករៀនសូត្រអំពីរបៀបធ្វើខ្លែង របៀបធ្វើឯក ពីសំណាក់ព្រឹទ្ធាចារ្យដែលលោកនៅចេះចាំ ។
លោក ហូ សម័យ បន្តថា “ថ្ងៃនេះ យើងបាននាំយុវជនជាង៣០នាក់មករៀនជាមួយលោកតា ស៊ន់ ដែលរស់នៅភូមិព្រំកុដ្ឋ សង្កាត់បល្ល័ង្គ ក្រុងរុនតាឯក តេជោសែន រៀនពីរបៀបធ្វើខ្លែងឯក ដើម្បីថែរក្សាប្រពៃណីវប្បធម៌ខ្មែរយើង ។ ព្រោះយើងព្រួយបារម្ភខ្លាចនៅពេលខាងមុខ និងបាត់បង់ដោយសារចាស់ៗពីមុនដែលគាត់ចេះហ្នឹងស្ទើរបាត់អស់ទៅហើយ ដោយយុវជនយើងសម័យនេះក៏មិនបានជាគិតគូរ ឬក៏ខ្វាយខ្វល់អំពីការធ្វើខ្លែងឯកទៀតទេ ។
ថ្ងៃនេះ យុវជនយើងមកពីបណ្តាក្រុងស្រុកផ្សេងៗគ្នា បានមករៀនពីរបៀបធ្វើឯកឱ្យឮ របៀបបិតឫស្សី ជាពិសេស របៀបធ្វើកន្ទុយដែលយកស្លឹកត្នោតមកត្បាញតភ្ជាប់ជាប់គ្នា” ។
លោក លឺ ភារុណ ប្រធានក្រុមការងារយុវជនចុះមូលដ្ឋានក្រុងរុនតាឯកតេជោសែន បានលើកឡើងផងដែរថា នេះជាការពិតសម្រាប់លោកផ្ទាល់ ដែលពីមុនមកលោកធ្លាប់ឃើញតែខ្លែងសេរី ហើយទើបតែធ្លាប់ឃើញខ្លែងឯកជាលើកទី១ នៅពេលដែលមករៀននេះប៉ុណ្ណោះ ។
លោកបានលើកឡើងថា ដូច្នេះហើយ ដើម្បីឲ្យយុវជនជំនាន់ក្រោយបានស្គាល់ និងបានថែរក្សាមរតកវប្បធម៌ដូនតានេះ ទើបលោកសហការជាមួយលោកស្រីចៅសង្កាត់បល្ល័ង្គស្នើសុំឱ្យលោកតាស៊ន់ ជួយបង្ហាត់បង្រៀនអំពីរបៀបធ្វើខ្លែងឯកនេះ ។
ក្នុងនោះដែរ លោក ខៀវ ប្រសើរ ប្រធានផែនការនិងរបាយការណ៍ និងជាតំណាងឱ្យក្រុមការងារយុវជនគណបក្សប្រជាជនកម្ពុជាខេត្តសៀមរាបបានធ្វើការអំពាវនាវដល់យុវជនទាំងអស់ ឱ្យចូលរួមជួយថែ រក្សាវប្បធម៌ប្រពៃណីដែលដូនតាយើងបានបន្សល់ទុកឱ្យ ដោយនាំគ្នាសិក្សាស្វែងយល់ និង គាស់រំលឹកមកវិញនូវអ្វីដែលស្ទើរនឹងបាត់បង់ ដូចជាខ្លែងឯកនេះជាដើម ។
លោកបានលើកឡើងថា ពាក់ព័ន្ធនឹងខ្លែងឯកនេះ ក្រសួងវប្បធម៌និងវិចិត្រសិល្បៈ បានកសាងសារមន្ទីរខ្លែងខ្មែរតាំងពីឆ្នាំ២០០៣ ប៉ុន្តែសួរថា តើយុវជនយើងប៉ុន្មាននាក់ដែលដឹង? ដូចនេះ សូមយុវជនយើងទៅសិក្សាស្វែងយល់បន្ថែមពីខ្លែងឯកនៅទីនោះផ្ទាល់ ។ ហើយក៏មានសមាគមអភិរក្ស និង អភិវឌ្ឍខ្លែងខ្មែរ ដើម្បីប្រមូលអ្នកស្រលាញ់វិស័យខ្លែងឯកខ្មែរ ឲ្យមកជួយថែរក្សាលើកស្ទួយវប្បធម៌ប្រពៃណីមួយនេះ និង ដើម្បីចែករំលែកចំណេះដឹងផងដែរ ។
ទន្ទឹមនឹងការព្រួយបារម្ភអំពីការបាត់បង់នេះក្រុមយុវជនបក្សខេត្តសៀមរាប បានបង្ហាញនូវការរំពឹងខ្ពស់ថា តាមរយៈការយកចិត្តទុកដាក់ពីសំណាក់រាជរដ្ឋាភិបាលកម្ពុជា ដែលដឹកនាំដោយសម្តេចធិបតី ហ៊ុនម៉ាណែត និង មានក្រសួងវប្បធម៌ និងវិចិត្រសិល្បៈជាសេនាធិការ នឹងនាំយកនូវខ្លែងឯក ដែលជាសម្បត្តិវប្បធម៌របស់ខ្មែរនេះ ចុះក្នុងបញ្ជីបេតិកភណ្ឌពិភពលោកនាពេលខាងមុខនេះ ។
ចែករំលែកព័តមាននេះ