ពិសេសណាស់! បង្កាត់ស្រូវកូនកាត់ថ្មីផ្ទុកកោសិកាសត្វគោ ដែលផ្តល់ប្រូតេអ៊ីនខ្ពស់
កូរ៉េខាងត្បូង ៖ អ្នកវិទ្យាសាស្ត្រនៅប្រទេសកូរ៉េខាងត្បូង បានបង្កាត់ស្រូវកូនកាត់និរន្តរភាពថ្មីមួយ
កូរ៉េខាងត្បូង ៖ អ្នកវិទ្យាសាស្ត្រនៅប្រទេសកូរ៉េខាងត្បូង បានបង្កាត់ស្រូវកូនកាត់និរន្តរភាពថ្មីមួយ ដែលជាស្រូវផ្ទុកកោសិកាសត្វគោ ដែលពួកគេបានអះអាងថា អាចជួយដោះស្រាយវិបត្តិចំណីអាហារ និងការប្រែប្រួលអាកាសធាតុ។
ស្រូវកូនកាត់ថ្មីនេះ ត្រូវបានបង្កាត់ និងដាំដុះក្នុងមន្ទីរពិសោធន៍មួយ ដោយក្រុមអ្នកវិទ្យាសាស្ត្រនៃសាកលវិទ្យាល័យ Yonsei ទីក្រុងសេអ៊ូល ដែលផ្ទុកទៅដោយសាច់ដុំ (Beef Muscle) និងកោសិកាខ្លាញ់របស់សត្វគោ។ ហើយជាលទ្ធផលអង្ករមានពណ៌ផ្កាឈូក ដែលក្រុមអ្នកស្រាវជ្រាវអះអាងថា អាចបរិភោគជំនួសសាច់ ជាមួយនឹងតម្លៃថោកជាង និងប្រកបដោយនិរន្តរភាពបរិស្ថាន ហើយបន្សល់ទុកនូវកាបូនតិចតួច។
លោកស្រី Park So-hyeon សហអ្នកនិពន្ធការសិក្សាបានថ្លែងថា «អ្នកបរិភោគនឹងទទួលបានសារធាតុចិញ្ចឹមទាំងអស់ ដែលត្រូវការពីអង្ករប្រូតេអ៊ីនបណ្តុះកោសិកា។ អង្ករមានកម្រិតសារធាតុចិញ្ចឹមខ្ពស់រួចហើយ ប៉ុន្តែការបន្ថែមកោសិកាសាច់អាចជំរុញអាហាររូបត្ថម្ភបន្ថែមទៀត»។
ក្រុមអ្នកស្រាវជ្រាវអះអាងថា ផលិតផលចុងក្រោយមានប្រូតេអ៊ីន ៨% និងជាតិខ្លាញ់ច្រើនជាងអង្ករធម្មតា ៧%។ ការបង្កាត់ថ្មីចុងក្រោយបានបន្សល់ទុកកាបូនទាបជាងការចិញ្ចឹមសត្វនៅក្នុងកសិដ្ឋាន ដែលប្រើថវិកា ទឹក និងបញ្ចេញឧស្ម័នផ្ទះកញ្ចក់យ៉ាងច្រើន។ ស្រូវកូនកាត់ផ្តល់ប្រូតេអ៊ីន១០០ក្រាម និងបញ្ចេញកាបូនឌីអុកស៊ីតក្រោម៦.២៧គីឡូក្រាម ពោលគឺតិចជាងការផលិតសាច់គោដល់ទៅ៨ដងឯណោះ។
ប្រសិនបើត្រូវចរាចរលើទីផ្សារ វានឹងផ្តល់ជម្រើសតម្លៃថោកជាងសម្រាប់អ្នកប្រើប្រាស់នៅកូរ៉េខាងត្បូង ដែលតម្លៃត្រូវបានប៉ាន់ស្មានថាប្រហែល ២.២៣ដុល្លារអាមេរិកក្នុង១គីឡូក្រាម ខណៈដែលសាច់គោមានតម្លៃប្រហែល១៥ដុល្លារ។
ក្រុមការងារគ្រោងនឹងអភិវឌ្ឍដំណើរការបន្ថែមទៀត មុនពេលអង្ករកូនកាត់នេះចេញលក់លើទីផ្សារ ដើម្បីឱ្យកោសិកាអាចលូតលាស់បានល្អក្នុងគ្រាប់ស្រូវសម្រាប់អាហារូបត្ថម្ភកាន់តែច្រើន។ បន្ថែមលើសពីនេះទៀត លោកស្រី Park បង្ហាញសុទិដ្ឋនិយមថា ថ្ងៃណាមួយអង្ករកូនកាត់អាចបម្រើជាអាហារជំនួយសម្រាប់ទុរ្ភិក្ស អាហារយោធា ឬសូម្បីតែអាហារសម្រាប់ក្រុមយានិកអវកាស៕ (ប្រភព ៖ AFP)
ចែករំលែកព័តមាននេះ