ខេត្តកំពត ៖ បុរសចំណាស់ម្នាក់ឈ្មោះហ៊ង ស៊ន អាយុ៦១ឆ្នាំ ត្រូវបានបុរសម្នាក់យកដាវសាមូរ៉ៃកាប់ត្រូវជាច្រើនកន្លែង បណ្តាលឱ្យស្លាប់ និងក្មេងស្រីម្នាក់ទៀតឈ្មោះប៉ុន គឹមលាន អាយុ១៥ឆ្នាំ (ជាកូនជនរងគ្រោះ) ក៏បានរងរបួសធ្ងន់ដែរ ទាំង២នាក់មានទីលំនៅក្នុងភូមិកោះចំការ ឃុំបឹងសាលាខាងត្បូង ស្រុកកំពង់ត្រាច។
ហេតុការណ៍នេះ បង្កឱ្យភ្ញាក់ផ្អើលកាលពីវេលាម៉ោង០៧ និង២០នាទីព្រឹកថ្ងៃទី២៦ វិច្ឆិកា ២០១៥ ស្ថិតនៅចំណុចភូមិកោះចំការ ជិតព្រំដែនប្រទេសវៀតណាម ។
ប្រភពបានឱ្យដឹងថា មុនពេលកើតហេតុ ជនដៃដល់បានកាប់បុរសជាឪពុក ហើយកូនស្រីឃើញដូច្នោះ ក៏រត់មកជួយ ក៏ត្រូវជនសង្ស័យកាប់ត្រូវផងដែរ ។ ក្មេងស្រីរងគ្រោះខាងលើ ត្រូវបានគេបញ្ជូនទៅសង្គ្រោះនៅមន្ទីរពេទ្យហើយ ប៉ុន្តែសង្សឹមរស់តិចណាស់។
ប្រភពបន្តថា ក្រោយពេលកើតហេតុ កម្លាំងសមត្ថកិច្ចក៏បានឃាត់ខ្លួនជនសង្ស័យបានដែរ មានឈ្មោះតឹប ហៀង អាយុ៤៣ឆ្នាំ មានទីលំនៅក្នុងភូមិកើតហេតុខាងលើ ដោយជននោះបានសារភាពថា ដោយសារខ្លួនប្រចណ្ឌប្រពន្ធជាមួយបុរសចំណាស់នោះ (ជនរងគ្រោះ) និងដឹងទៀតថា បុរសចំណាស់នោះធ្លាប់មកដេកជាមួយប្រពន្ធខ្លួន២-៣ដងហើយ ទើបទ្រាំលែងបាន ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