មកដឹងស្ថានភាពដ៏លំបាកចុងក្រោយរបស់ អ៊ុំ គន្ធា មុនទទួលមរណភាព
- ភ្នំពេញ
រាជធានីភ្នំពេញ ៖ អតីតតារាចម្រៀងយេយេអ្នកនាង អ៊ុំ គន្ធា បានទទួលមរណភាពហើយ កាលពីថ្ងៃ១៧ ខែវិច្ឆិកា ឆ្នាំ២០២៤ ដោយរោគាពាធ…
រាជធានីភ្នំពេញ ៖ អតីតតារាចម្រៀងយេយេអ្នកនាង អ៊ុំ គន្ធា បានទទួលមរណភាពហើយ កាលពីថ្ងៃ១៧ ខែវិច្ឆិកា ឆ្នាំ២០២៤ ដោយរោគាពាធ ក្នុងអាយុ៤៥ឆ្នាំ ខណៈពេលស.ពរបស់អ្នកនាងបានតម្កល់ធ្វើបុណ្យនៅវត្តពោធិចិនតុង ផ្លូវសហព័ន្ធរុស្សី ខណ្ឌពោធិសែនជ័យ រាជធានីភ្នំពេញ ហើយត្រូវបូជានៅថ្ងៃទី១៨ វិច្ឆិកា ឆ្នាំ២០២៤ វេលារម៉ោង ៦ល្ងាច ។
នេះបើយោងតាមការប្រកាសអោយដឹងពីលោក អ៊ឹម ជីវ៉ា នៅលើបណ្តាញសង្គម ។ មុនពេលទទួលមរណៈភាព នាពេលនេះអ្នកនាង អ៊ុំ គន្ធា បានពើបប្រទះនូវការលំបាកយ៉ាងខ្លាំងទាំងស្ថានភាពជីវភាព និងអាការៈជំងឺដែលបានផ្ទុកនៅក្នុងខ្លួន នាងអស់រយៈពេលជិត២០ឆ្នាំចុងក្រោយមកនេះ ក្រោយនាងឃ្លាតចាកឆ្ងាយស្ទើរទាំងស្រុងពីអាជីពសិល្បៈ ។
អ្នកនាង អ៊ុំ គន្ធា ធ្លាប់បានលើកឡើងប្រាប់កោះសន្តិភាព តាមសារអេឡិចត្រូនិចថា នៅក្នុងរយៈពេលប្រមាណ៣ទៅ៤ ខែចុងក្រោយនេះនាងបានជួបប្រទះនូវបញ្ហាជីវភាពយ៉ាងខ្លាំង ដោយសារតែនាងមិនអាចធ្វើការងាររកប្រាក់បាន ក្នុងពេលដែលឈ្មោះមន្ត្រីធ្វើការនៅក្នុងអង្គភាពប្រឆាំងអំពើពុករលួយរបស់នាងក៏ត្រូវបានគេលុបចោល ។
នាងបញ្ជាក់ថា កន្លងមកអ្នកនាងមានជីវភាពគ្រាន់បើ មានហូបមានចុកគ្រប់គ្រាន់ ដោយសារតែឯកឧត្តម ឱម យិនទៀង អាណិតឃើញនាងលំបាកខ្លាំង ក៏នាំឲ្យចូលធ្វើការនៅអង្គភាពប្រឆាំងអំពើពុករលួយតាំងពីអំឡុងឆ្នាំ២០២១៩ ក្នុងឋានៈជាមន្ត្រីជាប់កិច្ចសន្យា ។
នាងបន្តថា ក្រោយរយៈពេល៣ខែចុងក្រោយ ដោយសារជំងឺរួមរឹតកាន់តែខ្លាំងទើបនាងមិនអាចចេញទៅបំពេញការងារ និងចុះអវត្តមានបាន ដូច្នេះខាងនាយកដ្ឋានបុគ្គលិកក៏លុបឈ្មោះនាងចោលតែម្តង ទើបធ្វើឲ្យនាងធ្លាក់មកជីវភាពលំបាករហូតរកប្រាក់បង់ថ្លៃបន្ទប់ជួលមិនបាន ។
អ្នកនាង អ៊ុំ គន្ធា បន្ថែមថា ក្រោយបាត់បង់ការងារខាងលើនេះ នាងក៏បានព្យាយាមស្វែងរកការងារផ្សេងៗទៀត ដើម្បីធ្វើដោយមានទាំងការងាររោងចក្រ និងការងារអនាម័យ ប៉ុន្តែការធ្វើការងារទាំងអស់នោះមិនបានយូរឡើយ ដោយសារតែនាងចេះតែឈឺជាប្រចាំ ។
