ប្រិយមិត្តទូរទស្សនិកជន អាចនឹងបានស្គាល់ហើយ តារាកំប្លែងជើងចាស់តាចេក កំពុងជួបការលំបាកខ្លាំង ខណៈជីវិតសិល្បៈរបស់លោក មានអ្នកហៅសម្តែង ឆ្លៀតពេលមកលក់ក្តាម ខ្យង បន្លែបង្ការ ដើម្បីចិញ្ចឹមជីវិត…
ប្រិយមិត្តទូរទស្សនិកជន អាចនឹងបានស្គាល់ហើយ តារាកំប្លែងជើងចាស់តាចេក កំពុងជួបការលំបាកខ្លាំង ខណៈជីវិតសិល្បៈរបស់លោក មានអ្នកហៅសម្តែង ឆ្លៀតពេលមកលក់ក្តាម ខ្យង បន្លែបង្ការ ដើម្បីចិញ្ចឹមជីវិត ។
ជាការពិត កាលពីកន្លងទៅក្នុងបណ្តាញសង្គម តាចេកក៏ធ្លាប់បានបង្ហោះក្នុងគណនី Tik Tok របស់លោកភ្ជាប់ជាមួយរូបភាពវីដេអូលក់ក្តាមខ្យង នៅផ្សារថា «លក់ក្តាមនឹងសន្សំលុយទៅស្រុក» ពោលតាមរយៈវីដេអូសកម្មភាព២៩វិនាទី ឃើញថា លោកពិតជាជួបការខ្វះខាត ដោយកាលពីកន្លងទៅ ពុំមានសូវមាននរណាដឹងពីជីវិតលំបាករបស់លោកនោះឡើយ ។
ក្រោយការបង្ហោះរបស់តាចេក ឃើញមានបងប្អូនមហាជនខ្លះលើកឡើងថា « ធ្វើឲ្យខ្ញុំអាណិតលើសអាណិត គឺគាត់អាយុច្រើនហើយ តែមកពិបាករឿងលុយកាក់ ចាស់ហើយមិនដឹងរឿងអីឲ្យបានទេ»។
មហាជនខ្លះទៀតលើកឡើងថា «គេមានអស់ហើយភ្លេចលោកអ៊ុំហើយ កម្សត់ណាស់» ។ និងមហាជនខ្លះទៀតថា « បងប្អូនអើយ បើឃើញលោកពូចេក គាត់លក់នៅកន្លែងណាបងប្អូនជួយគាត់ម្នាក់បន្តិចផង ឬក៏ជួយទិញគាត់ក៏បានដែរ ។ ខ្ញុំមិនដែលបានជួបទេ ទើបតែពេលនេះឃើញ tik tok គាត់» ។ និងមហាជនខ្លះទៀតរៀបរាប់ថា « ជីវិតក្រោយខ្នងនៃសិល្បៈពីមុន គឺលំបាកណាស់ ពួកគាត់ធ្វើឲយើងគ្រប់គ្នាសើចសប្បាយ តែក្រោយសិល្បៈវិញពួកគាត់លំបាកពេកហើយ» ។
តាមរយៈបទសម្ភាសន៍ជាមួយសារព័ត៌មានកោះសន្តិភាព លោកតាចេក ប្រាប់ថា បច្ចុប្បន្នលោកកំពុងតែលក់ដូរក្តាម បន្លែបង្ការផ្សេងជាច្រើន ក្រោមស្ពានកំពង់ពពិល ឃុំកំពង់ពពិល ស្រុកពារាំង ខេត្តព្រៃវែង ដោយកាលពីកន្លងទៅលោកនៅគួរស្រូវនោះ ។
តាចេកបន្តទៀតថា សព្វថ្ងៃលោកប្រកបរបរលក់ដូរនេះ ចំណេញបាន២ម៉ឺនរៀលក្នុងមួយថ្ងៃ ខណៈជីវភាពលោកលំបាកខ្លាំងក្រោយពេលលោកមិនសូវមានការសម្តែង ។ លោកថា ជាធម្មតាបន្លែដែលលោកបានយកមកលក់បន្តនេះ គឺលោកត្រូវងើបតាំងពីម៉ោង២ទាបភ្លឺ ដើម្បីទិញពីបងប្អូនយកមកលក់បន្តផ្សារចំណេញក្បាលកាក់តិចប៉ុណ្ណោះ ។
ស្ថិតក្នុងវ័យ៧១ឆ្នាំ តាចេក ដែលមានស្រុកកំណើតនៅរាជធានីភ្នំពេញលោកថា កន្លែងដែលលោកលក់ដូរបន្តិចបន្តួចនេះ គឺក្នុងមួយខែយកម៉ាស៊ី៨ម៉ឺនរៀល ខណៈពេលដែលលោកសុំគេលក់ទៀតផង ។ ជាការពិត មានវ័យកាន់ចាស់ តាចេក មានបងប្អូនចំនួន៤នាក់ តែបច្ចុប្បន្នបងប្អូនលោកបានស្លា.ប់អស់ហើយ ដោយនៅតែលោកប៉ុណ្ណោះ ។ កាលពីកន្លងទៅតាចេក បង្ហើបថា កាលពីឆ្នាំ៧៩ លោកជាគ្រូបង្រៀន និងបន្តមកឆ្នាំ៨៦ លោកបានប្រឡូក និងចូលសិល្បៈមកដល់បច្ចុប្បន្ន ដោយគិតត្រួសៗទៅ៤០ឆ្នាំ ដែលសម្តែងកំប្លែង ។
គួរបញ្ជាក់ដែរថា តាមរយៈការបង្ហោះរបស់លោក សាវិន ហ្វីលីពលោកថា « ជួយស៊ែផង! តា ចេក វ័យ៧១ឆ្នាំ កំពុងប្រកបរបរលក់បន្លែក្ដាមខ្យងយ៉ាងកំសត់ក្រោមស្ពានកំពង់ពពិល ឃុំកំពង់ពពិល ស្រុកពារាំង ខេត្តព្រៃវែង»៕ ដោយ៖លីហួ គីមឆាយ
ចែករំលែកព័តមាននេះ