រាជធានីភ្នំពេញ ៖ ពិធីការិនីលេចធ្លោប្រចាំទូរទស្សន៍អប្សរាកញ្ញាដួង ម៉ាណា មានដងខ្លួនខ្ពស់ស្រឡះ ដៃជើងល្វតល្វន់ និងមានសម្រស់គួរឱ្យគយគន់ ។ ដោយសារតែមានរូបសម្បត្ដិបែបនេះហើយ ទើបមានគេទាក់ទងនាងឱ្យបន្ថែមអាជីពបង្ហាញម៉ូដមួយទៀត ប៉ុន្ដែម៉ាណាមិនចង់ឡើយ ព្រោះនាងយល់ថា ខុសជំនាញខ្លាចពេលដើរលើវេទិកាមិនសម មិនទំនងអាចបាក់មុខនាំឱ្យខូចកម្មវិធីគេ ។
រាជធានីភ្នំពេញ ៖ ពិធីការិនីលេចធ្លោប្រចាំទូរទស្សន៍អប្សរាកញ្ញាដួង ម៉ាណា មានដងខ្លួនខ្ពស់ស្រឡះ ដៃជើងល្វតល្វន់ និងមានសម្រស់គួរឱ្យគយគន់ ។ ដោយសារតែមានរូបសម្បត្ដិបែបនេះហើយ ទើបមានគេទាក់ទងនាងឱ្យបន្ថែមអាជីពបង្ហាញម៉ូដមួយទៀត ប៉ុន្ដែម៉ាណាមិនចង់ឡើយ ព្រោះនាងយល់ថា ខុសជំនាញខ្លាចពេលដើរលើវេទិកាមិនសម មិនទំនងអាចបាក់មុខនាំឱ្យខូចកម្មវិធីគេ ។
សម្រស់ និងរូបរាងរបស់កញ្ញាដួង ម៉ាណា ពិធីការិនីក្នុងកម្មវិធី«ប្រស្នាតារា» និងកម្មវិធី «មេផ្ទះលេខ១» របស់ស្ថានីយទូរទស្សន៍អប្សរា កំពុងតែទាក់ទាញចិត្ដគ្រូបង្ហាត់បង្ហាញម៉ូដ ។ នៅពេលម៉ាណា បង្ហាញមុខនៅក្នុងកម្មវិធីជាពិធីការិនីដែលពេលចេញដំបូងត្រូវដើរអែនអនបែបបង្ហាញម៉ូដ បញ្ចេញស្នាមញញឹមស្រស់នោះ ធ្វើឱ្យគ្រូបង្ហាត់ផ្នែកបង្ហាញម៉ូដពេញចិត្ដនាង ។ ម៉្លោះហើយទើបបានជាអ្នកដែលមានជំនាញផ្នែកសិល្បៈបង្ហាញម៉ូដចង់ទាក់ទងម៉ាណាឱ្យចាប់អាជីពបង្ហាញម៉ូដទៀត បន្ថែមទៅលើអាជីពចាស់ ព្រោះតាំងពីនាងប្រឡូកអាជីពសិល្បៈមក កម្របញ្ចេញស្នាដៃណាឱ្យប្លែកក្រៅពីពិធីការិនីណាស់ ខណៈដែលតារាស្រីមួយចំនួនប្រឹងពង្រីកជំនាញសិល្បៈ។
អ្នកស្រីសាពណ៌ជាគ្រូបង្ហាត់ផ្នែកបង្ហាញម៉ូដល្បីឈ្មោះ និងជាពិធីការិនី ព្រមទាំងជាតារាភាពយន្ដដែរនោះ បានបង្ហាញចំណាប់អារម្មណ៍ទៅលើម៉ាណា ក្នុងពេលដែលអ្នកស្រីចូលរួមធ្វើជាគណៈកម្មការដាក់ពិន្ទុឱ្យបេក្ខនារីក្នុងកម្មវិធី«មេផ្ទះលេខ១» ដែលមានលោកហ្វៃ សំអាង គ្រប់គ្រង ។
