រាជធានីភ្នំពេញ ៖ ក្រុមហ៊ុន ជីប ម៉ុង សូមជូនដំណឹងដល់អតិថិជនឲ្យបានជ្រាប់ថា ខ្មែរ ប៊ែវើរីជីស ជាក្រុមហ៊ុនក្នុងស្រុកផលិតស្រាបៀរ និងភេសជ្ជៈដ៏ធំនៅកម្ពុជា បានបន្តពង្រីកខ្លួនកាន់តែធំ និងចាក់ឫសកាន់តែជ្រៅទៅក្នុងវិស័យផលិតស្រាបៀរជាមួយនឹងការបន្តនាំយកផលិតផលថ្មីៗ និងច្នៃប្រឌិតចូលមកកាន់ទីផ្សារ ដែលថ្មីៗនេះនៅថ្ងៃទី ២៤ ខែមិថុនា ឆ្នាំ ២០២២ ខ្មែរ ប៊ែវើរីជីស បានចុះអនុស្សារណៈនៃការយោគយល់គ្នា (MOU) ក្នុងការនាំយក Craft Beer ដំបូងដែលនឹងមានលក់ផ្តាច់មុខនៅក្នុងភោជនីយដ្ឋាន Mastercraft Microbrewery ក្នុងមណ្ឌលផ្សារទំនើប ជីប ម៉ុង ២៧១ មេហ្គាម៉ល ។
លោកបណ្ឌិត Zvonimir Nemet នាយករោងចក្រក្រុមហ៊ុន ខ្មែរ ប៊ែវើរីជីស ឲ្យដឹងថា ផលិតផលថ្មី Craft Beer របស់ក្រុមហ៊ុនគឺមានឈ្មោះថា Cambodia Mastercraft ដែលនឹងមានរសជាតិផ្សេងគ្នាជាច្រើនផលិតឡើង ដើម្បីបំពេញតម្រូវការអតិថិជនស្របពេលដែលសន្ទុះនៃការនិយមចូលចិត្តពិសាស្រាបៀរស្រស់បែបនេះនៅក្នុងប្រទេសកម្ពុជាកំពុងមានការកើនឡើងគួរឲ្យកត់សម្គាល់ ។
លោកឲ្យដឹងទៀតថា ក្រុមហ៊ុន ខ្មែរ ប៊ែវើរីជីស នឹងនាំយកស្រាបៀរ Cambodia Mastercraft ផ្តាច់មុខសម្រាប់ភោជយនីដ្ឋាន Mastercraft Microbrewery ដែលជាកន្លែងល្អបំផុតដើម្បីសម្រាកញ៉ាំអាហារ និងស្រាបៀរស្រស់ ក៏ដូចជាចែករំលែកការសើចសប្បាយ និងបង្កើតពេលវេលាល្អៗសម្រាប់អតិថិជន ។ លោកបណ្ឌិត Zvonimir Nemet ឲ្យដឹងថា ភោជនីយដ្ឋាន Mastercraft Microbrewery ក្នុងមណ្ឌលផ្សារទំនើប ជីប ម៉ុង ២៧១ មេហ្គាម៉ល គឺជាកន្លែងដែលសក្តិសមបំផុតក្នុងការបើកលក់ស្រាបៀរ Craft Beer ដំបូងរបស់ក្រុមហ៊ុនព្រោះមណ្ឌលផ្សារទំនើបមួយនេះស្ថិតចំកណ្តាលទីក្រុងដែលមានអ្នករស់នៅច្រើនកុះករ គួបផ្សំនឹងការកម្សាន្តដ៏សម្បូរបែបមាននៅទីនោះផងដែរ ។
លោកបញ្ជាក់ទៀតថា ខ្មែរ ប៊ែវើរីជីស នឹងខិតខំប្រឹងប្រែងឱ្យអស់ពីសមត្ថភាព ដើម្បីផ្តល់ជូនផលិត ផលដែលស្របតាមតម្រូវការរបស់អតិថិជនឱ្យបានពេញលេញ ក៏ដូចជាពង្រីកខ្លួនកាន់តែធំនៅក្នុងវិស័យផលិតស្រាបៀរផងដែរ ។ ជាមួយនឹងរោងចក្រស្តង់ដារអន្តរជាតិដ៏ធំស្គឹមស្គៃលាតសន្ធឹងលើផ្ទៃដីយ៉ាងធំក្នុងខណ្ឌដង្កោ ក្រុមហ៊ុនក្នុងស្រុកដ៏ធំមួយនេះ មានម៉ាកផលិតផលល្បីៗដូចជា ស្រាបៀរ កម្ពុជា ភេសជ្ជៈប៉ូវកម្លាំង វើក ទឹកក្រូចអាយស៍ និងទឹកបរិសុទ្ធ កម្ពុជា ដែលសុទ្ធតែជាផលិតផលទទួលបានការគាំទ្រខ្លាំងពេញទីផ្សារ ។
ចំពោះវិស័យស្រាបៀរវិញ ក្រុមហ៊ុនដែលឈានមុខគេក្នុងការច្នៃប្រឌិត និងរិះរកផលិតផលថ្មីៗមួយនេះ បានបន្តពង្រីកផលិតផលជាហូរហែទាំងប្រភេទកំប៉ុង និងដបដើម្បីបំពេញតម្រូវការអតិថិជន ។ ខ្មែរ ប៊ែវើរីជីស បានផលិតស្រាបៀរ កម្ពុជាដំបូងនៅឆ្នាំ ២០១១ រួចដល់ឆ្នាំ ២០១៩ ក្រុមហ៊ុនក៏បានប្តូរសំបកកំប៉ុងវេចខ្ចប់ថ្មីយ៉ាងទាក់ទាញផ្តល់នូវអារម្មណ៍ប្លែកដល់អតិថិជន ។ មិនត្រឹមតែប៉ុណ្ណោះ នៅខែមិថុនា ឆ្នាំ ២០២១ ក្រុមហ៊ុនក៏បានប្តូររូបរាងដបថ្មីនៃស្រាបៀរ កម្ពុជាយ៉ាងល្អប្រណិតបំផុតដោយទទួលបានការសរសើរជាខ្លាំងពីអតិថិជនទោះស្ថិតក្នុងសម័យកូវីដ ១៩ ក៏ដោយ ។
នៅដើមឆ្នាំ ២០២២ នេះ ក្រុមហ៊ុនបានផលិតស្រាបៀរ កម្ពុជា ព្រីមៀម ដ្រាហ្វច្រកដបដំបូងបំផុតដោយប្រើបច្ចេកវិទ្យាមិនធ្លាប់មាននៅកម្ពុជាហៅថា Flash Pasteurization ហើយទទួលបានការពេញចិត្តពីអតិថិជនជាខ្លាំងជាមួយនឹងរសជាតិស្រស់បំផុត និងលក្ខណៈពិសេសជាច្រើនដែលមិនធ្លាប់មានពីមុនមក ៕ ដោយសហការ
ចែករំលែកព័តមាននេះ