ខេត្តកំពង់ចាម ៖ ទឹកចិត្ត និងក្តីស្រឡាញ់របស់អ្នកស្រុកឈូក ខេត្តកំពត ជាង១០០នាក់ ដែលលើកគ្នាមកតវ៉ាដល់មុខសាលាដំបូងខេត្ត កំពង់ចាម រហូតធ្វើឱ្យលោកលោក ងួន វុទ្ធី ចៅក្រមស៊ើបសួរ នៃសាលាដំបូងខេត្ត យល់ព្រមដោះលែងជនសង្ស័យទាំង៣នាក់ពីពន្ធនាគារខេត្ត កាលពីល្ងាចថ្ងៃទី៣០ កក្កដា ដែលពួកគេជាប់ចោទពីបទឆបោកប្រាក់បញ្ចាំរថយន្តកូរ៉េចំណុះ៥តោន១គ្រឿង តម្លៃ១ម៉ឺនដុល្លារ ។
នៅគ្រាដែលចៅក្រមព្រមដោះលែងនោះ ធ្វើឱ្យពួកគាត់សប្បាយរំភើបក្នុងចិត្តជាខ្លាំង ដោយម្នាក់ៗស្រក់ទឹកភ្នែកទាំងមិនដឹងខ្លួន ប្រដេញជាមួយតំណក់ទឹកភ្លៀងដែលធ្លាក់ពីលើមេឃ ។ លោក អួក ពៅ អាយុ៣២ឆ្នាំ នៅភូមិត្រមូល ឃុំត្រមែង ស្រុកឈូក ខេត្តកំពត ជាម្ចាស់រថយន្តពិតប្រាកដ និងប្រពន្ធឈ្មោះ ពុំ ចិន្តា អាយុ៣៣ឆ្នាំ ព្រមទាំងអ្នកបើកបររថយន្ត គាត់ សូមថ្លែងអំណរគុណជាខ្លាំង ចំពោះអ្នកស្រុករបស់គាត់ជាង១០០នាក់ ដែលនាំគ្នាមកតវ៉ានៅមុខសាលាដំបូងខេត្តកំពង់ចាម ដើម្បីបង្ហាញពីភាពស្អាតស្អំថាពួកគាត់ទាំង៣នាក់ជាមនុស្សត្រឹមត្រូវ មិនបានទៅប្រព្រឹត្តទង្វើល្មើសច្បាប់នោះទេ ។
ម្ចាស់រថយន្ត លោក អួក ពៅ បន្តរៀបរាប់ថា ក្រោយពីសាលាដំបូងខេត្តដោះលែងពួកគាត់ឱ្យមានសេរីភាពឡើងវិញនោះ នាព្រឹកថ្ងៃទី៣១ កក្កដា រួមនឹងប្រជាជនច្រើនកុះករបានធ្វើដំណើរតាមរថយន្តជាមួយគាត់ទាំង២នាក់ប្តីប្រពន្ធ មកដាក់ពាក្យប្តឹងនៅការិយាល័យព្រហ្មទណ្ឌកម្រិតស្រាលខេត្ត ដើម្បីឱ្យសមត្ថកិច្ចស្រាវជ្រាវតាមចាប់ជនឈ្មោះ សន សារ៉ា ដែលជាអ្នកឆបោកយករថយន្តរបស់គាត់ទៅបញ្ចាំ នៅកុងស៊ីរបស់ឈ្មោះ ហ៊ាង វ៉ាន់លីជង់ ភេទស្រី អាយុ៣៧ឆ្នាំ រស់នៅភូមិស្ពឺកើត ឃុំស្ពឺ ស្រុកចំការលើ កាលពីយប់ថ្ងៃទី២៣ កក្កដា ក្នុងតម្លៃ១ម៉ឺនដុល្លារ ដែលរឿងនេះ បែរជាធ្វើឱ្យគាត់ជាម្ចាស់រថយន្តពិតប្រាកដ ត្រូវសមត្ថកិច្ចចាប់ទាំងពីរនាក់ប្តីប្រពន្ធ និងអ្នកបើកបររថយន្តម្នាក់ទៀត បញ្ជូនទៅដាក់ពន្ធនាគារខេត្តទៅវិញ ពិតជារឿងអយុត្តិធម៌ណាស់ ។ ជាមួយនេះ គាត់សូមយករថយន្តត្រឡប់ទៅវិញ ដើម្បីប្រកបរបរស៊ីឈ្នួលដឹកទំនិញឱ្យគេ នឹងអាលយកលុយទៅសងធនាគារ ព្រោះខ្ចីមកទិញរថយន្តនេះ ដើម្បីប្រកបរបរចិញ្ចឹមជីវិត ។
