ខេត្តកំពង់ចាម ៖ ដោយទឹកចិត្តក្តីស្រលាញ់របស់អ្នកស្រុកឈូក ខេត្តកំពត មានចំនួនជាង១០០នាក់ បានលើកគ្នាមកតវ៉ាដល់មុខសាលាដំបូងខេត្ត រហូតដល់លោកងួន វុទ្ធី ចៅក្រមស៊ើបសួរ បានទន់ចិត្តយល់ព្រមដោះលែងជនសង្ស័យចំនួន៣នាក់ពីពន្ធនាគារខេត្ត កាលពីល្ងាចថ្ងៃទី៣០ កក្កដា ២០១៤ ក្រោមដំណក់ទឹកភ្លៀង ដែលជាប់ចោទពីបទឆបោកប្រាក់បញ្ចាំរថយន្តកូរ៉េចំណុះ៥តោន ១គ្រឿង តម្លៃ១ម៉ឺនដុល្លារ ។
ការដោះលែងនោះ ធ្វើឱ្យពួកគាត់មានការសប្បាយរំភើបក្នុងចិត្តជាខ្លាំង ដោយម្នាក់ៗស្រក់ទឹកភ្នែកទាំងមិនដឹងខ្លួនផងដែរ ។ លោក អួក ពៅ អាយុ៣២ឆ្នាំ នៅភូមិត្រមូល ឃុំត្រមែង ស្រុកឈូក ខេត្តកំពត ជាម្ចាស់រថយន្តពិតប្រាកដបានឱ្យដឹងថា រូបគាត់និងប្រពន្ធឈ្មោះពុំ ចិន្តា អាយុ៣៣ ឆ្នាំ ព្រមទាំងតៃកុងរថយន្ត សូមថ្លែងនូវអំណរគុណជាខ្លាំងចំពោះអ្នកស្រុករបស់គាត់ជាង១០០នាក់ ដែលបាននាំមកមកតវ៉ានៅមុខសាលាដំបូងខេត្តកំពង់ចាម ដើម្បីបង្ហាញពីភាពស្អាតស្អំថា ពួកគាត់ទាំង៣នាក់ ជាមនុស្សត្រឹមត្រូវមិនបានទៅប្រព្រឹត្តនូវទង្វើល្មើសច្បាប់ណាមួយនោះទេ ។
គាត់បានប្រាប់បន្តថា ក្រោយពីសាលាដំបូងខេត្តបានដោះលែងពួកគាត់ឱ្យមានសេរីភាពឡើងវិញ កាលពីព្រឹកថ្ងៃទី៣១ កក្កដា ២០១៤ នេះ រួមទាំងប្រជាពលរដ្ឋជាច្រើនកុះករធ្វើដំណើរតាមរថយន្តជាមួយគាត់ទាំង២នាក់ប្តីប្រពន្ធ មកដាក់ពាក្យបណ្តឹងនៅ ការិយាល័យព្រហ្មទណ្ឌកម្រិតស្រាលខេត្ត ដើម្បីឱ្យសមត្ថកិច្ចធ្វើការស្រាវជ្រាវតាមចាប់ជនសង្ស័យឈ្មោះសន សារ៉ា ដែលជាអ្នកឆបោកយករថយន្តរបស់គាត់ទៅបញ្ចាំនៅកុងស៊ីមួយកន្លែង ដែលមានឈ្មោះហ៊ាង វ៉ាន់លីជង់ ភេទស្រី អាយុ៣៧ ឆ្នាំនៅភូមិស្ពឺកើត ឃុំស្ពឺ ស្រុកចំការលើ កាលពីយប់ថ្ងៃទី២៣ កក្កដា កន្លងទៅចំនួន១ម៉ឺនដុល្លារ ។
បែរជាធ្វើឱ្យគាត់ជាម្ចាស់រថយន្តពិតប្រាកដ ត្រូវរងកម្មទឹកភ្នែកសមត្ថកិច្ចមកចាប់គាត់ទាំង២នាក់ប្តី-ប្រពន្ធ និងតៃកុងរថយន្តម្នាក់ បញ្ជូនទៅដាក់ពន្ធនាគារខេត្តទៅវិញ ពិតជាអយុត្តិធម៌ណាស់ ។ ជាមួយគ្នានោះ គាត់សុំយករថយន្តត្រឡប់ទៅវិញប្រកបរបរស៊ី
ឈ្មួលដឹកទំនិញឱ្យគេ ដើម្បីយកលុយទៅសងធនាគារដែលខ្ចីមកទិញរថយន្តក្នុងការប្រកបរបរចិញ្ចឹមជីវិតនោះ ត្រូវបានសមត្ថកិច្ចប្រាប់ថា ២ទៅ ៣ថ្ងៃទៀត ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