ខេត្តបន្ទាយមានជ័យ ៖ ក្រុមជនអន្តោប្រវេសន៍ខុសច្បាប់ជាតិបង់ក្លាដែសសុទ្ធតែជាបុរសសរុបចំនួន១៤នាក់ ត្រូវបាននគរបាលអន្តោប្រវេសន៍ប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែតឃាត់ខ្លួននៅផ្ទះសំណាក់ «៩៩៩» ក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ។
ខេត្តបន្ទាយមានជ័យ ៖ ក្រុមជនអន្តោប្រវេសន៍ខុសច្បាប់ជាតិបង់ក្លាដែសសុទ្ធតែជាបុរសសរុបចំនួន១៤នាក់ ត្រូវបាននគរបាលអន្តោប្រវេសន៍ប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែតឃាត់ខ្លួននៅផ្ទះសំណាក់ «៩៩៩» ក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ។
ការឃាត់ខ្លួននេះធ្វើឡើងកាលពីវេលាម៉ោង៥រសៀលថ្ងៃទី២២ វិច្ឆិកា និងបញ្ជូនតាមរថយន្តក្រុងម៉ាកមីនីបឺស២៥កៅអី ពណ៌ខៀវមួយគ្រឿង ពាក់ស្លាកលេខសៀមរាប 3A-1169 ចង្កូតឆ្វេង ចេញពីក្រុងប៉ោយប៉ែតឆ្ពោះមកកាន់អគ្គនាយកដ្ឋានអន្តោប្រវេសន៍ក្រសួងមហាផ្ទៃ រាជធានីភ្នំពេញ នៅវេលាម៉ោង៨និង២០នាទីយប់ថ្ងៃដដែលដោយមានសមត្ថកិច្ចមកពីស្នងការនគរបាលខេត្តទទួលផ្នែកអន្តោប្រវេសន៍ និងនគរបាលទេសចរណ៍ក្រសួងអមដំណើរ ។ ជនឆ្លងដែនខុសច្បាប់ទាំងអស់ខាងលើមុនពេលបញ្ជូនចេញ ត្រូវបានសមត្ថកិច្ចប្រើខ្សែរឹតដៃ រួចបណ្ដើរឡើងរថយន្តម្ដងម្នាក់ៗ ។ ទោះជាយ៉ាងណា ជនអន្តោប្រវេសន៍ខុសច្បាប់ទាំងនេះ សមត្ថកិច្ចមិនបានប្រាប់ថាចូលមកកម្ពុជាតាមច្រកណានោះទេ ដោយគ្រាន់តែប្រាប់ថា ទុកឱ្យថ្នាក់លើធ្វើការ ។
គួរបញ្ជាក់ថា ខណៈពេលដែលសមត្ថកិច្ចឃាត់ខ្លួនជនអន្តោប្រវេសន៍ទាំង១៤នាក់ពីផ្ទះសំណាក់៩៩៩ ដំបូងគេឃើញសមត្ថកិច្ចនគរបាលប៉ុស្តិ៍រដ្ឋបាលសង្កាត់ប៉ោយប៉ែតបានព្យាយាមរារាំងមិនឱ្យរថយន្តដឹកជនទាំងនេះចេញពីកន្លែងកើតហេតុទេ ធ្វើឱ្យសមត្ថកិច្ចទាំង២ស្ថាប័នខាងលើហាក់មានការប្រកែកគ្នាមួយប្រាវ ព្រោះតែការរារាំងនេះ ហើយរង់ចាំបញ្ជាពីថ្នាក់លើរៀងៗខ្លួន ។ ពេលនោះគេសង្កេតឃើញថា រថយន្តដឹកជនអន្តោប្រវេសន៍ទាំង១៤នាក់ម្ដងទៅមុខម្ដងទៅក្រោយ ធ្វើឱ្យអ្នកស្រុកដែលចោមរោមមើលហេតុការណ៍យ៉ាងច្រើនកុះករមានចម្ងល់ លុះប្រហែលកន្លះម៉ោងក្រោយមកទើបរថយន្តនោះចេញដំណើរឆ្ពោះទៅប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត ដោយសារមានអន្តរាគមន៍ ឬមានបទបញ្ជាពីថ្នាក់លើ ។
គេចាំបានថា កន្លងមកតាមរយៈក្រសួងទេសចរណ៍ មន្ទីរទេសចរណ៍ សមត្ថកិច្ចជំនាញពាក់ព័ន្ធតាមបណ្ដាខេត្ត រួមទាំងក្រុងប៉ោយប៉ែតផងនោះ បានហៅម្ចាស់ផ្ទះសំណាក់និងសណ្ឋាគារអប់រំ និងណែនាំចំពោះអ្នកចូលទៅស្នាក់នៅត្រូវយកឯកសារពាក់ព័ន្ធជាសម្គាល់ដូចជាអត្តសញ្ញាណប័ណ្ណជាដើម ប៉ុន្តែនៅក្រុងប៉ោយប៉ែត គេសង្កេតឃើញផ្ទះសំណាក់មួយចំនួនមិនធ្វើតាមការណែនាំរបស់សមត្ថកិច្ចទេ ឱ្យតែអ្នកចូលស្នាក់នៅបង់ប្រាក់ជាការស្រេច ពិសេសពលករមកពីតាមបណ្ដាខេត្ត មុនឆ្លងទៅទឹកដីថៃ។ ជាក់ស្ដែងផ្ទះសំណាក់ខាងលើបណ្ដោយឱ្យជនអន្តោប្រវេសន៍ស្នាក់នៅអត់ច្បាប់ ៕
ចែករំលែកព័តមាននេះ