ខេត្តកំពង់ចាម ៖ កម្មករ-កម្មការិនីរោងចក្រស្បែកជើង ជីហួយ រាប់ពាន់នាក់ នៅឃុំខ្នុរដំបង ស្រុកជើងព្រៃ បានផ្ទុះការតវ៉ាទាមទារលក្ខខណ្ឌការងារចំនួន១៦ចំណុច ដោយដាក់ធុងបាសរាំយ៉ាងសប្បាយនៅមុខរោងចក្រ។ កម្មករប្រមូលផ្តុំគ្នាធ្វើកូដកម្ម កើតឡើងកាលពីថ្ងៃម្សិលមិញ និងព្រឹកថ្ងៃទី២ កញ្ញា នេះ ខណៈដំណោះស្រាយមិនទាន់មាននៅឡើយ។
តាមមន្ត្រីនគរបាលស្រុកជើងព្រៃ ប្រាប់ឲ្យដឹងថា កាលពីវេលាម៉ោង៧ព្រឹកថ្ងៃទី១ កញ្ញា ក្រុមកម្មករ កម្មការិនីរាប់ពាន់នាក់ បានមកជួបជុំគ្នាធ្វើកូដកម្មនៅមុខរោងចក្រ ដើម្បីទាមទារលក្ខខណ្ឌការងារ រហូតដល់ទៅ១៦ចំណុចពីថៅកែរោងចក្រ ដោយបានដាក់ធុងបាសរាំលេងយ៉ាងសប្បាយ និងមានតំណាងបានទៅចូលរួមប្រជុំដោះស្រាយនៅសាលាស្រុកជើងព្រៃផងដែរ ។ មន្ត្រីនគរបាលបានប្រាប់បន្តថា រហូតដល់វេលាម៉ោង១១ព្រឹក ក្រុមកម្មករបានបែកត្រឡប់ទៅផ្ទះវិញអស់ តែលទ្ធផលវិញមិនទទួលបានផ្លែផ្កានោះ ទើបនៅព្រឹកថ្ងៃទី២ កញ្ញានេះ ក្រុមកម្មកស្បែកជើងជូហួយបានមកជួបជុំគ្នាម្តងទៀតនៅកន្លែងដដែល រហូតមកដល់ម៉ោង១១ព្រឹក កម្មករកម្មការិនីបាននាំគ្នាត្រឡប់ទៅផ្ទះវិញជាបណ្តើរៗហើយ គឺនៅសល់ប្រហែលជា១០ភាគរយប៉ុណ្ណោះ ។
សូមបញ្ជាក់ថា ក្នុងរយៈពេល២ថ្ងៃនេះក្រុមកម្មករខាងលើ មិនបានធ្វើការបិទផ្លូវជាតិលេខ៦ បណ្តាលឲ្យកកស្ទះចរាចរនោះទេ តែបើសិនជាបិទនោះ សមត្ថកិច្ចនឹងចាត់វិធានការទៅតាមច្បាប់ ៕
ចែករំលែកព័តមាននេះ