ខេត្តក្រចេះ ៖ ផ្ទះកន្តាំង៣ខ្នងធ្វើពីឈើប្រក់ក្បឿងចំនួន២ ដែលមានតម្លៃរាប់ម៉ឺនដុល្លារ នៅជាប់គ្នាក្នុងភូមិរកាកណ្តាលទី១ សង្កាត់រកាកណ្តាល ក្រុងក្រចេះ ត្រូវបានអគ្គិភ័យលេបត្របាក់គ្មានសល់កាលពីម៉ោង៩ និង៣០នាទីព្រឹក ថ្ងៃទី៩ មេសា ។
នៅក្នុងហេតុការណ៍នេះ គេមិនទាន់មានប្រភពព័ត៌មានណាមួយបញ្ជាក់ថា មូលហេតុដែលបង្កឱ្យមានគ្រោះអគ្គិភ័យនេះកើតឡើងបណ្តាលមកពីមូលហេតុអ្វីនៅឡើយនោះទេ ។ ដោយឡែក ម្ចាស់ផ្ទះដែលជាដើមហេតុបានអះអាងប្រាប់សមត្ថកិច្ចថា បណ្តាលមកពីទុស្សេខ្សែភ្លើង ខណៈដែលរូបគាត់ និងភរិយាមិននៅផ្ទះរវល់ទៅចូលរួមពិធីបុណ្យផ្ទះម្តាយ ។
លោកស្រីកុសល ចៅសង្កាត់រកាកណ្តាលបានឱ្យដឹងថា លំនៅឋានទាំងពីរ ត្រូវបានអគ្គិភ័យលេបត្របាក់អស់ទាំងស្រុង ខណៈដែលម្ចាស់លំនៅឋានទាំងពីរមិននៅផ្ទះ ។ អ្នកស្រីបន្តថា អណ្តាតភ្លើងបានឆាបឆេះចេញពីផ្ទះកន្តាំង៣ខ្នងមួយ មានទំហំ៨ម៉ែត្រគុណ១២ម៉ែត្រ ធ្វើអំពីឈើប្រក់ក្បឿង ជាកម្មសិទ្ធិរបស់ឈ្មោះសន ធី អាយុ៣៧ឆ្នាំ ជាបុគ្គលិកមន្ទីរអប់រំ យុវជន និងកីឡា មានប្រពន្ធឈ្មោះចោម ចរណៃ អាយុ២៩ឆ្នាំ ជាគ្រូបង្រៀន ។ ចំណែកឯសម្ភារ និងទ្រព្យដែលត្រូវបានខូចខាតទាំងស្រុងក្នុងអណ្តាតភ្លើងនោះរួមមានស្រូវ២០បាវ ប្រាក់ខ្មែរ៣០ម៉ឺនរៀល ប្រាក់អាមេរិក២២០ដុល្លារ ទូ៣ គ្រែ១ និងសម្ភារប្រើប្រាស់មួយចំនួនធំ ។
រីឯលំនៅឋានមួយទៀតក៏ជាផ្ទះកន្តាំង៣ខ្នងដូចគ្នាដែរ មានទំហំ៧,៥ម៉ែត្រគុណ១២ម៉ែត្រ ធ្វើអំពីឈើប្រក់ក្បឿង ដែលទើបតែសាងសង់រួចកាលពីឆ្នាំទៅ ជាកម្មសិទ្ធិរបស់ឈ្មោះហ៊ន សុមី អាយុ៣៣ឆ្នាំ បម្រើការនៅអង្គការ WWF ខេត្តក្រចេះ និងប្រពន្ធឈ្មោះលី ម៉ាឡៃ អាយុ៣២ឆ្នាំ ជាគ្រូបង្រៀន ។ លំនៅឋានមួយនេះត្រូវអណ្តាតភ្លើងឆាបឆេះអស់គ្មានសល់ រួមទាំងសម្ភារ និងទ្រព្យសម្បត្តិជាច្រើនទៀត មានដូចជា ប្រាក់អាមេរិក៣០០ដុល្លារ គ្រឿអលង្ការប្លាទីនជាង១តម្លឹង និងសម្ភារប្រើប្រាស់ក្នុងផ្ទះមួយចំនួនធំ ។
តាមការអះអាងនៅកន្លែងកើតហេតុបានឱ្យដឹងថា ម្ចាស់ផ្ទះជាដើមហេតុឈ្មោះសន ធី អាយុ៣៧ឆ្នាំ បាននិយាយថា ថ្ងៃកើតហេតុគាត់ និងប្រពន្ធមិននៅផ្ទះទេ និងចាក់សោផ្ទះ ហើយបាននាំគ្នាទៅធ្វើបុណ្យនៅផ្ទះម្តាយ ។ បុរសរូបនេះអះអាងថា ក្នុងផ្ទះគាត់មិនមានអុជធូបទៀន ឬដុតភ្លើងទុកចោលនោះឡើយ ។
