រាជធានីភ្នំពេញ ៖ លោកឃឹម ប៉ុណ្ណ ប្រធានចៅក្រមតុលាការកំពូល កាលពីថ្ងៃទី៤ មីនា ២០១៥ បានលើកយកបណ្តឹងសាទុក្ខរបស់លោក មាជ សុវណ្ណារ៉ា អាយុ៤៦ឆ្នាំ
រាជធានីភ្នំពេញ ៖ លោកឃឹម ប៉ុណ្ណ ប្រធានចៅក្រមតុលាការកំពូល កាលពីថ្ងៃទី៤ មីនា ២០១៥ បានលើកយកបណ្តឹងសាទុក្ខរបស់លោក មាជ សុវណ្ណារ៉ា អាយុ៤៦ឆ្នាំ មន្ត្រីជាន់ខ្ពស់គណបក្សសង្គ្រោះជាតិ ដែលត្រូវបានសាលាឧទ្ធរណ៍បដិសេធម្តងរួចមកហើយមិនអនុញ្ញាតឲ្យនៅក្រៅឃុំ។
បន្ទាប់ពីការសួរដេញដោលក្នុងសវនាការ ជំនុំជម្រះ តុលាការកំពូលបានថ្លែងថា ដោយសារតែមានសំណុំរឿងច្រើនត្រូវជម្រះក្នុងពេលតែមួយតុលាការកំពូលពន្យារពេលប្រកាសសាលដីកាក្នុងសំណុំរឿងនេះនៅវេលាម៉ោង៨ព្រឹក ថ្ងៃទី១១ មីនា ២០១៥។
ជនជាប់ចោទឈ្មោះ មាជ សុវណ្ណារ៉ា ភេទប្រុស អាយុ៤៦ឆ្នាំ ជនជាតិខ្មែរសញ្ជាតិអាមេរិក មុនពេលចាប់ខ្លួនជាប្រធាននាយកដ្ឋានប្រព័ន្ធផ្សព្វផ្សាយរបស់គណបក្សសង្គ្រោះជាតិ។ មានតែជនជាប់ឈ្មោះមាជ សុវណ្ណារ៉ា ម្នាក់គត់ក្នុងចំណោមជនជាប់១១នាក់បានប្តឹងសាទុក្ខប្រឆាំងនឹងការសម្រេចរបស់សាលាឧទ្ធរណ៍មិនព្រមអនុញ្ញាតឲ្យរូបលោកស្ថិតនៅក្រៅឃុំបណ្តោះអាសន្ន។
ជនជាប់ចោទឈ្មោះ មាជ សុវណ្ណារ៉ា ត្រូវបានតុលាការចោទប្រកាន់ពីបទដឹកនាំកុបកម្ម ចូលរួមអំពើកុបកម្មកាលពីថ្ងៃទី១៥ កក្កដា ២០១៤ នៅចំណុចស្ពាននាគ ទីលានប្រជាធិបតេយ្យ ស្ថិតក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ។
ជនជាប់ចោទត្រូវបានចាប់ខ្លួននៅថ្ងៃទី១១ វិច្ឆិកា២០១៤ និងត្រូវបានចោទប្រកាន់ ឃុំខ្លួនបណ្តោះអាសន្ននៅពន្ធនាគារព្រៃស៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