ប៉ែន ចំរុង បង្ហាញអារម្មណ៍ពិតពេលចូលទៅកាន់តំបន់ឱរ៉ាល់
រាជធានីភ្នំពេញ ៖ មួយរយៈចុងក្រោយនេះ គេតែងតែសង្កេតឃើញតារាសម្តែង និងជាពិធីករពូកែវោហា លោក ប៉ែន ចំរុង រួមជាមួយនឹងលោក តាន់…
រាជធានីភ្នំពេញ ៖ មួយរយៈចុងក្រោយនេះ គេតែងតែសង្កេតឃើញតារាសម្តែង និងជាពិធីករពូកែវោហា លោក ប៉ែន ចំរុង រួមជាមួយនឹងលោក តាន់ គឹមសួរ បានទៅកាន់តំបន់ព្រៃភ្នំនៅតាមបណ្តាខេត្តជាច្រើន ក្នុងប្រទេសកម្ពុជា ហើយពេលដែលលោកបានទៅម្តងៗ លោកតែងតែបង្ហោះសារនៅលើបណ្តាញសង្គមរបស់លោក ដោយបង្ហាញពីអារម្មណ៍ស្រលាញ់បរិស្ថានធម្មជាតិ និងចង់ឲ្យតំបន់ព្រៃភ្នំទាំងអស់ នៅក្នុងប្រទេសកម្ពុជាក្លាយជាពណ៌បៃតង ។
ឆ្លើយឆ្លងតាមរយៈទូរស័ព្ទជាមួយភ្នាក់ការងារសារព័ត៌មានកោះសន្តិភាព តារាសម្តែង និងជាពិធីករពូកែវោហា លោក ប៉ែន ចំរុង បានឲ្យដឹងថា លោកពិតជាស្រលាញ់ធម្មជាតិនៅក្នុងប្រទេសយើងខ្លាំងណាស់ បើទោះបីបច្ចុប្បន្ននេះ លោកមានភារកិច្ចសំខាន់ដែលត្រូវមើលថែភរិយា និងកូនស្រី ដែលនៅតូច ក៏ដូចជា កំពុងមមាញឹកក្នុងវិថីសិល្បៈក៏ពិតមែន លោកតែងតែឆ្លៀតពេលវេលាទៅកាន់ទីកន្លែងដែលមានតំបន់ព្រៃភ្នំ ដើម្បីលំហែរខួរក្បាលផង និងដើម្បីចូលរួមថែរក្សា និងអភិរក្សព្រៃឈើផងដែរ ។
លោកប៉ែន ចំរុង បន្តថា ប៉ុន្មានថ្ងៃមុនលោក បានទៅកាន់តំបន់ឱរ៉ាល់ ដែលស្ថិតនៅក្នុងស្រុកឱរ៉ាល់ ខេត្តកំពង់ស្ពឺ ទីនោះពិតជាត្រជាក់ ដោយសារតំបន់នោះសំបូរទៅដោយព្រៃឈើធំៗ មើលទៅពិតជាស្រស់បំព្រងខ្លាំងណាស់ ។
ពាក់ព័ន្ធជាមួយធម្មជាតិពណ៌បៃតងខៀវខ្ចីនេះ លោកក៏បានបង្ហាញអារម្មណ៍សោកស្តាយផងដែរ ដោយលោកបានបញ្ជាក់ថា ពេលដែលលោកដើរចូលព្រៃកាន់តែជ្រៅ លោកបានឃើញដើមឈើខ្លះត្រូវបានកាប់បំផ្លាញដោយអន្លើរៗ ។ តារាសម្តែងរូបនេះបន្តទៀតថា បន្ទាប់ពីបានធ្វើដំណើរកម្សាន្តបែបផ្សងព្រេង នៅក្នុងតំបន់ឱរ៉ាល់ជាច្រើនលើកច្រើនសារមកនេះ បានធ្វើឲ្យលោកមានចិត្តស្រឡាញ់ព្រៃឈើ និងចង់ចូលរួមអភិរក្ស ជាពិសេសចង់រកចំណូលបន្ថែមជួយប្រជាជនក្នុងសហគមន៍នោះ ។
លោកប៉ែន ចំរុង បាននិយាយថា ពេលលោកទៅដល់ឃើញប្រជាជននៅក្នុងសហគមន៍គាត់ពឹងផ្អែកទាំងស្រុងលើអនុផលនៃព្រៃឈើ ដូច្នេះជីវភាពរបស់ពួកគាត់ពិតជាពិបាក ដែលធ្វើឲ្យលោកមានគំនិតចង់ជួយប្រជាជននៅតំបន់នោះ ដោយចង់ផ្សព្វផ្សាយពីសម្រស់ស្រស់ស្អាតក្នុងតំបន់ឱរ៉ាល់ និងចង់ធ្វើឲ្យតំបន់នោះឲ្យក្លាយជាតំបន់ទេសចរណ៍ ។ លោកបន្ថែមថា ការនាំទេសចរចូលក្នុងព្រៃ គឺជារឿងមួយដ៏ល្អ ព្រោះវាអាចជួយការពារព្រៃឈើដោយប្រយោល និងបង្កើនប្រាក់ចំណូលដល់ប្រជាជនសហគមន៍ក្នុងតំបន់នោះ ។
លោកប៉ែន ចំរុង បានបញ្ជាក់ថា បើមានពេលវេលាគ្រប់គ្រាន់លោកនឹងធ្វើការគៀងគរអ្នកសិល្បៈជាច្រើនផ្សេងៗទៀត ឲ្យចូលរួមផ្សព្វផ្សាយពីផលប៉ះពាល់នៃការកាប់បំផ្លាញព្រៃឈើ និងដើម្បីឲ្យតំបន់ព្រៃឈើនៅក្នុងប្រទេសកម្ពុជាយើងក្លាយជាពណ៌បៃតង ៕
ចែករំលែកព័តមាននេះ