ខេត្តឧត្តរមានជ័យ ៖ កាលពីព្រឹកថ្ងៃទី២១ សីហា ២០១៤ នៅក្នុងបរិវេណសាលាស្រុកអន្លង់វែង មានរៀបចំកិច្ចប្រជុំពិភាក្សាថ្នាក់ខេត្តនិងថ្នាក់ស្រុក ដោយលើកយកគោលការណ៍ដោះស្រាយដីធ្លីជូនប្រជាពលរដ្ឋ១៣៥គ្រួសារ ដែលរស់នៅចំណុចអូរអំបិល(ព្រៃស្អាក) ក្នុងឃុំអន្លង់វែង ស្រុកអន្លង់វែង។
កិច្ចប្រជុំធ្វើឡើងក្រោមអធិបតីភាពលោក ស ថាវី អភិបាលខេត្ត និងមានការចួលរួមពីលោកយឹម ធិន ប្រធានក្រុមប្រឹក្សាខេត្ត លោកវ៉ាត ប៉ារ៉ា នីន អភិបាលរងខេត្តឧត្តរមានជ័យ លោកយឹម ផាន់ណា អភិបាលស្រុកអន្លង់វែង ព្រមទាំងមន្ត្រីរាជការគ្រប់ស្ថាប័នជាច្រើនទៀត ។
ក្នុងឱកាសនោះ ប្រជាពលរដ្ឋជាច្រើនគ្រួសារដែលរស់នៅក្នុងចំណុចអូរអំបិលបានរៀបរាប់ថា ពួកគាត់មកពីតាមបណ្តាខេត្តក្រុងដែលចូលមករស់នៅចំណុចតំបន់ហាមឃាត់នេះជាយូរឆ្នាំមកហើយ ដោយសារតែចាញ់បោកមន្ត្រីបរិស្ថានដែនជម្រកសត្វព្រៃគូលែនព្រហ្មទេព ហើយនាំគ្នាលក់ដីលំនៅឋានដីស្រែចំការ នៅឯស្រុកកំណើតមកទិញដីនៅចំណុចអូរអំបិលនេះក្នុងមួយប្លង់៣០X៥០X១០០ក្នុងតម្លៃ១០០០ ទៅ១៥០០ដុល្លាអាមេរិក ដោយមន្ត្រីរូបនោះអះអាងថាគ្មានបញ្ហាទេ។ បន្ទាប់មកក្នុងអំឡុងឆ្នាំ២០១០ ស្រាប់តែមានដីកាអមសាលាដំបូងខេត្តសៀមរាប និងអាជ្ញាធខេត្តស្រុក ព្រមទាំងកងកម្លាំងប្រដាប់អាវុធ ប៉ូលិស ប៉េអឹម ទាហានចុះមកធ្វើការបង្ក្រាបដុតផ្ទះ និងចាប់ខ្លួនមួយចំនួនយកទៅដាក់ពន្ធធានាគាខេត្តសៀមរាប ទោះជាបែបណាប្រជាពលរដ្ឋដែលទទួលរងគ្រោះពីសំណាក់មន្ត្រីបរិស្ថានដែនជម្រកសព្វព្រៃគូលែនព្រហ្មទេពនោះ គឺប្រជាពលរដ្ឋអស់ជម្រើសនាំគ្នាក្រាញននៀលស៊ូស្លាប់នៅលើតំបន់នេះ។
លោកស ថាវី អភិបាលខេត្តឧត្តរមានជ័យ មានប្រសាសន៍ថា យោងតាមអនុសាសន៍របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានជម្រុញដល់អាជ្ញាធរតាមបណ្តាខេត្តក្រុងយកចិត្តទុក្ខដាក់ធ្វើការដោះស្រាយផ្ទៃដីទំនាស់ប្រជាពលរដ្ឋនិងក្រុមហ៊ុន ត្រូវដោះស្រាយជូនប្រជាពលរដ្ឋវិញ ចំណែកផ្ទៃដីទំនាស់ផ្សេងៗទៀតត្រូវតែដោះស្រាយបញ្ចប់ ៕
ចែករំលែកព័តមាននេះ