ការស្រាវជ្រាវមួយបង្ហាញថា មនុស្សពេញវ័យមិនមែនស្ថិតក្នុងអាយុ១៨ឆ្នាំនោះទេ
ចក្រភពអង់គ្លេស ៖ យោងតាមការសិក្សាស្រាវជ្រាវរបស់ក្រុមអ្នកវិទ្យាសាស្ត្រជំនាញផ្នែកសរសៃប្រសាទ
ចក្រភពអង់គ្លេស ៖ យោងតាមការសិក្សាស្រាវជ្រាវរបស់ក្រុមអ្នកវិទ្យាសាស្ត្រជំនាញផ្នែកសរសៃប្រសាទបានបង្ហាញថា អំណះអំណាងដែលអះអាងថា មនុស្សពេញវ័យស្ថិតនៅក្នុងអាយុ១៨ឆ្នាំ ប្រហែលជាមិនមានភាពត្រឹមត្រូវទាំងស្រុងនោះទេ។ នេះបើយោងតាមប្រភពពីគេហទំព័រ Pubity និង Sunday Times ដែលចេញផ្សាយកាលពីពេលថ្មីៗនេះ។
អ្នកវិទ្យាសាស្ត្របានណែនាំថា បើទោះបីជាអ្នកមានអាយុ១៨ឆ្នាំក៏ដោយ ក៏អ្នកមិនមែនជាមនុស្សពេញវ័យ ដែលពោរពេញដោយសមត្ថភាពនោះទេ ដោយសារតែខួរក្បាលនៅតែស្ថិតក្នុងការផ្លាស់ប្ដូរសំខាន់ៗនៅឡើយ។ លោកសាស្ត្រាចារ្យ Peter Jones មកពីសាកលវិទ្យាល័យ Cambridge នៃចក្រភពអង់គ្លេស បានសង្កត់ធ្ងន់ថា ការផ្លាស់ប្តូរពីកុមារភាពទៅភាពពេញវ័យ កើតឡើងនៅក្នុងរយៈពេលជាង៣ទសវត្ស ឬ ៣០ឆ្នាំ ដូច្នេះមនុស្សមិនអាចពេញវ័យបានទេ ប្រសិនបើពួកគេមិនទាន់ឈានដល់អាយុ៣០ឆ្នាំ ។
នៅក្នុងការស្រាវជ្រាវរបស់ក្រុមអ្នកវិទ្យាសាស្ត្រជំនាញប្រព័ន្ធសរសៃប្រសាទ ដែលដឹកនាំដោយលោកវេជ្ជបណ្ឌិត Peter Jones និងសហការីរបស់គាត់បានប្រើប្រាស់ម៉ាស៊ីនស្កេន MRI ដើម្បីសង្កេតមើលខួរក្បាលអ្នកស្ម័គ្រចិត្តចំនួន២៩៧នាក់ ដែលមានអាយុចាប់ពី ១៤ ដល់ ២៤ឆ្នាំ។ ជាលទ្ធផលពួកគេបានរកឃើញថា ខួរក្បាលនៅតែអភិវឌ្ឍបន្ទាប់ពីអាយុ១៨ឆ្នាំ ដែលមានន័យថា អាកប្បកិរិយា ការគិត អារម្មណ៍ និងសុខភាពផ្លូវចិត្ត ទំនងជាមានការវិវត្តន៍កាន់តែខ្លាំង៕
ចែករំលែកព័តមាននេះ