ខេត្តបន្ទាយមានជ័យ ៖ ផ្លូវកៅស៊ូចូលអាងត្រពាំងថ្មនៅស្រុកភ្នំស្រុកប្រវែង២៣គីឡូមែ៉ត្រត្រូវបានមន្ត្រីជំនាញប្រាប់ថា មិនមែនដោយសារផ្លូវធ្វើគ្មានគុណភាពនោះទេ តែការខូចខាតនេះដោយសារទឹកលិច និងរថយន្តដឹកលើសទម្ងន់បើកឆ្លងកាត់ ។
ប្រជាពលរដ្ឋស្រុកភ្នំស្រុកបាននិយាយថា ផ្លូវចូលស្រុកភ្នំស្រុកឆ្ពោះទៅអាងត្រពាំងថ្មកំពុងរងការខូចខាតធ្ងន់ធ្ងរដោយសារតែក្រុមហ៊ុនដែលទទួលស្ថាបនាផ្លូវកៅស៊ូធ្វើគ្មានគុណភាពជាហេតុនាំឱ្យប្រជាពលរដ្ឋធ្វើដំណើរទៅមកជួបការលំបាក បើជិះពេលយប់អាចធ្លាក់ជង្ហុកប្រឈមនឹងគ្រោះថ្នាក់បំផុត ។
លោក គឹម សុវណ្ណ ប្រធានមន្ទីរសាធារណការ និងដឹកជញ្ជូនខេត្តបានប្រាប់ថា ផ្លូវដែលតភ្ជាប់ពីផ្លូវជាតិលេខ៦ទៅកាន់ស្រុកភ្នំស្រុក និងឆ្ពោះទៅអាងត្រពាំងថ្មជាតំបន់រមណីយដ្ឋាន ហើយក៏ជាតំបន់អភិរក្សសត្វដ៏កម្រក្នុងលោក ត្រូវបានស្ថាបនាឡើងនៅចុងឆ្នាំ២០០៤រួចរាល់នៅដើមឆ្នាំ២០០៥ ។ ក្រោយពេលស្ថាបនារួច ផ្លូវនេះបានរងគ្រោះដោយទឹកជំនន់បង្កឲ្យកន្លែងខ្លះមានជង្ហុកដក់ទឹក រួមផ្សំនឹងរថយន្តធុនធ្ងន់ដឹកលើសតោនឆ្លងកាត់ផងក៏កាន់តែខូចបន្ថែមទៀត នៅរយៈពេលប៉ុន្មានឆ្នាំចុងក្រោយនេះ ។
លោកបន្តថា បន្ទាប់ពីរងការខូចខាតមន្ទីរជំនាញបានបើកការជួសជុលនៅកន្លែងដែលមានជង្ហុក និងកន្លែងសំបុកមាន់ដើម្បីឱ្យប្រជាពលរដ្ឋធ្វើដំណើរទៅមកបានស្រួល និងសំណូមពរឱ្យបញ្ឈប់ការដឹកទំនិញលើសតោនឆ្លងកាត់ដើម្បីឱ្យផ្លូវមួយខ្សែនេះគង់វង្សបានយូរអង្វែងបម្រើឱ្យការធ្វើដំណើរបានងាយស្រួល ៕
ចែករំលែកព័តមាននេះ