រាជធានីភ្នំពេញ ៖ វេជ្ជបណ្ឌិតជនជាតិកូរ៉េ២នាក់បានស្លាប់ និង២នាក់ទៀតមានអាការៈធ្ងន់ធ្ងរបញ្ជូនទៅសង្គ្រោះបន្ទាន់នៅមន្ទីរពេទ្យកាល់ម៉ែត បន្ទាប់ពីនាំគ្នាផឹកគ្រឿងស្រវឹងជប់លៀងឆ្លងឆ្នាំសកល២ថ្ងៃជាប់ៗគ្នា ដែលហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង១២ថ្ងៃត្រង់ ថ្ងៃទី២ មករា ២០១៦ នៅចំណុចបន្ទប់ពិគ្រោះជំងឺទូទៅមួយកន្លែងដែលមានទីតាំងនៅផ្ទះលេខ២២អឺ ផ្លូវលេខ៥៩៤ ស្ថិតក្នុងសង្កាត់បឹងកក់២ ខណ្ឌទួលគោក រាជធានីភ្នំពេញ ។
ប្រភពពីសមត្ថកិច្ចបានឲ្យដឹងថា ជនរងគ្រោះដែលស្លាប់បាត់បង់ជីវិតទាំង២នាក់មាន ១-ឈ្មោះ AN Hyon chang ភេទប្រុស អាយុ៥៦ឆ្នាំ ជនជាតិកូរ៉េខាងជើង មុខរបរ វេជ្ជបណ្ឌិត ស្នាក់នៅកន្លែងកើតហេតុ កាន់លិខិតឆ្លងដែនលេខ ៧៤៥២៣០១៨០ និង ២-ឈ្មោះ RI Monchol ភេទប្រុស អាយុ៥០ឆ្នាំ ជនជាតិកូរ៉េខាងជើង មុខរបរ វេជ្ជបណ្ឌិត ស្នាក់នៅកន្លែងកើតហេតុ កាន់លិខិតឆ្លង៧៤៥១៣៥០០៥ ។ ចំណែកជនរងគ្រោះ២នាក់ទៀតមានអាការៈធ្ងន់ធ្ងរ ត្រូវបានបញ្ជូនទៅសង្គ្រោះនៅមន្ទីរពេទ្យកាល់ម៉ែត ។
ប្រភពពីក្រុមគ្រួសារជនរងគ្រោះបានឲ្យដឹងថា ខណៈឆ្លងឆ្នាំសកល ជនរងគ្រោះទាំង៤នាក់ រួមជាមួយមិត្តភក្តិជាជនជាតិកូរ៉េដូចគ្នាប្រមាណជា១០នាក់បាននាំគ្នាផឹកគ្រឿងស្រវឹងជប់លៀងអបអរសាទរឆ្លងឆ្នាំសកលជាប់ៗគ្នា២យប់ គឺយប់ថ្ងៃទី៣១ធ្នូ២០១៥ រហូតដល់ម៉ោង៩យប់ថ្ងៃទី០១មករា២០១៦ទើបត្រឡប់មកផ្ទះវិញ ស្រាប់តែម៉ោងប្រមាណ២រំលងអធ្រាត្រឈានចូលថ្ងៃទី២ មករា ២០១៦ ជនរងគ្រោះមានអាការៈមិនស្រួលខ្លួន ម្យ៉ាងគាត់មានជំងឺគាំងបេះដូងផង ក៏ឲ្យប្រពន្ធដែលជាវេជ្ជបណ្ឌិតដូចគ្នាផ្សំថ្នាំលេប និងចាក់ថ្នាំឲ្យ រហូតដល់ម៉ោងប្រហែល៣ទៀបភ្លឺក៏មានអាការៈកាន់តែធ្ងន់ធ្ងរទៅរហូតស្លាប់តែម្តង ។ ចំណែក២នាក់ទៀតត្រូវបានបញ្ជូនទៅសង្គ្រោះនៅមន្ទីរពេទ្យកាល់ម៉ែត ។
ក្រោយពេលមានការភ្ញាក់ផ្អើល សមត្ថកិច្ចជំនាញបានចុះទៅកន្លែងកើតហេតុ និងធ្វើកោសល្យវិច្ច័យសពជនរងគ្រោះទាំង២នាក់ ហើយបានធ្វើការអះអាងថា ជនរងគ្រោះទាំង២នាក់ស្លាប់ដោយសារជំងឺគាំងបេះដូង ៕
ចែករំលែកព័តមាននេះ