នាងបញ្ជាក់ថា នាងបានផ្ទុកជំងឺសង្គមមួយនេះអស់រយៈពេលជិត២០ឆ្នាំមកហើយ ហើយកន្លងមកនាងបានព្យាយាមលេបថ្នាំជាប្រចាំផងដែរ ប៉ុន្តយ៉ាងណាបញ្ហាសុខភាព និងស្ថានភាពជំងឺរបស់នាងកាន់តែវិវត្តន៍ទៅមុខពីមួយថ្ងៃទៅមួយថ្ងៃ ។
នាងថា ស្ថានសុខភាពវាហាក់ដូចជា ស៊ាំរបស់ខ្ញុំហើយ ប៉ុន្តែបញ្ហាផ្លូវចិត្តនោះក៏វាសំខាន់ ដោយសារខ្ញុំបានរស់នៅជាមួយវា (ជំងឺ)អស់ពេលជិត២០ឆ្នាំហើយ ហើយខ្ញុំលេបថ្នាំរហូត តែអស់ពេលច្រើនឆ្នាំវាស៊ីអស់ហើយ វាឧស្សាហ៍កើតបូស និងហើមកូនកណ្តុរ ខណៈពេលស្បែកក៏តែងតែឡើងកន្ទួល និងពងបែក ។
អ្នកនាង អ៊ុំ គន្ធា បានពោលពាក្យទាំងអស់សង្ឃឹមថា សម្រាប់ស្ថានភាពជំងឺរបស់នាងនាពេលនេះ គឺមានតែទៅមុខ ដោយមិនអាចត្រឡប់ក្រោយបានឡើយ ក្នុងពេលដែលនាងក៏មានអាយុកាន់តែចាស់ពីមួយឆ្នាំទៅមួយឆ្នាំ ។
យ៉ាងណាបើតាមអ្នកនាង អ៊ុំ គន្ធា នាងសូមថ្លែងអំណរគុណដល់សប្បុរសជននានាដែលបានជួយដល់រូបនាងជាបន្តបន្ទាប់ ហើយក៏អរគុណដល់បណ្តាទស្សនិកជនដែលធ្លាប់ស្គាល់ និងគាំទ្រដល់រូបនាងមិនបានភ្លេចនាង ទោះបីជានាងបានធ្លាក់ខ្លួនដុនដាបខ្លាំងនាពេលនេះក៏ដោយ ។
គួរបញ្ជាក់ថា អតីតតារាចម្រៀងអ្នកនាង អ៊ុំ គន្ធា មានអាយុ៤៥ឆ្នាំ ដោយអ្នកនាងមានឪពុកឈ្មោះ អ៊ុំ សុផាត ជាអតីតមន្ត្រីក្រសួងពាណិជ្ជកម្មចូលនិវត្តន៍ និងម្តាយឈ្មោះ អ៊ុង ស៊ីនួន អាយុ៧០ឆ្នាំ ។ នាងជាកូនទី៥ ក្នុងចំណោមបងប្អូន៦នាក់ ។ នាងរៀនសូត្របានត្រឹមថ្នាក់ទី៥ក៏ឈប់ រួចចូលច្រៀងក្នុងវង់តន្ត្រីមួយនៅភោជនីយដ្ឋានផ្ការាំទឹករាំ ដែលកាលនោះនាងទើបតែមានអាយុ១៥ឆ្នាំប៉ុណ្ណោះ ។
នៅឆ្នាំ១៩៩៦នាងបានដាក់ពាក្យចូលប្រលងចម្រៀងជាមួយបងស្រីភ្លោះហើយបានជាប់ចំណាត់ថ្នាក់លេខ១ ។ តាំងពីពេលនោះមកអ្នកនាង អ៊ុំ គន្ធា ក្លាយជាតារាចម្រៀងយេយេល្បីឈ្មោះ ។
ទន្ទឹមនឹងកេរ្តិ៍ឈ្មោះលេចខ្ពស់ត្រដែតនេះ តារាចម្រៀងអ៊ុំ គន្ធាមានទំនាក់ទំនងស្នេហាជាមួយតារាចម្រៀងលោកផាន សុផាត រហូតក្លាយជាប្តីប្រពន្ធដោយមិនបានចូលរោងការ ។ នៅឆ្នាំ២០០៦ ចំណងនិស្ស័យស្នេហ៍របស់ពួកគេបានដាច់ដោចទៅវិញ បន្ទាប់ពីសាងភាពផ្អែមល្ហែមជាមួយគ្នាបាន៨ឆ្នាំ និងបន្សល់ទុកកូនប្រុស២នាក់ ។
ក្រោយជួបរឿងអាប់អួរក្នុងដំណើរជីវិតជាបន្តបន្ទាប់ អ្នកនាង អ៊ុំ គន្ធា ដែលធ្លាប់ជាតារាចម្រៀងយេយេរះភ្លឺចិញ្ចាច បានប្រែមករលត់រស្មីសូន្យសុង ដោយប្រើជីវិតត្រូវទ្រាំរស់ទាំងត្រដរត្រដាបត្រដួសជាមួយកូនប្រុសពីរនាក់ រហូតនាងទទួលមរណភាពនាពេលនេះ ៕
ចែករំលែកព័តមាននេះ