អ្នកស្រីសាពណ៌ថ្លែងថា ម៉ាណា មានដងខ្លួនល្អសមជាតារាបង្ហាញម៉ូដ ព្រោះកម្ពស់ដល់ទៅ១,៧០ម៉ែត្រ ដៃជើង វែងៗ បើសិនជានាងបញ្ចូលខ្លួនជាតារាបង្ហាញម៉ូដទៀតពិតជាសក្ដិសម ស្របពេលដែលនាងមានផ្ទៃមុខមើលទៅសមនឹងដងខ្លួន ។ ទោះជាម៉ាណាមិនចង់ធ្វើជាតារាបង្ហាញម៉ូដ ព្រោះតែមិនជឿជាក់លើខ្លួនឯង តែអ្នកស្រីអាចបង្ហាត់បង្ហាញ និងចង្អុលទិសពីល្បិចដើរបង្ហាញម៉ូដលើវេទិកាឱ្យក្លាយជាតារាបង្ហាញម៉ូដលេចធ្លោម្នាក់បាន ដើម្បីឱ្យតារាខ្មែរយើងកាន់តែរីកដុះដាលលើវិស័យបង្ហាញម៉ូដ ។ កញ្ញាដួង ម៉ាណា ដែលគ្រងឈុតសម្លៀកបំពាក់រ៉ូបពណ៌ស្វាយស្រស់សោភានិយាយកាលពីពេល ថ្មីៗនេះថា នាងក៏ចូលចិត្ដអាជីពបង្ហាញម៉ូដដែរ ព្រោះជាតារាស្ថិតក្នុងពិភពសិល្បៈ បើបានបង្ហាញស្នាដៃច្រើនជារឿងល្អ ប៉ុន្ដែអាជីពមួយនេះនាងពិបាកធ្វើបាន ។ នាងគិតថា ដើរបង្ហាញម៉ូដត្រូវធ្វើទឹកមុខ ប្លែកៗ ដើរកាច់រាងតាមចង្វាក់ភ្លេង មានលឿន មានយឺតនៅលើវេទិកាដែលនាងគិតថា ទៅមិនរួចទេ ។ អ្វីដែលសំខាន់ គឺនាងខ្លាចដើរដួលនៅលើឆាកច្បាស់ជាខ្មាសគេ ព្រោះអ្នកបង្ហាញម៉ូដត្រូវពាក់ស្បែកជើងកែង ខ្ពស់ៗ ហើយប្រឹងទប់ខ្លួនណាស់ និងមានពេលខ្លះទៅដើរបង្ហាញម៉ូដក្នុងកន្លែងធំលំដាប់ថ្នាក់ជាតិទៀត ។
ទាំងនោះហើយទើបនាងមិនជឿជាក់លើខ្លួនឯង ព្រោះកន្លងមកមានគេសួរនាំពីបញ្ហានេះដែរ តែនាងមិនទទួលខ្លាចតែបាក់មុខ ព្រោះនាងមិនសូវប៉ិនទ្រាំនឹងស្បែកជើងកែង ខ្ពស់ៗទេ ទោះជានាងមានកម្ពស់ត្រូវខ្នាតអ្នកដើរបង្ហាញម៉ូដក្ដី ។ ស្រីស្អាតមកពីខេត្ដព្រះសីហនុរូបនេះបន្ថែមថា «ខ្ញុំធ្វើការតែអាជីពពិធីការិនីមួយមុខនេះជាមួយអាជីពជាអ្នកលក់ផ្ដៅខាងក្រៅសិល្បៈ គឺល្មមអាចទទួលយកបាន ។ នាងខ្ញុំស្រឡាញ់សិល្បៈបែបនេះហើយ ទើបនៅតែបន្ដចាប់យក បើឱ្យស្ទុះទៅចាប់យកអ្វីច្រើននោះគ្មានពេលរកសីុទេ ។ នៅផ្ទះខ្ញុំជាចំណែកមួយមើលការខុសត្រូវម្នាក់ដែរទៅលើមុខជំនួញ ។ នាងខ្ញុំសប្បាយចិត្ដនៅពេលដែលកម្មវិធីដែលនាងខ្ញុំធ្វើនៅទូរទស្សន៍ប៉ុស្ដិ៍លេខ១១ ទទួលបានការគាំទ្រពីមហាជនធ្វើឱ្យនាងខ្ញុំមានទឹកចិត្ដបំពេញការងារបន្ថែមទៀត ធ្វើយ៉ាងណាឱ្យកាន់តែល្អឡើង» ។
ម៉ាណា ថ្លែងអំណរគុណដែលរៀមច្បងចាប់អារម្មណ៍ចង់បាននាងធ្វើជាតារាបង្ហាញម៉ូដ ព្រោះឃើញមានគុណសម្បត្ដិខ្លះ តែនាងនៅមិនទាន់សម្រេចចិត្ដទេ ចាំមើលទៅថ្ងៃក្រោយសិន ក្រែងអាចប្ដូរចិត្ដ ៕
ចែករំលែកព័តមាននេះ