ទោះជាបែបណា សមត្ថកិច្ចប្រាប់ថា រង់ចាំពីរទៅបីថ្ងៃទៀត ។ ម្ចាស់រថយន្តរូបនេះបានរំឭកថា ឈ្មោះ សន សារ៉ា ភេទប្រុស អាយុ៣៣ឆ្នាំ ជាមនុស្សស្គាល់គ្នាជាមួយគាត់ តាមរយៈការរកស៊ីទិញលក់កសិផល ។ នៅថ្ងៃទី២១ កក្កដា ២០១៤ ជននេះបានទូរស័ព្ទមកសុំជួលរថយន្តរបស់គាត់ ដោយព្រមព្រៀងឱ្យគាត់ក្នុង១ខែចំនួន១.៦០០ដុល្លារ និងសុំទៅមើលរថយន្តដល់ស្រុកឈូក ខេត្តកំពត ទៀតផង ។ ក្នុងពេលទៅពិនិត្យមើលនោះ ជននោះបាននិយាយថា រថយន្តនេះ អាចដឹកទំនិញបាន ដូចជាទៅកាន់ខេត្តព្រះសីហនុ និងទៅប្រទេសវៀតណាម ហើយបានសុំយកឆៀករថយន្ត និងកាតគ្រីចម្លងឱ្យរូបគេ ដើម្បីទុកយកទៅធ្វើច្បាប់ដឹកជញ្ជូនចូលរាជធានីភ្នំពេញ ។
នៅថ្ងៃទី២១ កក្កដា នោះ គាត់ក៏ដឹកគោចេញពីខេត្តពោធិ៍សាត់ មកកាន់ខេត្តកំពង់ស្ពឺ ហើយនៅថ្ងៃទី២៣ កក្កដា លោកក៏ទូរស័ព្ទកំណត់កន្លែងណាត់ជួបឈ្មោះ សន សារ៉ា នៅត្រង់ទំនប់កប់ស្រូវ រាជធានីភ្នំពេញ ដើម្បីទៅដឹកគ្រាប់ស្វាយចន្ទី ដោយបាននាំគ្នាជិះរថយន្តទៅដល់ត្រង់ថ្នល់កែង ស្រុកបាធាយ ហើយឈ្មោះ សន សារ៉ា ក៏ចុះទៅជិះរថយន្តតូចមួយផ្សេងទៀត ជាមួយឈ្មោះ «ស្វិត» ។ នៅពេលបើកមកដល់ស្រុកចំការលើ គាត់ក៏ឈប់ចូលហូបបាយទាំងអស់គ្នានៅហាងលក់បាយមួយកន្លែង ដោយកុម្ម៉ង់ពោះគោទឹកប្រហុក ។ បន្ទាប់មកឈ្មោះ សន សារ៉ា ក៏សុំខ្ចីរថយន្តរបស់គាត់បើកចេញទៅក្រៅ ដោយប្រាប់ថា ទៅដឹកគ្រាប់ស្វាយចន្ទី នៅភូមិស្ពឺកើត ឃុំស្ពឺ ស្រុកចំការលើ រួចក៏ចេញទៅបាត់ទៅ ហើយគាត់ក៏ចេះតែនៅចាំបាត់ៗ ។ លុះជាង១ម៉ោងក្រោយមក គាត់ក៏ទូរស័ព្ទទៅសួរនាំ តែឈ្មោះ សន សារ៉ា ថា កំពុងជាប់ដឹកកម្មករ លុះទូរស័ព្ទទៅសួរម្តងទៀត ឈ្មោះ សន សារ៉ា ក៏ឆ្លើយថា កំពុងជាប់រវល់បត់តង់កៅស៊ូ ។
ចុងក្រោយ គាត់ក៏ទូរស័ព្ទទៅទៀត ក៏ចូល តែឈ្មោះ សន សារ៉ា លើកហើយ អត់ឮសូរនិយាយអ្វីទេ ។ ដោយមានការសង្ស័យ ក៏នាំគ្នាទាំងបីនាក់ដើរតាមផ្លូវចម្ងាយប្រហែល២គីឡូម៉ែត្រចេញពីហាងបាយនោះ ស្រាប់តែប្រទះឃើញរថយន្តរបស់គាត់ដែលថាឈ្មោះ សន សារ៉ា ខ្ចីនោះ នៅចតអែបនឹងចិញ្ចើមថ្នល់ ក៏នាំគ្នាឡើងទៅមើលលើរថយន្ត តែមិនឃើញមានគ្រាប់ស្វាយចន្ទីទ្បើយ ព្រោះឈ្មោះ សន សារ៉ា ថាខ្ចីមកដឹកគ្រាប់ស្វាយចន្ទី ។ ដោយបាត់ សន សារ៉ា មិនដឹងទៅណា ហើយព្រួយបារម្ភខ្លាចចោរលួចយកទ្រព្យរបស់នៅលើរថយន្តផង ក៏នាំគ្នាទាំងបីនាក់ឡើងដេកនៅលើរថយន្តនោះទៅ ព្រោះយប់ទៅហើយ ។ ស្រាប់តែព្រឹកឡើង នាថ្ងៃទី២៤ កក្កដា មានគេដើរមកសួរនាំពួកគាត់ ហើយគាត់ក៏ប្រាប់វិញថា នេះជារថយន្តរបស់គាត់ ! តែអ្នកនោះតបវិញថា «រថយន្តនេះមានគេដាក់បញ្ជាំរួចរាល់ហើយ!» ។
គ្រានោះ ក៏កើតមានការប្រកែកគ្នាទៅវិញទៅមក និងលេចមុខស្ត្រីឈ្មោះ លីជង់ ជាម្ចាស់កន្លែងបញ្ចាំនោះ ដើរចេញមក ឃើញដូចនោះប្រពន្ធរបស់គាត់ក៏យកកាតគ្រី មកបង្ហាញឱ្យមើល ដើម្បីចង់បញ្ជាក់ថាពួកគាត់ពិតជាម្ចាស់រថយន្តពិតមែន តែបែរជាស្ត្រីឈ្មោះ លីជង់ នោះ កញ្ឆក់កាតគ្រីពីដៃប្រពន្ធគាត់ យកចូលទៅក្នុងផ្ទះបាត់ ហើយរហូតដល់ជាង១ម៉ោងក្រោយមក ទើបយកមកឱ្យវិញ តែជាកាតគ្រីក្លែងក្លាយថ្មីមួយទៀត ឯកាតគ្រីចាស់របស់គាត់ពិតដែលកញ្ឆក់យកទៅនោះ មិនដឹងនៅឯណា ហើយម្ចាស់កន្លែងបញ្ចាំឈ្មោះ លីជង់ នោះ ថែមទាំងប្តឹងសមត្ថកិច្ចឱ្យចាប់ពួកគាត់ទាំង៣នាក់ថែមទៀតតែម្តង ដោយចោទថាមកអុកឡុកកន្លែងរបស់គេ ។
មន្ត្រីសាលាដំបូងខេត្តម្នាក់ បានខ្សឹបប្រាប់ថា តាមផ្លូវច្បាប់ កន្លែងកុងស៊ីទទួលបញ្ជាំរបស់ទ្រព្យណាក៏ដោយ អាចមានសិទ្ធិទទួលបញ្ចាំចាប់ពីម៉ោង៦ព្រឹកដល់ម៉ោង៦ល្ងាច លើសពីម៉ោងនេះទៅ ត្រូវចាត់ទុកថា «ទទួលផលចោរកម្ម» ។ លោកវរសេនីយ៍ត្រី អុិត តារា អធិការនគរបាលស្រុកចំការលើ និយាយថា រូបលោកមិនបានដឹងថាផ្ទះរបស់ស្ត្រីឈ្មោះ លីជង់ ជាកុងស៊ីបញ្ចាំរបស់របរ ឬយ៉ាងណាទេពីមុនមក ទាល់តែមានរឿងខាងលើផ្ទុះឡើងអញ្ចឹងទៅ ទើបដឹង ។
សូមបញ្ជាក់ថា ផ្ទះស្ត្រីទទួលបញ្ចាំនេះ មិនមែនទើបតែកើតរឿងលើករណីរថយន្ត១គ្រឿងនេះទេ តែធ្លាប់មានរឿងមួយទៀតពីមុនមក គឺទាក់ទិននឹងករណីរថយន្តប្រភេទយីឌុបមួយគ្រឿង ត្រូវគេលួចយកទៅបញ្ចាំទីនោះដែរ តែម្ចាស់ពិតប្រាកដនៅខេត្តពោធិ៍សាត់ បានមកដាក់ពាក្យប្តឹងនៅអធិការដ្ឋាននគរបាលស្រុកចំការលើ ឱ្យជួយអន្តរាគមន៍ ៕
ចែករំលែកព័តមាននេះ