លោកស្រីកុសល ចៅសង្កាត់រកាកណ្តាលបានប្រាប់ទៀតថា មុនពេលកើតហេតុ គឺមានការដាច់ចរន្តអគ្គិសនី ហើយបន្ទាប់ពីចរន្តអគ្គិសនីបានភ្ជាប់វិញ ក៏ឃើញមានផ្សែងហុយចេញតាមដំបូលផ្ទះឈ្មោះសន ធី និងមានអណ្តាតភ្លើងឆេះចេញយ៉ាងសន្ធោសន្ធៅ គ្មាននរណាជួយទាន់ ខណៈដែលម្ចាស់លំនៅឋានទាំងពីរមិននៅផ្ទះ និងចាក់សោពីខាងក្រៅជាប់ថែមទៀតនោះ ។
អគ្គិភ័យបានឆាបឆេះឡើងយ៉ាងសន្ធោសន្ធៅអស់រយៈពេលជិត២ម៉ោង ទើបមានការធូរស្រាល បន្ទាប់ពីកម្លាំងនគរបាលបានប្រើប្រាស់រថយន្តពន្លត់អគ្គិភ័យចំនួន២គ្រឿង និងប្រើប្រាស់ទឹកអស់ចំនួន១២រថយន្ត ។ ក្នុងសកម្មភាពនៃការជួយសង្គ្រោះបាញ់ទឹកពន្លត់នោះ គឺមានការចុះដឹកនាំចាត់ចែងផ្ទាល់ពីសំណាក់លោកឧត្តមសេនីយ៍ត្រី ជួង ស៊ាងហាក់ ស្នងការនគរបាលខេត្ត និងលោកវរសេនីយ៍ឯក ហន ប៉ូច ស្នងការរងកណ្តាលសណ្តាប់ធ្នាប់ និងកងកម្លាំងនគរបាលជាច្រើនរូបទៀត ។
លោកវរសេនីយ៍ឯក ហន ប៉ូច ស្នងការរងកណ្តាលសណ្តាប់ធ្នាប់បានមានប្រសាសន៍ឱ្យដឹងថា ក្នុងសកម្មភាពចុះជួយសង្គ្រោះគ្រោះអគ្គិភ័យនាព្រឹកនោះ ស្នងការដ្ឋាននគរបាលខេត្ត បានប្រើប្រាស់កម្លាំងជិត១០០នាក់ និងប្រើប្រាស់រថយន្តពន្លត់អគ្គិភ័យចំនួន២គ្រឿង និងទឹកចំនួន១២រថយន្ត ទើបធ្វើការគ្រប់គ្រងស្ថានការណ៍បានវិញក្នុងរយៈពេលជិត២ម៉ោងរួចមក ។
លោកស្នងការរងបានបញ្ជាក់ថា ជាមួយនឹងស្ថានភាពនោះ កម្លាំងសមត្ថកិច្ចបានធ្វើការបាញ់ទឹកពន្លត់ និងបាញ់ទឹកទប់ស្កាត់មិនឱ្យឆេះរាលដាលដល់លំនៅឋានមួយចំនួនទៀតដែលនៅក្បែរនោះ ។ លោកបន្តថា កម្លាំងនគរបាលនៅតែបន្តការស្រាវជ្រាវរកមូលហេតុពិតប្រាកដដែលបង្កឱ្យមានគ្រោះអគ្គិភ័យនេះ ។ ទោះបីជាជំហានដំបូងមានការសង្ស័យពីការទុស្សេចរន្តអគ្គិសនីក្តី ។ លំនៅឋានទាំង២ដែលក្លាយជាចំណីភ្លើងនេះ ជាផ្ទះដែលលម្អដោយឈើប្រណីតតម្លៃរាប់ម៉ឺនដុល្លារ ។ ពិតជាគួរឱ្យមានការស្តាយពន់ពេកណាស់ ដែលអ្វីៗបានក្លាយជាផេះផង់ក្នុងភ្លើងតែមួយប៉ប្រិចភ្នែក ៕
ចែករំលែកព័តមាននេះ