មហាជន ជាពិសេសទស្សនិកជនដែលនិយមតាមដានទស្សនាក្រុមកំប្លែងនាយ ពាក់មី ដែលដឹកនាំដោយលោក សុវណ្ណរិទ្ធី ហៅតា វ៉ិចទ័រ បានសម្តែងការភ្ញាក់ផ្អើលបន្ទាប់ពីគេបានឃើញវត្តមានរបស់ក្រុមកំប្លែងមួយនេះ បង្ហាញវត្តមានសម្តែងជាថ្មីនៅស្ថានីយទូរទស្សន៍
រាជធានីភ្នំពេញ ៖ មហាជន ជាពិសេសទស្សនិកជនដែលនិយមតាមដានទស្សនាក្រុមកំប្លែងនាយ ពាក់មី ដែលដឹកនាំដោយលោក សុវណ្ណរិទ្ធី ហៅតា វ៉ិចទ័រ បានសម្តែងការភ្ញាក់ផ្អើលបន្ទាប់ពីគេបានឃើញវត្តមានរបស់ក្រុមកំប្លែងមួយនេះ បង្ហាញវត្តមានសម្តែងជាថ្មីនៅស្ថានីយទូរទស្សន៍ CTN បន្ទាប់ពីជួបភាពចម្រូងចម្រាស់ រហូតដើរចេញពីស្ថានីយទូរទស្សន៍មួយនេះ។
ការបង្ហាញវត្តមានសម្តែងជាថ្មីនៅលើទ្រនំចាស់របស់ក្រុមកំប្លែងខាងលើនេះ ត្រូវបានមហាជនមួយចំនួនសន្និដ្ឋានថា ក្រុមកំប្លែងនាយ ពាក់មី និងលោក សុវណ្ណ រិទ្ធី ហៅតា វ៉ិចទ័រ ទំនងជាវិលមកចូលរួមជាមួយ CTN វិញហើយ បន្ទាប់ពីការចាកចេញមួយរយះកន្លងមកនេះ។
យ៉ាងណា ជុំវិញបញ្ហាខាងលើ អ្នកដឹកនាំក្រុមកំប្លែងនាយ ពាក់មី និងលោក សុវណ្ណ រិទ្ធី ហៅតា វ៉ិចទ័រ បានបញ្ជាក់ថា វីដេអូកំប្លែងរបស់លោកពិតជាបានចាក់បញ្ចាំងនៅស្ថានីយទូរទស្សន៍ CTN និង MY TV ជាថ្មីឡើងវិញមែន ប៉ុន្តែមិនមែនជាការវិលមកធ្វើការជាថ្មីនៅទីនេះវិញឡើយ។
លោកបញ្ជាក់ប្រាប់កោះសន្តិភាពតាមសារអេឡិចត្រូនិចថា បច្ចុប្បន្ន ក្រុមកំប្លែងរបស់លោកបានចុះកុងត្រាធ្វើការនៅក្រុមហ៊ុន 9 Colors Production បន្ទាប់ពីបញ្ចប់ការងារនៅ CTN ហើយនៅក្រុមហ៊ុនថ្មីនេះលោកនិងក្រុមការងារបានផលិតកម្មវិធីសំណើចសម្រាប់ចាក់ផ្សាយតាមបណ្តាស្ថានីយទូរទស្សន៍នានា។
លោកបន្តថា ក្រុមហ៊ុននោះបានធ្វើការសហការជាមួយគ្រប់បណ្តាស្ថានីយទូរទស្សន៍ដែលមានបំណងចង់សហការយកវីដេអូកំប្លែងរបស់លោកយកទៅចាក់ផ្សាយ ដោយក្រុមហ៊ុនមិនប្រកាន់ចំពោះប៉ុស្តិ៍ទូរទស្សន៍ណាមួយនោះឡើយ។
យ៉ាងណាបើតាមលោកតា វ៉ិច ទ័រ ថា សម្រាប់រូបលោក គឺមិនដែលមានទំនាស់អ្វីជាមួយ CTN នោះឡើយ ហើយលោកក៏មិនដែលភ្លេចគុណថ្នាក់ដឹកនាំនៅស្ថានីយទូរទស្សន៍មួយនេះដែរ ដោយសារគាត់បានផ្តល់ឱកាសឲ្យយើងបានហាត់រៀន ខណៈពេលដែលលោកតែងតែប្រកាន់ជំហរថា ឆ្លងស្ពានហើយមិនរុះស្ពានចោលឡើយ ហេតុនេះពួកយើងនៅធ្វើការដោយសហការគ្នាល្អរហូត។
លោកបន្តថា ការចាក់ផ្សាយពីក្រុមកំប្លែងរបស់លោកនៅស្ថានីយទូរទស្សន៍CTN នាពេលនេះគឺជាការសហការគ្នារវាងក្រុមហ៊ុន និងស្ថានីយ ហើយវាក៏ជាតួនាទីរបស់លោក និងក្រុមកំប្លែងទាំងមូលផងដែរ។
ទោះជាយ៉ាងណា លោក សុវណ្ណរិទ្ធី បានសង្កត់ធ្ងន់ថា សម្រាប់ការវិលត្រឡប់របស់លោក និងក្រុមកំប្លែងទាំងអស់មកធ្វើការនៅ CTN ជាថ្មីឡើងវិញនោះ គឺមិនអាចឡើយ ដោយសារពេលនេះ ក្រុមការងាររបស់លោកកំពុងតែធ្វើការនៅក្រុមហ៊ុនថ្មីហើយ។
ជាការកត់សម្គាល់ បន្ទាប់ពីការកើតទុក្ខមិនសុខចិត្ត និងមិនពេញចិត្តសម្រាប់ការរឹតត្បិតពីពេលវេលាធ្វើការរបស់អ្នកដឹកនាំថ្មី CTN ជាជនជាតិឥណ្ឌានោះ លោក សុវណ្ណរិទ្ធី ហៅតា វ៉ិចទ័រ និងនាយ ពាក់មី និងតារាកំប្លែងទាំងពីរបានសម្រេចដើរចេញពីស្ថានីយទូរទស្សន៍មួយនេះដោយមិនបកក្រោយ។ ក្រោយការចាកចេញពីទ្រនំចាស់នេះ ក្រុមកំប្លែងនាយ ពាក់ មី ដែលដឹកនាំដោយតា វ៉ិចទ័រ បានបង្ហាញវត្តមានសម្តែងនៅស្ថានីយ៍ទូរទស្សន៍ PNN ក្រោមកិច្ចសហការជាមួយក្រុមហ៊ុនថ្មី សម្រាប់ផលិតកម្មវិធីកំប្លែង៕
ចែករំលែកព័តមាននេះ